Akorintiyi II 9 - Alkawali Woiwoyi

¹ Mi kpelo ge ko to zhin tile nu, ma ka ga fye ntu Shekwoyi aza bmazhin ɓo m.

² Gama mi kpelo shi a wo fye pwa lo fya zhin ce, har ma gma n a nugundo aba n Makidoniya nge, fye ɓei n cei pma fya tnu a bmazhin tunyi ntna. Ɓehin-hin, efye bugba napye nu, na ga aza ɓe pwawo ɓa bmazhin.

³ Ama mi tnu n naza deyeyi ya kpe dei-dei ge fye n shiriyi zhin lo, shi ma gnaɓa fye n cei zhin lo, n fye agyi-wyei yezhi, mito n cei pmalo kwa ze n saye ngye mi la bwi aba n mi gma gma yi nfye ɓo m.

⁴ Vinyiko ɓa wo mi n mwa – nfyei ɓe, n na azan Makidoniya ɓe n gnisun n miyi, to ɓa gye fye nshiri yi zhin mi-i ku gna ɓan.

Ga, Shekwoyi Ɓa Gba Ho Ta

⁵ Ce na zhin mi-i tnu n na aza deye yi, n mi abye ɓa kpe dei-dei cauta ye n fye ɓei zhin alkawali nyi ala yezhin ai pmi yi. Mi n cei pma kwa wu n gye cauta hin-hin, toge ngye atufye tile nu fyei gam.

⁶ Ama fye pa ge n fya ga fyewyi, fye ɓei bwa fyewyi, Fwaiza n wa bye nyabye fyewyi wo zhin wa bwa ampanyi fyewyi, ama n wa bye n mwa wa bwa n mwa.

⁷ Ozaho-zahoi vinya wo ɓa dna nwo bugba shiwo ɓa ga n sun. Fye to tu oza kala wa ga, ndu shi wo ncei pma wa ga n sun, ntuge Shekwoyi ci azanu nɓa ga n bugbayi gmanyi.

⁸ Shekwoyi ɓami wa ga fye enya n fye to n cei lon, har ndu du ɓo, nnabai n fye ta gba o fye a bukata nu gmanyin, ama har n ko ɓa ce fya ga azaje n bugba bui-buyi.

⁹ Kwo wu shi littafi a danu, “Shekwoyi ʼza zhin wa ga awyekwoyi nya n bugbayi gmanyi. Owo ɓemana zhin ɓa ze owo mwa-mwa nyalo-nyalo.”

¹⁰ Gama Shekwoyi n wo ga fwaiza nyabye, wa bye nyi, n na avun wa do nyabye n mwa wa gyi nyi, wo ɓa ga fye ndudu fya bye wa zhin kwa pa n na bai fya ga nya ndudu dna nfye ampanyi.

¹¹ E, Shekwoyi ɓa ga fye n mwa n nabai fya ga n mwa, esa n ya lo aza nfye nya gayi n na aza aba ɓei sa Shekwoyi ami, ɓai ciwo n tu nfye bmazhin ɓo.

¹² Aɓo ngun aba na zhin ntu nfye bmazhin ɓo, aza n ɓa sangyi yi lo ɓa bwa bmazhin, ɓai ci Shekwoyi n jesun.

¹³ Aza nfya bma zhin aɓa daɓa, to n tukwoyi tu n fye bmazhin n fya zhin ɓa n na azajeyi nyin, ama ɓa ɓei ci Shekwoyi, ntuge ofye a ɓezhin wu lo dei-dei nfye wuwuyi.

¹⁴ Ba ɓe zhin adduʼa gafye n bugbayi gmanyi, ntu n Shekwoyi alheri ɓo n na wuɓa nfye aba nyi.

¹⁵ Yi sa Shekwoyi ami ntu wo Nugun ɓo, owo cauta n ko du ɓeda asan.