Akorintiyi II 5 - Alkawali Woiwoyi

¹ Gama yi kpelo ge, esa tent ye n yi fi nkwo nyi wato eyi nayi n anyimi ye, esa kwa miya Shekwoyi ɓei gayi puwa n she, puwa n wa mi n wohin tukwo yi, puwa n kwo ta shan miyam.

² Nsaiye kwa aku yi ɓe, yi cei pma lo ya bwa puwa eshe nya ye.

³ Esa ya kpe puwa ho kwo nu kwa, a ta shan yi gye n nayi yem,

⁴ Esa yi ye filo n nayi ye, yi do mi lo n wahala yi, ko to nyi ge yi ta yelo n nayi yei num, ama ge yi ye puwa eshe nya nu. N nabai nya kwo zhin fifi yi, a kpekwo wye-wyeyi.

⁵ Shekwoyi nu layi zhin shiri, ntu doshan ye ɓo. Woi ga yi owo Zafun, n nabai kwa zeyi, ɓehin-hin ntu anya ɓo vinya n wo cei lo n tu yi ɓo nyi.

⁶ Ntu cenu yi wyepai lo, yi kpe lo gʼe esa yi fi nayi ye, yi to lo n Shekwoyi puwam.

⁷ Gama eyi zan-zan zhin gaiciya ga nya nu, to yi gye wye m.

⁸ Yi wyepai lo so-sai ama yi gna ye lo ya fa nayi ye, ya lo Shekwoyi puwa.

⁹ Ama nya kwo du lo vinya, yi cei pma ya gawo agmada, kwo yi-i fi anyi ye kwo kwa n wo aba nʼshe.

¹⁰ Gama kwo zhin tile nu, eyi vinya ya yezhi n Kristi ɓa, wa da yi owa. Zaho-zahoi ɓei gwo nya kwo kunce shi wa zhin n wu. Ko manayi kwo nukwoyi dna anyimi ye.

Kristi Atnu-tnuyi

¹¹ Yi kpelo ge kwo bmiya lo yawo Dagayi dna, ntu ce yi gna aza. Shekwoyi kpe yi ye lo. Ama mi zhin nubo lo ge, dna n fya bugba, fye kpe mi ye lo vinya.

¹² Yi to cei pma ya wu eyihin tukwo n fya ba nu m, ama yi cei pma ya ga fye dalili n fye ɓa gma n yi, n nabai n fye ɓa mi fya dna aza ɓe gbe n ɓa gma nazaje bmiya-bmiya nyi ama to ɓai gma n wo hali yi m.

¹³ Yi ku ze anyacei nu? Ai ntu Shekwoyi ɓo nu. N yi zhin aza alafiya da nu, ofye nu na ampanyi lo.

¹⁴ Yesu ye-ye nu tulo n yi she vinya, she yi kpelo ge zaknayi nu ɓei fi n aza ɓo, vinya. Deye kwa wu ge aza vinya ɓa ku fi ngnisun woi.

¹⁵ Wa fi aza ɓo vinya, ntuge aza n ɓa wye-wyeyi, to ɓa laɓa ɓahin tukwom ɓom, ama ntu oza ɓo n wo ɓei fi wa laka n vingwo ntu ɓa ɓo nyi.

¹⁶ Ntu cenu yi ta da zaho-zahoi owa dna oza ɓemwi m, ko n sahoi ma ngye yi ɓei ku Yesu da owa dna aza ɓemwi, yi ta shan zhin lo lonu m.

¹⁷ Esanu oza la vi Yesu, wola ze oza woi-woyi, oza kwo-kwoyi la duya, hali woi-woyi la ɓe.

¹⁸ Deye vinya Shekwoyi nu zhin, gama ntu Yesu ɓo, wo ɓei la yi shan do. Eyi n yi ɓei zhin owa nuwunyi, yi ku ze owo anugundo. Woi ga yi tnu-tnu, n yi ɓa ɓe n nazajeyi ɓa ze owo anugundo.

¹⁹ Eyi ɓeda nu nyi ge, Shekwoyi ɓei ze aza owo anugundo.

²⁰ To, yi zhi nyi, yi zhin Kristi atnu-tnuyi nu. Wato kwo wu lo ngye Shekwoyi nu gyi fye wye, ntu Yesu ɓo, yi gyi fye wye fye fa Shekwoyi wa shan fye do, fya ku ze owo anugundo

²¹ Yesu to ɓei zhin laifi da num, ama ntu yi ɓo Shekwoyi wa zhin wo, har wa ze laifi da, ntuge ya kuze aza manayi.