Akorintiyi II 2 - Alkawali Woiwoyi

¹ Ntuce nu ma cige mi ta ɓe fya ba njesun ntu ge ma zhin fye fya wun bugba m.

² Gama n ma zhin fye fya wun bugba, nyika nu ɓa gami agmada? Sai of ye n mi la fye wun bugba nyi.

³ Cenu ɓei zhin ma ka fye wasika hi, mi to ɓei cei pma ma ɓe fye aba fya zhimi ma wun bugba m. Gashi kwa ofye nu na gmadai lo.

⁴ Mi ɓei ka fye n bugba wun yi n gaiciyai har n bwi ci yi, ntuge to ma zhin fya wun bugbam, ama ma wu fye fya kpe shi mi ye fye lo vinya.

⁵ Ndei zaho la bugba wun zaho nfye, wo to zhin minum, wa zhin fye nu, ko kwa zaho nfye tun da shike mi to cei pma ma ga zaho-zahoi wahalam.

⁶ Kwo la kun ce wa bwa tata ye pya, nfye ku zhinwo nyi.

⁷ Ama sai fya zhin wo gafara, fya cewo bwa njesun, n nabai to wa godiya n bugba wun yi, har fya gye woi fa Yesu vi ɓom.

⁸ Mi gyi fye wye nu, fye zhin wo wa kpe ge fye yewo lo.

Nyikanu Kunce Lo Ntnu-tnu Ye A?

⁹ Cenu ɓei zhin ma ka fye wasikahi mi ɓei ce pma ma kpe shi fya gyi nasara n wu, njesun ko fye zhi lo n shiri zhin ntuge fya vi nya ma gna fye.

¹⁰ Esa nu fya zhin ʼza gafara n laifi wa zhin nyi, mihin mi ku wo zhin gafara ce, gama esa ma zhin wo gafara ncei ndai gye nyaho lo, ma zhin gafara ntu kwo ɓo, to mi zhin kwo ntu Yesu ɓo nu, ntu fye ɓo njesun.

¹¹ Nna bai to shetan wa gyi nasara n yi m, ntu ge yi kpe wo shiri ye lo vinya.

¹² Esanu mi ɓei si Taruwasa ntuge ma zhin waʼazi ɓo, ma gye Shekwo la zokwo guya ga mi.

¹³ Ama mi ɓei la damu n mwa, ntuge mi to ɓei gye Titus wye m. Ntucenu ma lakala ma lo Makidoniya.

¹⁴ Ama godiya ga Shekwoyi, ntu nasara ɓo, n Yesu Kristi ku zhin, tu n yi tukwo nyi, ngye shi wo zhin ampanyi n yi abaho-baho yi n ya lo, ntu ge ya da owo Nabari manayi n aza aba, ngye turare sundayi.

¹⁵ Gama yi zhin ngye turare sundayi nu, n Yesu zhin kwo hadaya ga Shekwoyi nyi. Kwoi laɓa n a Yesu-viyi aba ɓedo azayi nɓa to go wom.

¹⁶ Ga aza nɓa fi lo n bwi-bwi Turare ye zhin nya nukwoyi nu n kwo wu za. Ama ga aza ɓa filo n pwo-pwo kwo zhin nya manayi nu n kwo ɓe wye-wye yi. To, nyika nu ɓa mi n tnu-tnu ye pya?

¹⁷ Ai, yi to wu lo ngye aza nu, n ɓa la Shekwoyi ɓeda kwa ɓa ze gyiba nya m. Ama shi Shekwoyi nu na tnuyi, yi daɓo n gaiciya yi, ntuge yi zhin Kristi abara nu.