Akorintiyi II 13 - Alkawali Woiwoyi

¹ Ebwa tahi nyi n mi ɓe fye aba, Littafi a gnayi nge n aza gun aba ko ngun ata nku ɓenukwoyi gye tilas atako, (To emi gnakni bwa tahi nu nyin.)

² Mi ɓei la gnaknin aza n ɓa zhin laifi nyi, esa n mi ɓei ɓe fye aba cei nyi, nsayi mi gna kni ɓa njesun, shi mi ɓei shin gnaknin ɓa nyi, du n na azajeyi ɓe n ge n ma ɓe, miye ma ta ɓanu mi ta gye ɓa sun-sun m.

³ Mi ɓa wu fye enya n fye ye vinya fya kpe n ge Kristi daɓo n fyei dna nmi, Kristi to gba kala lo n wo aɓo zhin n fye yin, ama wo zhin iko yakwo nu dna n fye.

⁴ Ewo nayi kala gbayi ɓei lafi tu n zundu, ama nsayi ye wo n wye-wyeyi lo dna n Shekwoyi iko. Eyi n yi cenyi yi gba kala gba-gbayi lo dna n nayi, shi wo ɓei gbakala, ama nsayiye yi sase n kalayi shi wo ncei nyi, n Shekwoyi ikoyi vinya n wo aɓo zhin nfye yi.

Fye Mwi Fyehin Tukwo Gye

⁵ Fye dna fyehin wye, Fye zhin a Yesu viyi nu? Fye gyi nasara lo? Fye wo Kristi aese lo nwo ikoyi n fye a bugbami? Ko fye dna fyehin kwoce nu ge fye zhin a Yesu viyi to fye yi zhin ma?

⁶ Mi zhin nubo nge fye ɓa ye, fya zhin saida nge miku nasara ho gyi, mi zhin Kristi nyanu.

⁷ Mi zhin aduwa nge fya se ase manayi, to ge ya bwa enya n yi ɓa gma n cei n, koi wu nge enya n yi wunyi ko zhin gaiciya nu. Awo, gama yi n cei pmalo fya zhin ɓemana kwo ai ci yi wyegba.

⁸ Eyi tnu-tnu nu ya ga ɓemana zhin bugba kala, to ge ya zhin nubo n ɓenukwoyin.

⁹ Adayi lo shi yi to n kalayi lon ai ciyi wyegba, ama fye n kalayi lo. Eyi ɓemwi n yi aduwa zhin yi, okwo nu zhin fya ku ze a Yesu vi yi kalada.

¹⁰ Mi ka deye ga fye n na awyetuyi, mi ta shanɓe ma ta fye esa n ma ɓe n cei n, gama mi cei pma lo ma zhin a pma n Dagayi ikoyi n wa gami nyi, to ge ma ta fyen, ama ma zhin fye fya ze a kalada.

¹¹ Mi zo emi wasika n na ɓe da ye yi. Fye da gma fye mwa fi n Kristi fye kna aɓo tunbua n mi ku da nyi, Fye sase n bugba-doloyi, n bugba fuyi. Shekwoyi ye-ye nya, n bugbafu nyayi wo kunsun n fyei.

¹² Fye ɓi aje gna dna n Dagayi.

¹³ A Yesu viyi n ya ɓa ɓi fye gna lo.

¹⁴ Alheri eyi Dagayi Yesu Kristi nya ko kunsun nfyei vinya. Shekwoyi ye-ye n Zafun jedoɓe yi ko kunsun nfyei. Amin.