Akorintiyi II 12 - Alkawali Woiwoyi

Shekwoyi Iko Dna N Kalagba

¹ Gmagma yepya zhin acije nu, ama fye fa ma gyi abye, ma gnafye aɓewyegye ɓo, n na ɓei n Dagayi ku wu mi.

^2-3 Aye ngunawo-cei anyi n ɓa duya nyi aɓei lami lo cei n ʼshe mazhin ziyara. Fye to nyami ko dna n mi nayi kwo dna n mi zafun. Ntuge mita kpe genyi lon. Shekwoyi gmanyinu kpe ce lo. Ama mi ɓei la lo ʼshe.

⁴ Mawo aɓo wo-woyi n ɓa du zanyikwoci asan wa da (ama ato ɓei ye nge mi gna aza aɓeyem).

⁵ Beye-kpe ye pya kun ce lo oza gma, ama mita gman, miɓa bwa gma n mi kalagbai nu, njesun shi Shekwoyi n ikoyi wa zhin apma n zakala-gbai n tu nwo mwa-mwa ɓo.

⁶ Mi n na aɓeyi lo n mwa, n mi ɓa gma n ɓa ɓo, mi-i ta ze mama nge mi gma ntu nɓa ɓon, ama mito cei pmalo oza zhin nubo n mi tukwo ndu enya n wo gye n mi zan-zan, woi ce woi ce woi wo n mi waʼazin.

⁷ Miɓa da ɓeye, gama eɓeye zhin aɓo adnagmayi nu, Shekwoyi ɓei wodna sakun miɓa mwa mihin tukwo n ɓai nu, ntu cenu a gami kalagba dna n nayi, kola ze ekna dnami nayi, she tan tnu-tnuyi ko knimi kwoi gnami-gna-gna.

⁸ Abwa ngun ata mi-i gyi Shekwoyi wye, wa ga mi lafiya n jesun.

⁹ Ama wa gnami ge, “Awo, mikunsun lo nhoi, nyanu n ho n cei pma lo. Omi iko wu kohin n du, n na aza kala gbayi abaʼa.” Nsayi ye a damailo mi-i gna shi mi to n kalayin, adamilo mi sase ngye oza n wo wu Kristi iko maimakon mi wu emihin iko n ɓeye-kpeyi.

¹⁰ Shi mi kpelo ge ntu n Kristi ɓo nu nyi, bugba ta wun mi lo n ekna yi ɓon, n na agyeyi, n wahalayi, azhin n gmagma sin yi, gama esa n mi gba kala, n sahi nu n mi n kalayi.

¹¹ Fye zhin mi, mi-i zhin aɓo ngye mama, mi-i gma n lanyi, ko ɓei kunce efye nu fya ci mi, to ge ma ci mihin tukwom. Ntu ge nyaho to lo nna aza deye ncei lo, n mi to cei lon ko shi kwo nyi mi to zhin nyaho num.

¹² Esa nmi ɓei kunsun nfyei, mi ɓei ku wu fye pei-pei, nge mi zhin tnu-tnuyi nu, n Shekwoyi wa tnu n miyi n wohin tukwoyi, gama mi ɓei ku aɓo awo-woyi n na atnu-tnu yakwoyi zhin nfye aba.

¹³ Enya gmanyi n mito ɓei zhin fyen, n mi ɓei zhin n na a ikklisiya aje, ekwonu mi to ze akaya n fye aban. Mi to ɓei gnafye ge fye gami nyagyi magyi, n na abai n mi ɓa wangyen. Mi gyi fye wye fya zhin mi gafara, ntu laifi ye ɓo.

Mi Je Fye Aba Ɓe Lo

¹⁴ Nsaiye mi je fye aba ɓe lo, bwa tahi, mi-i ta nyafye nyaho ɓom, mi ta ye efye agyiwye lon, mi ye fyenu, nzokwo doho-dohoi fye zhin omi aɓinu, fye kpelo aɓi ta gba oɓa dada n oɓa ayayi nyagyi ɓa gyin. Aɓi danu ga aɓi nyagyi.

¹⁵ Mi nbugba bui lo, ma ga fye omihin tukwo n nyayi vinya n mi n cei, ntu n fye ɓo dna n zafun. Ko shikwo-nyi, ʼfye yeye to mwa lo n mi aba, ngye shi mi ye fye nsun nyim.

¹⁶ Azaho n fyemi ɓai gna ge “Ko zhin gaiciya nu yi ta wu nyaho n wo ɓeɓen, ama wo zhin oza ce-ceyi nu, woi dnayi kwoce, yi tabbata lo tilas wo ɓei la gyiwye go n yi n zokwo doho.”

¹⁷ Ama n wuna? Aza n mi ɓei tnu n cei nyi ɓa ɓei ku gyibaho gyi tu n fye tukwo?

¹⁸ Esa n mi ɓei gna Titus nge wo ɓe n eyi zado yi n jesun, ɓa ɓei ku gyi baho gyi tu n fyenu? Awo, gama yi n Zafun Gyi-gyi-yi gmanyi yi nu, yi zan-zan gmanyi, yi zhin ɓo n zokwoyi gmanyi.

¹⁹ Mi zhin nubo fye gye ngye mi da aɓeye vinya, n nabai fya ye n mi-i nu, ko ngye ma bmiya mihin shi nfye aba. Ko to wu lo nu m. Mi da deye n Shekwoyi abye, ngye aza nɓa dna n Kristi, emi anugundo ye-ye-yi ntu ge ma mi fye zhi dna n zafun.

²⁰ Gama edna wo mi lo esa n ma ɓe n cei, anya n mi ɓo gye ta damin, enya n mi ɓa zhin ceta da fyen, edna wo mi lo mi bei gye fye fi fyei wu anya. Fye wo aje ʼshe, fyei gyi minagyi n na ajeyi fyei mwa fyehin tukwo, fyei da ɓo a nukwoyi n na aje tukwo n nunuyi n tukwomwayi n na ajegna yi.

²¹ E, edna womi lo ntu ge n ma ɓe fye aba Shekwoyi ɓa gbami n fye abye, bugba wunmi ma ci bwi, ntuge n mwa-begye nfye, n ku laifi zhin ɓai ku ze alaifida to ɓai damu n ɓenukwoyi, aɓo cegye nya n fye ku zhin, n na aje anyikwo gwoyi.