Akorintiyi II 10 - Alkawali Woiwoyi

Aba N Bulus Iko Kun

¹ Omi Bulus, mi gyi fye wye pecei-ye shi Kristi n wohin tukwo ɓa zhin, ama azaho nfye mi cilo nge, “Bulus wasika woshan esa nwo gni n tagni, ama esa nwo si n ya, edna ɓawo wo wa daɓo nkalayi.”

² Mi to cei pma lo ma wu fye, esa n mi ɓa ɓe fye aba n cei, shi mi gyi mina-gyi nwun, mi to n cei pma lo ma zhin omi ɓemwi n na aza aba n ɓa gye ge omi ɓeda zhin oza ɓeda nu kawai m.

³ Kwo zhin gaiciya nu ge, mi zhin zanyikwoci nu n kalagbayi, ama mita zhin apma n zanyikwoci shiri yi ko dabalai nu mi-i gyi nasaran.

⁴ Mi zhin apma n Shekwoyi akun kaya akalada, to ge ado n zanyikwoci wa zhin nwo abwa yin, mi-imi shetan aba anukwoyi akalada ya m.

⁵ Akun kaya ye zhin ɓa bma tukwo mwa doho-dohoi ya, nkwo zhin gaba n Shekwoyi n nyai nkwo ɓa pmi aza awye ya nwo. Nna akun kaya ye yi nu, mi wan a wyenakpeyi ya, mi-i jezeɓe n ɓai n Shekwoyi aba, ai shanɓa do ɓa ze aza nɓa bugba ɓeye nu ge, ɓa vi Kristi ɓo.

⁶ Mi ɓa zhin apma n na akun kaya ye yi, tu n tukwo gnanakwoi doho-doho, mi ɓei zhin apma nɓai nu nfye, fya ga fyehin tukwo n Kristi akun.

⁷ Oɓo gmanyi nfye aba, okonu fye shimi awye, mi wu n gba kala gbagba yi, ntna kala, ama fye ta shi awye n fmin. Ama ngye oza lo nwo ɓa gma n Kristi kalayi n ikoyi mi ɓa mi ma gma ndu wo.

⁸ Kwo wu lo n gye mi gmalo nmwa n mi ikoyi tu nfye tukwo, iko ma bmafye zhin, to ge ma tu fye ci, mi ɓa zhin apma manayi n mi gma gmayi.

⁹ Mi da deye, to fya gye nge mi ɓewyi nu, esa n ma lanu n fyei dna n mi wasikan.

¹⁰ Aza ho gna ge, “Fye to damu nwo wasikayin, wo da ɓo n mwa ama wo ɓewyinu. Esa n wa si n ya fye to ɓei bwa ɓeho manayi nwon, owo pwa to ɓei shan fye fin.”

¹¹ Nsayi ye omi ɓeɓe ɓa du, omi awasika dudu n shanwo.

¹² O, fye to wun bugban, mita ci ge mi du aza de ye lo, nɓa gna fye shi ɓa gma nsun, Oɓa wahala bwasun nge ɓa mwi ɓahin do n na ajeyinu. Ɓai mwi ɓahin do gaba nɓa ɓeye-kpeyi, Ɓo kasa.

¹³ Ama yi ta gma n ikoyi n yi to ncei lon, Eyi ɓemwi, ya nu Shekwoyi shiri n wo cei zhin n yiɓo, shiriye zhin eyi tnu-tnu zhin n gnisun n fyeyi.

¹⁴ Yi ta bwi aba nu, ya wu yi iko n yi cei lo tu nfye tukwon. Gama eyi nu ɓei kmi efye aba ɓe n Nabari manayi Kristi nya yi.

¹⁵ Kwo to wu ge yi ye ya gwo mwa-mwa n zado nku zhin m. Yi ye efye gaiciya ga kwa mwa n na bai eyi tnu-tnu nfye aba kwa mwa pata.

¹⁶ Ndeye avun yi ɓa mi ya zhin a zhido waʼazi n ɓa kpalo n fye yi, aba n zado ta zhin tnu-tnu lon. N lonu zaho ta shan ci ge yi fi n zado fwan.

¹⁷ Shi Shekwoyi ɓeda da, “Ndei oza ɓa gman, wo gma n nyayi n Shekwoyi n ku zhin, to ge nwohin tukwoyin.”

¹⁸ Esa n zaho a gma nwohin tukwoyi n ɓeyi nkwo ku zhin, ko to zhin nyaho nun, ama esa n Dagayi wa ciwo, kwo da wu lo gbo.