Akorintiyi I 4 - Alkawali Woiwoyi

¹ Ntu cenu fye ku yi ze a tnu-tnu yi nu nɓa gna Shekwoyi anabarka mi, ɓai wu Shekwoyi asiri njesun.

² Ɓo kpakalai nna ye n tnutnuyi aba okwo nu ge, wo zhin ɓo nna gna wo zhin, wato a sun wo dna n gaiciya.

³ Omi ma? Mi zhin bara manayi nu? Mi to damu lo nfya ɓo nubo zhin yi tu mi tukwo da cem, ko aɓo zaho-zahoi zhin nubo ce yim. Mi to n mihin tukwo yi ga gaiciya lo tu ce m.

⁴ Omi bugba ta zun mi kni lom, dudu lo nu ko to wu nu ge mi knikniyi lom. Shekwoyi nu zhin mi mwi yi.

⁵ Ntu cenu fye to zun-ɓo ya wolo wolo, to Dagayi yi zhim, tu n zahozahoi tukwo ko wo zhin bara manayi nu ko nukwoyi m. Shi Dagayi ɓei ɓe, wo ɓei kpe buzangna ya a gye shi zaho-zahoi wu lo har bugba mi. Zaho-zahoi ɓei kpe sayi nya ko zhin yi zhin Dagayi tnu-tnu. Dna sayi nu n Shekwoyi ɓei ga zahozahoi wo cici n ko zhin wo nya.

Fye To Kni Aza Kni-Knin

⁶ Ma zhan-pma n Apollos yi ɓedo mihin yi, ma si ɓo si n mi da nyi: nge fye to kni aza kni-knim. Fye to mwa fyehin tukwo n Shekwoyi tnu-tnu yi hoi ngye wo du azaje lom.

⁷ Ho zhin aɓoko kni ɓei na? Ho kninyi lo n Shekwoyi nu to ga ho ma? To kninu zhin hoi ci hohin ngye nya ho cei nyi ato gaho ga-ga nu ma?

⁸ Fye zhin aɓo lo ngye fye ku zafun nyagyi lu bwa vinya n fye cei pma. Nubo ku fye fu dna zafun har fye ku gyi abe n yi ceya. A wo mi ngye fye ye ku abe yi nu gyi nu, ntuge sa nʼsa ɓei si, fye ɓei gye yi gni abe gyi nfyei ce.

⁹ Nsa hoi kwa wumi ngye eyi n yi zhin Shekwoyi atnutnu yi nyi, Shekwoyi ku yi kma navun vinya. Yi wulo ngye aza nu nɓa zhin laifi dnagmai har aye awuɓa. Yi ku ze awye shi nya na za ba ɓedo na malaika yi.

¹⁰ Yi ku ze a ma-ma ntu Yesu ɓo, amma fye ku ze aza ce-ce ntu Yesu ɓo. Yi ku ze akala gbai, ama fye na kalayi lo. A kuyi ze aza gbolo, ama aku mwa-mwa gafye.

¹¹ Har n saiye, mikun gnuyi lo, yi wo nuwan mikun, yi kpe aje sakun, ai lu yi, yi zan-zan laɓa ngye aza ɓa to na pi yim.

¹² Yi zhin tnu-tnu nʼya bwa yi ntuge ya bwa nyagyi. Esa na za kpe ya gye, ya tuɓa anabarka, esanu ɓa ga yi wahala, ya bwami nɓai.

¹³ Esa na dayi ɓo nukoyi, ya dnaɓo gbe na ɓeda manai yi; yi ku ze findakulu, yi ku ze aza gbolo har naiye.

¹⁴ Mi ta ka fye ɓedaye ge mi ye ma dnafye vinyiko nu m, ama mi kun fye nu ntuge fye zhin ma ɓi ye-ye yi nu.

¹⁵ Ko fye bwa aza n lo dubu gun awo ɓa wu fye Yesu ɓo, fye pa ge mi nu bwa fye dada zhin gmanyi. Ntuge omi nu na gni fye ɓe cei n Yesu aba, esa n mi ɓo zhin fye waʼazi cei nyi.

¹⁶ Ntuce nu mi gyi fye wye, fye tumwi n mi, fya zhin she mi zhin.

¹⁷ Cenu zhin mi-i tnu n Timatawus yi n fya ba wa bma fye zhin, Wo zhin mi ɓi yeye yi nu dna Dagayi, gbenuyi nu njesun. Wo ɓa pa fye aɓo mi wu dna ekklesiya dohodohoi nma lo.

¹⁸ Azaho lo n fye mi ɓai mwa ɓahin tukwo, ɓa gye ge mi wo dna nu to mi-i ɓe fya bam.

¹⁹ N Shekwoyi aye yi, mi ɓe lo safyewyi. Dna n Sayi nu n mi ɓei kpe aɓokoda-yi ɓo ye, ngye ɓa to zhin aɓeda dayi nu kawai yim, ko ngye ɓa n Shekwoyi iko yi kusun lo.

²⁰ Ntuge Shekwoyi bemi to zhin aɓoda nya nu kawai yim, ama iko nya.

²¹ Fye kni kni-dai na? Miɓe fya ba n gnakni yi, n busi yi pma lawu ɓedo, ko mi ɓe dna yeye n buga yami ya?