Akorintiyi I 3 - Alkawali Woiwoyi

Aɓi Nawyi Tnu-tnu

¹ Oma zaje, mi daɓo lo fyei ngye aɓi putu nu, dna Yesu vi zokwo, to fyei vi Dagayi m, sai ofya ɓeye, mi ta mi ma daɓo fyei ngye a Yesu viyi kalada nɓa nunuyi lo n Zafun yim.

² Kwa zemi dole ma gafye madara to ge nyagyi kpakala yi m, ntuge fye to ɓei yi kunce fya gyi nyagyi kpakala yi m. Har saiye ma fye to kunce m, fye ɓo sin madara nu kpa.

³ Ntuge fyeye zhin a Yesu viyi-putu nu, fyei vi fya ɓeye, toge Shekwoyi nya m. Sanu fye wun aje nu fyei gnajeya ntu nanya wu ɓo, kwo ta wu nu ge fye zhin aɓi-putu nu fyei ye fyehin zokwo m? Ɓehin-hin, fye zhan ɓo lo ngye aza nɓa to zhin Dagayi nya num ko fye-fye.

⁴ Fye ku gye, fye wu-anya najei ge ko omi nu du Apollos lo, fyei gna aduwa nyakun aje. Kwo to wu nu she fye mwa-mwa ye gbagbai lo dna Dagayi yekpe mim?

⁵ Nyikanu mi-i, ko Apollos, nʼyi ɓa ku ze dalili ajegna nya? Ntu ge na, yi zhin Shekwoyi atnu-tnuyi nu kawai, zaho-zahoi nwo nyaga yi, nʼyi bmazhin yi nu, fyei ga gaiciya.

⁶ Omi tnu-tnu nu ɓei ma bye anya n fya bugba mi, Apollos kwa wa kpe nuwan, ama Shekwoyi nu na zhin anyai pa nfya bugba mi, toge eyim.

⁷ Eza n wa bye-bye nyi ɓedo n za yi nwa kpe nuwan kpe-kpe nyi, ɓa to zhin nyaho nu m, ama Shekwoyi nu zhin tukoda gama Owo nu zhin anya yi pa.

⁸ Apollos nʼmi-i, yi zhin tnu-tnu n ngye bwadodna nya, n ɓomwi yrgmanyi, ko shi ko nyi a ɓei ga zaho-zahoi nʼyi mi lada she wa zhin tnu-tnu n wohin yekpe sun.

⁹ Yi zhin Shekwoyi atnu-tnu loyi nu ngnisun kawai. Fye zhin Shekwoyi fwa nu, toge eyi nyam; fye zhin Shekwoyi nyakun nu, toge eyi nyam.

¹⁰ Dna n Shekwoyi alheri, Wo ku wu mi she mi ɓa ze nya-miyi ʼgbada. Mi la nyakun shi, Apollos la nya mi tu ko she. Ama zaho-zahoi wo ɓa mi nya tu ko, wo zhin peceiye.

¹¹ Ntu ge zaho to lo wa shan nyakun hin-hin shishi ndu do yi la lu bwanyim wato Yesu Kristi nu.

¹² Azaho ɓa mi tu nya shi-shiyi ye n zinariya yi, ko azurfa, ko a kuta a nabmiya yi. Azaho kwa ɓa mi na shinwan yi, ko agbe-gbe ko akpa-yi.

¹³ Zaho-zahoi tnu-tnu dai aɓei pmi ko gye nʼna nu. Wada wyi nu n Kristi ɓei pmi ko gye n wohin tukwo yi. Ena nu ɓei wu ko tnu-tnu yi bmiya lo, ko koto bmiya lo m.

¹⁴ Oza wa mi tu nya shishiyi ye, kwa gmi gni to kwa gyinam, wo ɓei gwo lada.

¹⁵ Ama n zaho-zahoi tnu-tnu ʼaku gyina, wa bwi nuwan. Ama wo ɓa pwo n wohin tukwo, sai dai ngye wa shegmi n ʼna nu.

¹⁶ Fye ta kpe lo ge fye zhin Shekwoyi nyakun nu, Shekwoyi Zafun yi sase lo dna fye mim?

¹⁷ Ntucenu zaho-zahoi nwa wun Shekwoyi nyakun ya, to Shekwoyi ɓa wun wo ya. Ntuge Shekwoyi nyakun gyi-gyi-yi lo. Ofye nu zhin anyakun yi.

¹⁸ To zaho-zahoi wa dna wohin tukwo kwoce ge wo zhin za cece nu she anyi-da gye fyem. Ndei zaho gye wohin tukwo lo lonu, wo la ze mama ntuge wa bwa cece eshe nya.

¹⁹ Ntuge nya n aʼnyi ye gye ge cece nu, ko zhin gboloyi nu n Shekwoyi abye. She Ayuba littafi da, Shekwoyi zhin wa wan aza-ce-ce dna ɓa ce-ce mi nu.

²⁰ Littafiʼa jeda dna Zabura ge Shekwoyi kpelo sarai shi zanyikoci zhin aɓo nubo wu, ɓai zhin a gboloyi nu.

²¹ Ntucenu, zaho-zahoi to gyigbe ge wo vi aza cece anyi nyam. Ntuge Shekwoyi la nyaho-nyahoi ga fye.

²² Wo la Bulus, n Apollos yi, n Bitrus yi ga fye ɓa bma fye zhin. Wo la anyi vinya ga fye fya zhan-pma ceyi, wye-wyei ɓedo nʼfi yi ofya afyenu nu. Wo ku anya vinya ga fye nɓa lo n sayi ye ɓedo na nya yi nɓa ye ɓeɓelo. Ɓa zhin fyanya nu vinya

²³ Fyehin fye zhin Kristi anya nu. Kristi kwa Wo zhin Shekwoyi nya nu.