Akorintiyi I 2 - Alkawali Woiwoyi

Shekwoyi Shiri Mama Nya

¹ Ema zado, esanu mi ɓei ɓe fya aba ma gna fye Shekwoyi nabari ceyi, mi to ɓei zhan pma na ɓeda dadai yi, ko ɓeyekpe dnagmaiyim.

² Gama mi ɓei la tu ge miɓa bwa ɓeda tu n Yesu tukwo nu n Wo fiyi tu n zundu.

³ Ntucenu ma ɓe fya ba dna n kalagba, n dnawo yi, n vinvin yi.

⁴ Mi to ɓei zhin waʼazi n ɓeda dadai yi zanyikoci ɓeyekpe nyam, ama Zafun Gyi-gyi-yi ɓei dna n ma ɓeda Woi wu aza nɓa ɓa wo nyi ge, tnutnu ɓo gmi n Shekwoyi aba nu.

⁵ Nɓei zhin lonu n nabai efye gaiciyaga kwa kpema Shekwoyi nu, toge zanyikoci ho ɓeyekpem.

⁶ Ama mi daɓo ɓeyekpe nya n nazayi n ɓaku mwa dna zafun. Ɓeyekpe ye ta gmi nanyi ye num, kwoi ta daɓo ga aza-yako anyi ye nya nu nɓa zhi ɓai miya nyim.

⁷ Eyi aɓeda zhin ɓeyekpe nya nu, ntuge ɓa kun n Shekwoyi aba nu, ɓai wu Shekwoyi shiri ɓeyekpe nya kwa lo yi na gmada eshe nya. Shiri ye ɓei bwi shi n sapa, ko da shike aɓo zhin ko ntu ya pma bwa ɓo nu kafin ma a zhin anyi.

⁸ Ama aza-yako anyi nya to ɓei kpe ce yem, ntuge ɓa ɓei gna ɓa kpe koye nu, ɓa to ɓei ɓa zun Dagayi mwa-mwa nya du m.

⁹ Nya nu n Littafi Gyi-gyi-yi kwa da cei ge zaho-zahoi to shin gye, ko wa wo, ko wa zhin ɓo nubo cei, enya Shekwoyi ku zhin shiri ntu naza ɓo nɓa yewo nyi m.

¹⁰ Ama yi kpe aɓeye yelo ntuge Shekwoyi la tnu n Wo Zafun yi Wa gna yi, owo Zafun zhin wa bi aba ya vinya, Wa wuyi asiri shin-shin-yi Shekwoyi nya.

¹¹ She zanyikoci zafun n ko dna womi nyi, oko gmanyi nu kpe wa ɓenubozhin ye, n lonu zaho-zahoi ta kpe Shekwoyi aɓo nubozhin yem, sai Owo Zafun gmanyi.

¹² Yi to gwo zafun anyi ye nya num, ya gwo Zafun n Shekwoyi nu, Wa wu yi anyaga amanai alheri nya n Shekwoyi ku ga yi nyi.

¹³ Ntu cenu aɓeda nʼya da vinya, Zafun Gyi-gyi-yi nu na gayi ɓa, aɓeda nu to n zanyikoca knim. Ntu cenu yi zhin apma n Zafun Gyi-gyi-yi aɓeda yi ɓa wu Zafun Gyi-gyi-yi aɓo n ɓahin yi.

¹⁴ Ama oza n wo to n Zafun yim, wo ta mi wa gwo anya n Shekwoyi Zafun gayim, ntuge wo ta kpe ɓa wyegam, ɓa zhin gboloyi nu n wa ba. Sai oza nwo Zafun Gyi-gyi-yi, wonu ɓa kpe Zafun Gyi-gyi-yi aɓo ye.

¹⁵ Oza wo n zafun yi wo zhin wa mwi aɓo vinya, wa ku ɓa kpeye. Oɓo nu kuwa nko dami nanyi da yi, ntuge wota kpe zafun-da ʼɓoyem – ko fyefye.

¹⁶ Wo ɓa mi wuna? Ntuge wo to zhin oza nu nwo shin Dagayi aɓonubozhin ye kpem ko wa daɓo Woyi, ko wa shin Shekwoyi bwa ashanje nwa duwa zhin mim. Ama eyi a Yesu viyi, yi n Kristi bugba yi shi lo n Wa ɓe nubo zhin yi.