Akorintiyi I 16 - Alkawali Woiwoyi

Zokwo Wu Kmaknayi

¹ Miɓa daɓo n saiye ntu agyi wye ɓo n fye ɓa yezhi fya ga Shekwoyi aza n ɓa fi n Yahudiya nyi. Tile nu fya zhin nya ma gna a ikklisiya Galatiya nya ge ɓa zhin nyi.

² N Ladiwyi doho-dohoi yi, zaho-zahoi ɓa kni agyiwye shi wa bwa n sun, wa so ɓa zhi ntuge esa ma ɓe cei, fye ta shan zhi ge fye ye agyiwye ho zhi m.

³ Esa ma ɓe cei, mʼɓei tnu nazayi n fye ye cei, miye la wasika ma ɓa ɓa lo nfye nyaga yi n Urushelima.

⁴ Ndei ma gye ko bmiya lo ma lo ce to, sai ɓa gnilo n miyi.

⁵ Mʼɓei ɓe fya ba mi-i la zhi Makidoniya, ntuge mi ye ma vi Makidoniya bwa nu.

⁶ Mi gye lo ngye nʼɓei la mwasa fyewyi nfyaba, kpekni har ma zhin vinyiko vinya, ofye nu ɓei ka mi bma zhin har mi ye lo aba nʼɓei kalo.

⁷ Mi to cei pma lo ma gye fye mi-i duduyam, ama mi na wyetu yi lo ma sunsa fyewyi nfyaba, n Shekwoyi wa ye.

⁸ Ama mi ɓa dnaya n Afisus kpa har Pentikos sa.

⁹ Abokunmi guguyi yalo ya n mwa pata n maba ntu tnutnu ɓo, ama anuwunyi lo ce n mwa begye.

¹⁰ Ndei Timatiwus wa ɓe fye aba, to, sai fya gwo wo abwa-baba ntuge wo zhin tnu-tnu ga Shekwoyi nu shi mi gyi fye wye, omazaje,

¹¹ fye zhin wyegbam, ama fye bma wo zhin ntuge wa gyi abye nwo zanyi har wa ɓe maba n bugbafuyi, ntuge mi shi wo ɓeɓe awye lo ɓedo nazaje yi.

¹² To, ntu eyi zado ɓo ngye Apolos, ma ku wye gyi wo nmwa n nabai waɓe fyaba ngnisun nazaje yi, ama ko to lo wo do wa ɓe n saiye m. Ama esa wa bwa esa cei, wo ɓa ɓe.

¹³ Fye ku zhi gu, fye ku mizhi n gaiciya ga mi, fye ku edna ya, fye ku kala dna.

¹⁴ Fye zhin ɓoho-ɓohoi vinya dna ye-ye mi.

¹⁵ Fye kpelo ge Istifanus n wo puwa yi, ɓanu ɓei kmi Yesu vi nabye n Akaya, ɓai pmi ɓaku ɓahin tukwo ga ntu Shekwoyi aza bmazhin ɓo, mi gyi fye wye, mi azaje,

¹⁶ fye zhin ɓo nɓa gna fye ge fye zhin, fya vi azaje ɓo nɓa zhin tnu-tnu ngye ɓa.

¹⁷ Adamilo n mwa ntuge, Sitifanas, Fartinatus ɓedo n Akaikus ɓaku ɓe ma ba, ɓaku tnu-tnu zhin n fye ɓei ɓa zhin nyi.

¹⁸ Ɓala awyeko gyimi ɓai gami agmada she ɓa ɓei zhin fye nyi.

¹⁹ A ikklisiya vinya n Asiya kni ɓa safya milo. Akila n Biskila yi, ɓedo n ikklisiya yi n ko yezhi n ɓa puwa nyi, ɓa safya mi lo n mwa dna Dagayi.

²⁰ Azaje vinya ɓa safye amilo. Fye ɓi azaje gna vinya n bwadodna gyi-gyi yi.

²¹ Mika deye n ma bwa yi nu. Omi, Bulus, mi ɓi fye gna lo.

²² Zaho-zahoi wo to ya Dagayi m, eknil tu lo n wo. Eyi Dagayi, ɓe.

²³ Alheri Dagayi Yesu nya ko sase kunsun fye yi.

²⁴ Omi ye-ye ko kun-sun nfyei vinya dna Yesu Kristi. Amin.