Akorintiyi I 15 - Alkawali Woiwoyi

Nabari Manayi Tukwo

¹ Nsaiye dei mi cei pma ma cefye ɓepa Nabari Manayi nya n mi ɓei zhin fye kwo waʼazi nyi, fya gwo ko, ofye gaiciya-gai mitu n konu nyi.

² Nabari Manai ye nu ɓa gni fye, fyei ya gyi abye nko bwashi yi kam-kam, sai dai ngye fye to ɓo shin gaiciya manai nu ga n kmisunyim.

³ Nʼɓo ku gna fye pei-pei, tunyi n kmisunyi, ngye she mi ɓei gwo kwo nge Yesu ɓo lafi ntu yi alaifi ɓo, she littafi ceida

⁴ Aɓo lawo bi, ama dna nyipyei tahi wa laka n vingwo shi a cei kafi n Littafi nwo tukwo.

⁵ Wa wu wohin tukwo n Bitrus aba, n na vun nwa bara awo-cei-aba aba.

⁶ Wa pmi Wa wu wohin tukwo nwa viyi aba aza n du tagyi gnu-atnu (500) ya n sagmanyi yi, n mwa begye nɓami ye wyewyeyi lo, ama azaho ku wangye n ɓami.

⁷ Nsayi wa wu wohin n Yakubu aba, n navun deye nwo atnu-tnuyi aba vinya.

⁸ Nnavun kmasun vinya, Wa wu wohin tukwo n ma ba, sai ho gna oza n na mawo esai ye kwa duya.

⁹ Ntuge minu zhin oza gbagbayi dna na bara vinya, mii to kunce lo ayi mi ge owo baram, ntuge maku Shekwoyi ikklisiya dna na zhin gye n mwa.

¹⁰ Ama dna Shekwoyi alheri, mi la ze nya miɓa ze, alheri kuwa nwo ɓei gami nyi ko to ze gboloyim. Mi ku tnu-tnu zhin n mwa n du atnu-tnuyi aje vinya, kwo shi kwo nyi emi ɓo zhin nu tom, ama Shekwoyi alheri nu ɓei lo tnu-tnu dna mi mi.

¹¹ To, kwo koi gmi n maba nu, kwo koi gmi n ɓa ba nu, waʼazi Nabari nya nu n ya zhin fye, fya ga ko gaiciya lonu.

¹² Tunda yi zhin waʼazi lo ge Yesu ɓo la laka n vingwo, knihin nu zhin azaho nfye mi ɓai cige azafi ta kukala ma?

¹³ Ndei ɓedaye zhin gaiciya nu, to ko wu nu ge Yesu to laka n vingwom.

¹⁴ Ndei Yesu to ɓei lakalam to, eyi waʼazi zhin gbeloyinu, efye gaiciya ga ce ko zhin gbeloyi nu.

¹⁵ Ai eyi a waʼazi zhin-yi ku ze a zakata Shekwoyi anya, ntuge yi ku da ge Shekwoyi ɓola Yesu lakala n vingwo to woi gowo kalalalam, ndei ɓeda ye zhin gaiciya nu ge azafi ta kukalam.

¹⁶ Ai ngye ato ɓei ku azafi kalan, to agye Yesu to ɓei lakala nu m.

¹⁷ Ngye Yesu to ɓo laka lam, to ofye gaiciyaga la ze gbeloyi, har saiye fye ye zhin aza bwi-bwiyi nu fi nfya laifi mi.

¹⁸ Kwa wu nu ge azafi n ɓa ɓei zhin ɓai vi Yesu nyi, ɓa to n pwo-pwoi lo cen.

¹⁹ Ndei eya wyetu n Yesu bwasun lo n nanyi ye nu kawai, to yi zhin anya sunsun nya nu n mwa n naza ba n nanyi ye.

²⁰ Ama gaiciya nu ge Yesu la lakala n ʼfi. Deye kwa wu nu ge wola ze kmisunyi n naza mi nɓa ɓa kukala n ʼfi nyi.

²¹ Ngye shi efi ɓei ɓe kwa vi zaknayi zokwo, n kasun lonu kalaku na vingwo ɓa bwa n zaknayi zokwo nu vi (wato Adamu n Yesu yi.)

²² Zaho-zahoi fi ntuge yi pa bye n Adamu nu vinya. Owo laifi ko vi zaho-zahoi. Ama zaho-zahoi nwa yeto Yesu, wo ɓa je kalala

²³ Ama zaho-zahoi n wo sayi, Yesu nu ɓo ya kalala, she Yesu ɓei jezeɓe n sayi aza vinya nɓa vi wo ɓa ɓei je wyewyei bwa.

²⁴ Nsayi esa kmaknayi ɓa ɓe, esa nu Yesu ɓei ga ebe n Dada Shekwoyi akun, woi ku nasara zo zhin tu na nuwunyi doho-dohoi pya.

²⁵ Ntuge ko zhin tile nu Yesu gyi be, sai wo ku wa nuwunyi vinya zofi n wa pita sinta.

²⁶ Nuwunyi kmaknayi nwo ɓei du ko ɓoya ko nu zhin efi.

²⁷ Ntuge littafiʼa cige, “Shekwoyi ku anya fi vinya n wa pita sinta.” Yi kpe lo nu ge Shekwoyi to dna lo n kun m, ntuge Owo nu na fi anya vinya n Yesu apita sinta.

²⁸ Ama esanu anya vinya ɓei kufi n Yesu ʼbe sinta, Owo n wohin tukwo Shekwoyi Nugun, wo ɓei dna wohin n Shekwoyi ye gyi ʼbe tu nanya vinya tukwo.

²⁹ To, azayi na zhin ɓa batisma tu na zafi ɓo nyi ma? Ɓa cei pma ɓa bwa kninya? Ndei ko zhin gaiciya nu, shi ɓa da nyi, nge azafi ta kukalam, to knihi nu zhin ai zhin ɓa batisma ntu na zafi ɓoʼa?

³⁰ Eyi nʼyihin ce, knihi nu ɓa zhin ya la ɓa yi zhin azhin n ʼYihin mafi lonu ci-ci a?

³¹ Oma-zaje, mi zhin ma gundo n ʼfiyi fyegyi-fyegyi. Mi daɓoye ntuge mi n ʼgbegyi yi lo n fye tukwo dna Yesu Kristi.

³² Kni-apmai nu lo dna n gusun na nyawannyawan yi shi anugbai zhin dna n Afisusu mi–nge gye za bwaye wa gmiye dna naʼnyi ye na? Ama ngye kalaku tolo n ʼfin, to, “Yi wu ya gyi yi sin, efyeagyi yi fi,” shi aza da.

³³ Fye to ku ze aza gbolo m, “Anugundo nukwoi zhin ɓa wun aza manayi ya.”

³⁴ Fye lo fyehin hankali, fya zhin ɓefyece, fya fa laifi. Mi da deye fya wo vinyiko nu, ntuge azaho nfye mi ta kpe Shekwoyi ye lom.

Eyi Anayi Woiwoyi

³⁵ Zaho ɓa nyage, aza-fi ɓa mi ɓa bwa wye-wyei njesun wuna? Ɓa jezeɓe n kni nayi pya ya?

³⁶ Oza gbolo, esanu ho bye nyabye dna nkni, woi-woyi ta gye bmim, sai kokoi la fi kpa.

³⁷ Nya ho bye nyi kuwa ho ta pma nayi nu bye n ko zhin kwa pa nyim, sai nyabye kawai nu n ho yadna nʼkni, ko ewyi byegye, ko nyabye ho pya nu.

³⁸ Shekwoyi zhin wa ga nyabye yi nayi shi wo cei pma, wo zhin wa ga nya bye doho-dohoi nayi gbo n nyabye do yi.

³⁹ Anyawye-wyeyi nayi to wu gmanyi num. Azanyikwoci n nayi gmanyi anya-fanya n ɓanya yi, awyisala n ɓanya yi kasun.

⁴⁰ Anayi eshe nyalo, anayi anyi nya lo jesun, bmiya-bmiya anayi eshe nya wu gbo n bmiya-bmiya anayi anyi nya yi.

⁴¹ Nyipyei nko nabmiya yi lo, epya ce nko nyayi wu gbo, akpasu nɓa nyai lo kasun; ko dna na akpasu mi, ɓa n nabmiyai du aje.

⁴² Kwo ɓei wu layi nu esa na zafi ɓei kuka n cei nyi, nayi na bi nyi, ko zhin boboi nu, she ko ɓei laka, efi ta shan ko gye aigna ko bom.

⁴³ A bi ko dna n wyegbaci ntna kala jesun, ese ko ɓei lakala, ko ɓei laka dna latu nu n kalai jesun.

⁴⁴ Esa na bi ko cei, ko zhin nayi abu nu. Esanu ko ɓei laka, ko ɓei laka dna n nayi zafun nya nu. Ngye shi nayi abu nya lo nyi tile nu abwa nayi zafun nya.

⁴⁵ Ntuge Litafi ku da ge, oza kmisunyi Adamu ɓo ze wye-wyeyi da; ama Adamu kmaknayi wo nu ga wye-wyeyi zafun nya.

⁴⁶ Zafun nya nu to ɓe na bye m, ama nayi nya nnavun nu zafun nya kma ɓe.

⁴⁷ Adamu kmisunyi azhin wo nʼkni nu, butukun nya, ama Adamu bayi wo gmi nʼshe nu.

⁴⁸ Zanyikoci doho-dohoi n nayi wu ngye Adamu nya n na zhin ko nʼkni butukun nya, ama oza n wa ze Kristi nya, wa bwa wo nayi pya nayi nko gmi nʼshe.

⁴⁹ Ngye shi yi wu ngye oza na ɓei zhin wo nʼkni nyi nlo nu yi ɓei wu ngye oza n wo gmi n ʼshe nyi.

⁵⁰ Oɓo mi gna fye, emazaje, nayi nami yi ko ta gye Shekwoyi bemi wyem. Eyi anayi aboboyi ye nu to zhin a nyalo-nyalo nyam.

⁵¹ Fye wo asiri ye, eyi vinya nu ta fim, ama aɓei shan yi do vinya.

⁵² Kwo ɓei wu para nu nʼwye kpata yi, ai ku mwayi kmaknayi bye. N mwayi ho byebyeyi, a Yesu viyi n ɓa kufi, ɓa ɓei kukala n na nayi shandoshan-shan yi n ɓa ta shan fim. Eyi ce nʼyi ɓei cezhi n wye-wyeyi nyi, aɓei shan yi anayi do n sagmanyi yi.

⁵³ Ntuge eyi anayi nʼyi cei lo n saiye nyi, ɓa zhin afifiyi nu. Tile nu ɓa bwa doshan, nʼnayi eshe nya yi, nko ta shan fim.

⁵⁴ She ko ɓei ku zhin lonu, dna nʼsayi nu n Littafi ɓeda ɓei nu nkwa cige, “Aku nasara gyi tu nʼfi tukwo.”

⁵⁵ O efi, oho nasara gyi gni na? Efi, oho iko wu-wu nya gni na?

⁵⁶ Efi bwa ko iko ʼzawu nya n laifi nu, laifi kwa ko bwa iko n owa nu.

⁵⁷ Ama yi zhin Shekwoyi godiya n wo gayi nasara dna Yesu Kristi nyi.

⁵⁸ Ntucenu, emazaje yeyeyi, fye ku gni mizhi dai-dai. Fye gyi abye n Shekwoyi tnu-tnu yi nʼwyei nyice, Shikonyi fye kpelo ge efye tnu-tnu dna Dagayi ta ze gboloyim.