Akorintiyi I 13 - Alkawali Woiwoyi

¹ Kwo mi-i mi, ma daɓo n nabyei gbo-gbo har n na malaika nya yi ɓe, ama mi-i to n yeyei lom, mi la ze ngye sugu wyiɓeyi, ko eshan bwiciyi kawai.

² Ko mi-i iko yi ngye anabi mi-i kpe ɓeye nko ye ɓeɓelo kwa zhin, ko mi-i n yekpe anyi nyai vinya har mi-i kmi asiri anya-ya; ko mi-i n gaiciya ga yako yi har ma mi ma daɓo n ʼpe yi kwa shanba, ama ndei mito n yeyei lom, mi to zhin nyaho num.

³ Ko mi-i ku mi nyabwa yaga vinya agna awyekoyi, har ma ga mi nayi ntuge a gyi ko ʼna ɓedo, ama mi-i to n yeyei lom, ko la ze ɓo gbolo.

⁴ Yeye n bugba-bwa yi, kwoi na tnazhin-yi mwa. Yeye ta wo ʼshem, ko ta mwi kwohin ʼzayi, ko kwa la kwohin tum.

⁵ Yeye ta zhin ɓo ntna hankali m ko ta zan kwohin tukwo nya shin m; ko ta pye n minagyi gyi yim.

⁶ Yeye ta wo agmada ntu ɓenukoyi ɓom, ama ko zhin kwa nya agmada ntu gaiciya ɓo.

⁷ Nʼho ye za, ho ɓa viwo ɓeye komi nko nako yi; ho ɓa gawo gaiciya n naɓo vinya; oha wyetu lo nʼwo; hoi ɓa bwa atna n ʼwoi n ɓeho-ɓeho yi.

⁸ Yeye ta shan zon. Anabi ɓeda ɓa duya; ɓeda n na nyitalai gbo-gbo du ɓa ɓa diya; Ko ɓeyekpe nu, ko ɓa duya.

⁹ Ntuge nʼsaiye, yi kpeye lo kpe nʼshe-she nu, du na nyaga ɓeyekpe yi n na ɓeda kpeda nya yi, ɓa to shince lo n kni yim.

¹⁰ Ama shi aɓei ku yi ze nunuyi anya ga atna nuyi ye, ɓa ɓa duya.

¹¹ Esanu mʼɓei zhin oɓi nyi, omi ɓeda, oma ɓenubozhin yi, nʼma ɓezhin-zhin yi vinya ɓa ɓei zhin ɓinai nya nu. Ama nsaiye mila zhin zadnagmai, ntuce nu mi ku ɓinai aɓo ya.

¹² Nlonu, nya yi gyelo nʼsaiye, yi kpawyega tu n Shekwoyi tukwo nyi, ko wulo duru-duru ngye shi oza zhin wa gye wohin duru n maganyi cegyeda nyi; ama n wyihoi yi ɓa gye Wo pei-pei shi Wo nyi dna Wo nunu-ntuge Wo ɓei ce yawye yihin yi ce Wawye. Oɓo mi kpeye lo nsaiye, mi kpeyelo kpe nʼsheshe nu, ama n wyihoi, mʼɓei kpeye n shince nʼkni yi, n nunuyi njesun ngye shi Shekwoyi kpe miye lo n nunuyi nyi.

¹³ Nsaiye dei aɓo ngnu-ata nu mizhi lo-oɓa nuzhin; gaiciyaga, awyetu, n yeye yi; nya ko dulo vinya, ko nu zhin yeye.