Akorintiyi I 12 - Alkawali Woiwoyi

Anyaga Zafun Nya

¹ Nsaiye, omazaje, mi cei pma ma daɓo to na nyaga Zafun Gyigyi-yi nya ɓo. Mito cei pma lo fya fi nko wyegma m.

² Fye kpelo ge, esa fye ɓei ye zhin a shetan-da nyi, fye ɓei zhin fyei vi ashan nu n ɓa ta kpe ɓedan, ɓai wu fye zokwo nukwoi.

³ Ama fye sun lo n na zai n ɓa yi ɓahin lo ge Shekwoyi Zafun nu wu ɓa ɓo nɓa da nyi. Fye ɓa kpe wuna ge ɓa zhin a Shekwoyi nya nu ko aza kata? Fye ɓa kpe ɓaye lainu. Zaho-zahoi n Shekwoyi Zafun kun-sun lo woi, wota mi wa cige, “Yesu zhin knitu yi nun.” Zahoi ta mi wa cige, “Yesu zhin Dagayi nu,” har koi kufi nwomi lonun, akpe ge Zafun Gyi-gyi-yi kunsun woi.

⁴ Anyaga lo gbo-gbo, ama Zafun gmanyi nu gaɓa.

⁵ Azokwo lo gbo-gbo, n na zhin bauta ama Dagayi gmanyi nu n na zhin Wo bauta.

⁶ Atnu-tnu lo gbo-gbo, ama Shekwoyi gmanyi nu lo tnu-tnu n naza mi vinya.

⁷ Zafun Gyi-gyi-yi zhin Wa wu Shekwoyi iko n zaho-zahoi mi ntu naza vinya a pma ɓo.

⁸ Zafun ga zaho ɓeda wyemwa nya (genyikpe), zaho kwa wa bwa nyaga ɓeyekpe, nya nu, du Zafun gmanyi nu ga ɓa.

⁹ Zafun gmanyi nu ga zaho gaiciya-ga zaho gaiciya-ga zaho kwa wa gawo iko wa ka anyasan gna.

¹⁰ Zafun ga zaho iko wa zhin aɓo wowoyi, zaho kwa wa bwa waʼazi zhin gba. Zaho wa bwa iko wa kpe ko a zafun nukwoi nu daɓo n naza gbe n ɓa yi ɓahin ge ɓa da Shekwoyi ɓeda nyi, ko kwa zafun Shekwoyi nya nu ku ɓeda n ɓa gbe. Zado jesun wa bwa iko ɓeda nya dna na nyitala gbo-gbo nʼwo to shin ɓa mwitu m zado kasun wa bwa iko anyitala bmapmi nya.

¹¹ Ama Zafun Gyi-gyi-yi gmanyi nu zhin aɓoye vinya, Woi gna anyaga ye n naza ba shi Wo wyewyeyi cei pma.

¹² Eyi anayi na gai lo mwa begye, ama n na ye agayi ɓedo vinya, ɓa zhin nayi gmanyi nu. Kristi wulo lonu nu.

¹³ Zaho-zahoi nʼyi mi wo zhin oga nu dna Kristi nayi. Azaho nʼyi mi a Yahudiyi nu, a zaho a Helleniyi, azaho zhin afyenu nu, a zaho kwa a loloiya nu. Ama Zafun Gyi-gyi-yi kuyi zhin batisma fi n Kristi nayi gmanyi, ai la Zafun Gyi-gyi-yi ho gayi n naba gmanyi.

¹⁴ E, ntuge nayi to bwasun nʼgai gmanyi nun, ama n na gai mwa begye.

¹⁵ N pita cige, “Shi konyi mi to zhin obwa nun, mi to dna lo n nayi mi m,” deye ta du kwa gmi koya n naga nayi nya m.

¹⁶ Ntnubua cige, “Mito zhin ewye num, mi bwa tnubua nu zhin, ntu cenu mi to dna lo n nayi mim.” Ashe deye ɓa zhin kwa gmiya n na ʼga nayi nya?

¹⁷ Ashe nayi vinya ɓo zhin ewye nu, atnubua ɓowo lo numa? Kwoi ɓo zhin tnubua yako ho nu vinya, a wo a bua-sin wuna?

¹⁸ Ama shi ko nyi, Shekwoyi ɓei fi a ga doho-dohoi n ɓa aba shi wo ye cei.

¹⁹ Ogye nayi wuwuna nu, Kwoi ɓei ngai bwasun lo gmanyi nu a?

²⁰ To, ama wo ku aga zhin mwa begye, ama nayi gmanyi nu.

²¹ Ewye ta ci obwa ge, “Mi to ha pmai lom,” Tukwo ta ci apita ge, “Mi to fya pmai lom.”

²² Ɓehin-hin, aga nʼyi ci ɓa wyegba ntu ɓa kala gbaɓo, ɓa gna sun napmai mwa.

²³ Ado yi gye ge ɓa to zhin nyaho nu m, oɓanu n yi wan kna du, ado kwa nɓa zhin a vinyikwo nya, ya ku ɓa so naza wyeba,

²⁴ atna vinyikwo nya kwo n ɓa wu bmi pei-pei, yi to damu n ɓa knawan ɓeyim. Ama Shekwoyi la nayi ye ɓedo n ʼgbai n nabai ge aga n ɓa to kunce lo ɓa bwa aknawan daidai.

²⁵ Kwo nu ɓe n bwa doloyi n naga nayi nya, ɓai wanje akna shi ega doho-dohoi wan kohin akna nyi.

²⁶ N nyasan san oga gmanyi, aga je vinya ɓa gye azhin n gnisun kwoi. N ʼga gmanyi a bwa latu, aje ɓa ce nyi, ɓa dagma n kunsun kwoi.

²⁷ Ofye vinya fye zhin Kristi nayi nu, zaho-zahoi zhin oga nu nko mi.

²⁸ Dna ikklisiya kwa, Shekwoyi ku aza zhin fi nko mi, kmisunyi a Nabari tnutnu loyi, bayi a anabi-a waʼazi zhinyi, tahi n nyawuyi; sai ɓewowo zhin-yi, aza kagnayi, aza bmazhin-yi; aza n ɓa ɓa mi ɓa gyabye nazai ɓa zhin tnutnu nʼgbei lodo, n nazai n ɓa da anyitala gbo-gbo.

²⁹ Zaho-zahoi zhin Nabari tnu-tnu loyi nu? Nge awo. Zahozahoi zhin waʼazi zhin-yi nu? Awo. A zhin anyawuyi nu vinya? Zaho-zahoi n ikoi lo wa zhin aɓo wowoyi?

³⁰ Ko wa ka anyasan gna? Ko wa da abye gbo-gbo to woi tuɓa mwi n? Ko zaho-zahoi nu ɓa mi wa wo ʼza woi daɓo dna nyitala-woyi, har wa go ko gna ʼza to woi shin ko won?

Oɓo Nko Du Vinya Nanyi

³¹ Awo, ama fye yi fyehin fya zan nyaga Zafun nya duduyi nu shin. Ama dei, miɓa wu fye zokwo nko gnaɓa bmiya lo vinya!