Akorintiyi I 11 - Alkawali Woiwoyi

Anyikwo Ɓeda

¹ To, fye vi ma pita bwi, ngye shi mi vi Yesu anya nyi.

² Mi ci fye lo ntuge fye pa mi ɓo lo cici fyei zhin ɓoho-ɓohoi she ma wufye.

³ Ama mi cei pma fya kpe ge, Yesu nu zhin zanugbai doho-dohoi tukwo. Nyikwoza tukwo ce zanugbai nu; Shekwoyi nu zhin Yesu tukwo n kasun.

⁴ Ntuce nu zanugbai doho-dohoi nwa zhin aduwa ko waʼazi n tanjiyai kun n wo tukwo, to, wo ci Yesu nu wyegba.

⁵ Nyikwoza doho-dohoi kwa n wa zhin aduwa, ko wa zhin waʼazi gni nazaba to wa pui wo tukwo nya m, to, wo ci wo ɓa nu wyegba. Wo to shando lo n nyikwozai n wo la wo tukwo wun vinya n na pmi yim.

⁶ N nyikwoza ta pui wo tukwo nya m, to wola wo tukwoyi gbeya. Ngye ko zhin oɓo vinyikwo nya nu n nyikwoza ba wa kma wo tukwo ya, ko wa gbe ko ya, to, sai wa zhin wa ku ko wan nya.

⁷ Ko to bmiya lo zanugbai wa pui wo tukwo nyaho m, ntuge wo zhin Shekwoyi dogbei nu n wo latu yi ɓe. Ama nyikwoza zhin zanugbai latu nya nu.

⁸ Ntuge zanugbai kmisunyi to ɓei gmi n nyikwoza nun, ama aɓei gmi nyikwoza kmisunyi n zanugbai nu.

⁹ Njesun ato ɓo zhin zanugbai ntu nyikwoza ɓo nu m, ama aɓei zhin nyikwoza ntu zanugbai Bo nu.

¹⁰ Kwo bmiya lo nyikwoza zhin wa wu ge wo dnalo zanugbai sinta, njesun ge kwa da amalaika.

¹¹ Ama pa ge dna n Dagayi shiri, nyikwoza n zanugbayi, ɓa ta mi n tna ajem.

¹² Ntuge shi a ɓei gmi nyikwoza n zanugbai nyi, njesun lonu nyikwoza nu zhin wa ma zanugbai, ama anya vinya kun n Shekwoyi aba nu.

¹³ Fye mwi ko nfyehin tukwo fya gye, ko bmiya lo nyikwoza wa zhin aduwa gni naza ba n tna alufuta wan yi?

¹⁴ Kwo kunnu n kohin tukwo kwa wuyi ge, ko zhin oɓo vinyikwo nya nu n zanugbai aba, wa ya tukwo tu cim n tna wun yi.

¹⁵ Ama ko zhin nyikwoza mwa-mwa nu, n wo tukwo-yi mwakpa, ntuge a gawo ko lonu kwa ze wo nyapui nya nu.

¹⁶ Ama ngye zaho cei pma lo wa gni-aɓona da ce, to, enya miɓa da konu nyi; nge yi ta shan kunnu doho wulo gbo-om, sai dai ge nyikwoza ku wo tukwo wan alufuta esa nwo ɓa zhin waʼazi ko aduwa cei dna naza begye. A ikklisiya Shekwoyi anya vinya nkoi bwa shi lo lonu nu.

¹⁷ Ama enya mi ye mada n saiye nyi ko to zhin cici nu n fya ba m, ntuge ofye yezhin na duwa nyakun ta bma zhin lo m, sai koi wun-wun ya.

¹⁸ Oɓo kmisunyi, a gnami lo ge ajegna lo nfya tasin sanu fya yezhi cei. Ɓeye konyi, ma pwoko gaiciya ga.

¹⁹ Ama ko bmiya lo ajegna lo fya tasin, ntuge aza ɓa fi lo n gaiciya, a kpe ɓa ye pei-pei.

Aɓonya Tu Dagayi Nyagyi Ɓo

²⁰ Esa nu fya ye-zhi n na ba gmanyi fya gyi, fye ta gyi Dagayi nyagyi num,

²¹ ama ofyehin nya. Ntu ge aku gna mige esa fya ɓe nyagyi cei, zaho-zahoi wo wo nyagyi ɓo nu wa ya safi wohin nce azaje-ya, har azaho ɓa tna nyagyi ɓai ci mikun, azahoi ce ɓai gyi ɓai sin n duwyi.

²² Fye to na puwai lo nfye ɓa gyi fyei sin? Ko fye gna ye lo fya ci Shekwoyi puwa wyegba, fyei dna aza vinyikwo n ɓa to cei lo nyi ma? Fye gye ge miɓa da ge na n ɓeye tukwoʼa? Mi ci fye nu? Ko fye-fye, mi ta ci fye lo m.

²³ Ntuge n Dagayi aba nu n ma gwo wu-wu ye n mi kafye wu nyi. Nge dna sukwo nna ɓei kun Dagayi Yesu nyi, Wa la bredi,

²⁴ Wa zhin Shekwoyi godiya, Wa sa ko ya, Wa Cige, “Omi nayi nu nyi, n na ga ntu fye ɓo. Fye zhin ko ntu Mi ɓopa ɓo.”

²⁵ Njesun lo nu wa la kofi ai ku nyagyi gyi, wa cige, “Kofi ye, ko nu zhin Shekwoyi alkawali woi-woyi dna Maʼmi. Saho-sahoi nfye ɓa sin ko cei, fye zhin ko ntu mi ɓo pa ɓo.”

²⁶ Ntuge saho-sahoi ya gyi bredi ye cei, yi sin n kofi ye, yi gna Dagayi efi nabari nu mi har Wa ɓe.

²⁷ Ntuce nu, zaho-zahoi wa gyi Dagayi bredi ye, ko wa sin n wo kofi dna zokwo, kota gawo mwa-mwa m, wo zhin Dagayi nayi nu n Wa ʼmi yi laifi.

²⁸ Ntuce nu, zaho-zahoi wo mwi wo-hin kpa wa kpe bredi ye gyi, woi sin n kofi ye njesun.

²⁹ Ntuge ʼza wa gyi bredi yi, woi sin n kofi yi ntna wohin mwi yi, to woi pa Yesu nayi ɓo n kwa pma yin, to, wo gni Shekwoyi owa kpe wohin tukwo nu. Ntuge wo kpagye nu n Yesu fi ɓo yi.

³⁰ Cenu zhin azaho n fye mi ɓa zhin anyasan-yi nu, a kala-gba-yi, har azahoi fi.

³¹ Ndei yi ɓa mwi yihin tukwo kpa, ata shan yi kni zun nʼwa yim.

³² Ama sa n Dagayi dayi ʼwa Woi ta yi, Wo zhin lonu n nabai to aɓei zun yi kni ɓedo na ʼnyi yi nun.

³³ Ntucenu oma-zaje, sanu fya yezhi ntuge fya gyi Dagayi nyagyi, fye zhin fya ku pmi aje.

³⁴ Ndei mikun gnu zaho lo, to, wo ku nyagyi pmagyi n wo puwa ntuge to wa lo Shekwoyi ʼwa esa fya yezhi ceyim. Aɓo ɓa celo, mʼɓei zhin ɓa zhi miyi la ɓe.