Akolosiyi 3 - Alkawali Woiwoyi

Fye La Eshe Bo Shi Nabye

¹ Shi fye ɓei bwa wye-wyei n jesun, esa n Kristi ɓei laka n efi nyi, fye la awyetu, nwo nyabwa yakwo, n na gmadayi eshe nya, aba n wo sase tu lo n Shekwoyi bwaizhebwa, n she n mwa-mwai n ikoyi nyi.

² Fye zhin aɓo nubo nu n ɓa lo eshe, fyeto la esa n mwa n na anyiɓonubo zhin yin.

³ Anyiɓo to fi fye pwan, ngye oza n wo lafi. Ofye wyewyeyi hin-hin lo n eshe n Kristi yi ɓedo n Shekwoyi.

⁴ Esa n Kristi nwo zhin eyi wye-wyeyi hin-hin, wa jezeɓe fye ɓei bmiya na fyei bwa owo mwa-mwa.

⁵ Fyeku aɓo anukwoyi anyi nya ya, fye ku aɓo anukwoyi wu n ɓa fi n fyemi nyi, fye la abwa kun n na anagbai zhi, cegye, shakpe n na aɓo pwawo vinyikwo nya yi, fyeto gyi anya manayi anyi nya wyen, gama deye kwo zhin shangba nu.

⁶ Shekwoyi minagyi tulo n na aza, n ɓa zhin aɓeye pya nyi.

⁷ Fye ɓei zhin fyei zhin ɓa esa n fye ɓei zhin anyi nya nu nyi.

⁸ Ama nsaiye, esa la si n fye ɓa kma anya gye ya, fya kma jekpe kwo-kwoyi minagyi nya ya, nbmi-bmiyi, akmi, na ɓeda kasayi.

⁹ Fye to ce akata fi ajen, ofye wyewyeyi kwo-kwoyi nu ɓei zhin kwoi zhin lonu, nsaiye kwo la fi.

¹⁰ Nsaiye fye se ase woi-woi nu, kwoi tu ɓemana mwi ci-ci, kwoi zhin atna kwa wu ngye Kristi, n wa zhin wyewyeyi woi-woi n efye mi nyi.

¹¹ Dna n wye-wyeyi woi-woi ye, oza ekni, ko ilimi, ko oza masei kwo to zhin nyaho nun, anya gye vinya to zhin nyaho nun, ndei oza n Kristi yi lo okwo nu zhin nyaho, woi gni n na aza ɓonu vinya.

¹² Tunda Shekwoyi la fye kni, n wa ga fye wye-wyeyi woi-woi nyi, ntu n wo ye-ye lolo yi ɓo n fye aba, fye tu sun-sun-gye mwi, n bugbafuyi n na azaye n cei. Fye to damu n ɓei n ɓa ɓa dan, ama fye sin wahala dna n na atnazhin n hakuri yi.

¹³ Fye zhin peceye fyei zhin shiri fya zhin aza gafara. Fye to shi za n fye min, fye pa ge Dagayi n ku gafara zhin fye, ntucenu tilas fya zhin azaje gafara.

¹⁴ Nkwo sin vinya, fye fa ye-ye kwa gyi be n ofye awye-wyeyi nlonu ikklisiya vinya ɓa sase nbugbai gmanyi.

¹⁵ Fye fa bugbafu n kwo gmi n Kristi aba nyi, kwa dna n fye abugbami cici, gama efye tnu-tnu nyi n fye sai n fye zhin owo nayi aganyi. Fyei zhin godiya cici.

¹⁶ Fye pa enya ɓo n Kristi ɓei wu nyi, fye fa owo aɓeda kwa dna n fye abugba mi, kwa ce fye. Fye wu fye azaje, fyei kwo ɓa n zabura yi, n anyi zafun nyayi, fyei kwo anyi ga Dagayi n bugba dayi.

¹⁷ Enya vinya n fya zhin kwo fya da, fye fa kwa ze wakili Dagayi Yesu nya, fya ɓe n gnisun n woi n Shekwoyi Dada abye fya zhin wo godiya.

Jedoɓe Manayi

¹⁸ Ofye anyikwoza, fye vi efye aɓa ɓo gama nyanu n Shekwoyi wa zhin shiri ga fye.

¹⁹ Ofye azanugbayi tila fya ye n fye anyikwozayi, fyei wuɓa alheri, to fya gyi minagyi nɓai, ko fya wun bugba n ɓa yin.

²⁰ Ofye aɓi tilas fya vi ofye azakwoyi ɓo–efye adada n efye ayai–gama deye kwo da Shekwoyi agma.

²¹ Adada, fye to wun efye aɓi bugba, har bugba bma ɓa ya m, ɓa fa kukari zhi ɓon.

²² Efye afyenu tilas fya vi efye adagayi anyi nya ɓo to fya zhin atna fya zhin oɓo n kwo daɓa ɓai zhi nu gmanyin, ama fye vi ɓa ɓo cici, ntu n fye Dagayi ye-ye ɓo n fye n cei pma fya dawo bugba nyi.

²³ Fye zhin tnu-tnu n kalayi n bugba bui-buyi n esa yi vinya, n gye fye zhin Dagayi tnu-tnu nu to ge ngye efye adagayi nyan.

²⁴ Fyei pa ge, Dagayi Kristi nu ɓa gba fye ta, woi ga fye anya vinya n wo cei. Owo nu nfye zhin wo tnutnu.

²⁵ Nfye to la fyehin yin, wo ɓei gbafye n nya yi n fye to n cei pman, gama wo ta kni oza kni-kni n na awa daban, n oza ɓa laka ai dawon.