Akolosiyi 1 - Alkawali Woiwoyi

¹ Wasika ye gmi n Bulus akun nu n Ti-matawus yi, aza n Shekwoyi wa kni ɓa, ɓa ze Yesu Kristi a tnutnuyi.

² Kwoi lo eyi azaje aba a Yesu viyi, Shekwoyi aza n ɓa fi n Kolosi zhimi nyi. Fa Shekwoyi eyi Dada wa tu fye anabarka wa nu fye n wo bugba fu dnagmayi.

³ Esa vinya n ya zhin aduwa ntu fye ɓo, yi zhin ya zhin Shekwoyi eyi Dagayi Yesu Kristi Dada godiya.

⁴ Gama yi ku wo, shi fye kpema Dagayi n jesun shi fye ye owo aza n sun.

⁵ Fye pmi agmada eshe nya nu, tunyi esa n na ɓei kmi fye waʼazi nabari manayi nya zhin nyi.

⁶ Nabari manayi n kwo ɓei ɓe fye abanyi, kwo laɓa lo n na anyi kwoi shan aza wye-wyeyi do. She ko ɓei shan fye nya do nyi, tunyi ewyi n fye ɓei wo, fya gane n Shekwoyi alheriyi n na alaifida aba.

⁷ Abafras, eyi za yeyei, tnu-tnu kunzhin yi, owo nu ɓei ɓe fye n Nabari manayi yei. Wo zhin Yesu Kristi fyenu gbenuyinu. Wo lo woi bma yi zhin n ya nfye maimako.

⁸ Owo nu na gnayi ye-ye dnagmayi ɓo, nfye cei lolo n na azaje aba nyi, n Zafun Gyi-gyi-yi wa ga fye nyi.

⁹ Ntucenu, tunyi ewyi n yi ɓei wo of ye ɓo nyi, yi zhin aduwa ga fye lo, yi nya Shekwoyi nge wo bma fye zhin, fya kpe enya ye nwoln cei pma fya zhin, yi nyawo wa ga fye ce-ce dna n zafun zokwo.

¹⁰ Yi nya wo n na abai efye asese ɓa da Dagayi agma kwa la wo tu, n na bai nfye ɓa bwa ɓe manayi zhin, fyei zhin aza ɓe manayi, fya tumwi fya kpe Shekwoyi ye lo abye-abye.

¹¹ Yi zhin aduwa n jesun, wa nu fye n wo kala yi n mwa-mwa n na bai fya gyi abye ko knidonu yi na zhiʼa. Fya ze nu-nu yi n Dagayi agmada yi cici.

¹² Yi sa Dada ami n tu ge wa zhin yi, yi ku kunce ya bwa anya awo-woyi, n ɓa zhin aza nya n ɓa fi n buzangna ebemi nyi.

¹³ Gama wo la yi kun n wyegma n Shetan ebemi, woi fiyi n wo Nugun ye-yeyi ebemi.

¹⁴ Nwa siyi n wo amiyi, wa zhin yi alaifi gafara vinya.

Latu Ntu Nya Ɓo N Kristi Ku Zhin

¹⁵ Kristi nu zhin dogbe Shekwoyi nya, n na ata gyewye nyin. Wo ɓei nyi tun to Shekwoyi zhin nyahonyaho yin.

¹⁶ Ɓehin-hin, Kristi nu na zhin anya vinya n ɓa fi n ʼshe mi n anyi miyi, anya n yi gye n na anya yi n yi ta gyen. Anya, a zafun nya n kwo asuyi, n na abemi yi n kwa iko dayi. Vinya Kristi nu na zhin ɓa n tu wohin latu ɓo.

¹⁷ Wo nyi kafin nyaho-nyahoi ya, owo iko nu n na i nya vinya yi shi.

¹⁸ Owo nu zhin Tukwo, owo nayi nya, wato ikklisiya-nwo ɓei ya, owo nu zhin shugaba aza nya nɓa kukala n efi, n na abai wa zhin kmisunyi n na anya vinya.

¹⁹ Gama Shekwoyi ɓei ye owohin tukwo wa dna nwo Nugun.

²⁰ Ntu n nya ɓo nu n wo Nugun a zhin, Shekwoyi wo fin zokwo ya nyaho-nyahoi kwa ɓeda wo. Anya vinya n esbe n ekni yi, gama Kristi efi tu zundu kwo na ɓe n jedoɓe yi n Shekwoyi.

²¹ Fye filo n ɓo n fye ɓei mwakpa n Shekwoyi nyi. Fye ɓei zhin owo anuɓayi nu to fyei ye won. Fye ɓei gnajegna-gna yi ya n wo. Ntu fye aɓo anubo zhin nukwoyi ɓo, n na aɓe zhin nukwoyi, ama nsaiye wo la fye jezeɓe n cei ngye owo anugundo.

²² Wa zhin ce dna n owo efi mi n wa fi dna n nayi tu n zundu nyi ntu n ce nu Kristi ku ɓe n fyei n Shekwoyi abye, fyei gni agni zhin wo abye n sayi ye n tna laifi, n kwo ɓa zhin n wo ɓa nya fye ya.

²³ Nya gmanyi, okwo nu fye ku gaiciya ga, fya ku mi zhin kwo, n kalayi dna n Dagayi fya ku tabata Nabari manayi nge Yesu ɓela fi ntu n fye ɓo, to fya shan-shan, n wo gaiciya ga wa gni fyen, Nabari wowoyi n kwo ɓei ɓe fye aba, kwoi laɓa lo nsaiye n na anyi, emi Bulus, mi na agmadai lo ma gna azaje.

²⁴ Ama emi tnu-tnu nu ma sin wahala ntu fye ɓo, ai dami lo, gama mi bmazhin lo ma nu Kristi azhingye n tu wo nayi ɓo, wato ikklisiya.

Asiri La Kpe Anya Ya

²⁵ Shekwoyi, la tnu n mi yi ma bma ikklisiya zhin, ma wu abyedo owo asiri.

^26-27 Wo ɓei nwo asiriyi soshi tunyi n sapa, ama kwa dawo wa gna aza n ɓa yewo ɓai se-ase ntu n owo ɓo, n mwa-mwa yi anabarkayi owo shiri nya ɓa zhin fye nya nu. Asiriyi nu nyi, Nge, Kristi n efyemi, owo nu zhin efye awyetu, n mwa-mwa yi.

²⁸ Ntucenu aba vinya n ya lo ya gna aza Kristi nabari n ɓa ɓa wo, yi zhin ɓa gargadi, yi wu ɓa shiyi kpeye lo nsun, yi n cei pma yami ya ɓe n zaho-zahoi n Shekwoyi abye n Gyi-gyi-yi ntu n nya ɓo n Kristi ku zhin ga zaho-zahoi nyi.

²⁹ Omi tnu-tnu nyi mami ma zhin kwo, ntuge Kristi iko dnagmayi gami kala lo nu n mi mi.