Aibraniyi 9 - Alkawali Woiwoyi

¹ Nsaiyi fa ya da alkawali kwo kwoyi ɓo n Shekwoyi ɓei ga wa za nyi. Wo ɓei ku awyidna ga shi aɓa la wo tu nwu.

² Tent (lubui) ɓo nyi ntu wo latu ɓo, ko ɓei safi n gun aba, Nyakun kmisunyi a yikwo ge aba gyi-gyi-yi.

³ Eje ɓei sa, Nkwo avun yakun do ɓonyi, kwo nu ɓei zhin aba gyi-gyi-yi du-duyi. (Shekwoyi zafun ɓei dna ɓo nu.)

⁴ N nyakun bayi bagadi ɓei shi n cei zhin n zinariya yi, aɓei zhin a gyi tulale na ɓo nu. Akwati zinariya nya ɓei nyi ko nu ɓei zhin akwati alkawali nya. Nkwo mi Musa awyidna ɓo ya dna n nyagyi yafi n ɓa ɓei zhin ɓai gyi n zhabui nyi. Wato mana nu. Haruna busi ɓei dna ɓo, n kwo ɓei kmi nyi.

⁵ Nkwo she ɓa ɓei n nazai zhin kpe, wato Shekwoyi amalaika. A yi ɓa ge Cherubim, ɓa ɓei n nabminayi laya kpe n na kwati yi Akwati she, a yi kwo ge Shinkpegye sun-sungye nya. Yi ta mi ya da shi kwo ɓei nyi vinya n.

⁶ Shi ɓa ku anya zo zhin vinya, sai pirist wa lo nyakun gyi-gyi-yi, wa ɓe n sadaka yi ntu n naza ɓo.

⁷ Amma pirist dnagmayi nu ɓei bwa mi wa lo dna n nyakun bayi. Wo ɓei zhin wa bwa lo zungmanyi nu n eye gmanyi. Wo ɓei zhin wa lo n nami shi wa zoya kpe n Shinkpegye sun-sungye nya, n Shekwoyi abye. Kwo ɓo zhin kwa bwi ɓa laifi n na babwi yi. Kwo ɓei nyi ntu piristi ɓo na zai vinya.

⁸ Zafun Gyi-gyi-yi cei pma wa wu yi nya nu n kwo mi. N zokwo kwokwoyi aza ɓei gnaje gna-gnayi n Shekwoyi, ɓa to ɓei mi ɓa lo fi n naba gyi-gyi-yi du-duyi ɓa lo da Shekwoyi m. Eje ɓo sa n kwo ɓei ɓa gnaje ya. Ntu ge zokwo woi-woyi to ɓei guya ai lo Shekwoyi aba m.

⁹ Deye kwo wu yi nya nu ɓo. N zokwo kwo-kwoyi, nyaga n sadaka yi ɓo zhin dole nu, amma deye to ɓei mi kwa zhan ɓa bugba ya m, oɓa bugba ɓei zhin laifi nya nu, ɓa ɓei gnaje-gnagnayi n Shekwoyi. Shekwoyi ta ye laifi m, wo ta ye ɓa ɓedo n laifi da yi m, aza n na to zhan ɓa laifi ya m.

¹⁰ Zokwo kwokwoyi ɓei wu aɓo nu nɓa ɓa zhin a da Shekwoyi. Awyidna ɓei nyi ntu nyasin ɓo, n nyagyi, nuwan fu ɓedo n na nyajei mwa begye. Dole owo mwa-mwa gayi ɓa nu aɓoye. Kwo ɓei zhin dole nu ɓa zhin aɓo deye ntu ge ɓa zhin shiri ntu Yesu ɓeɓe ɓo. Yesu la zokwo woi-woyi guya kwoi lo Shekwoyi aba.

¹¹ Yesu nu zhin eyi pirist woi-woiyi duduyi. Womi woi ɓe n yi n Shekwoyi abye, wo du Shekwoyi puwa n eshe mi; Abwa nu to mi api ye m, kwo to nyi n na nyi ye nu m, ama n eshe mi.

¹² Wo ɓei la wo ami nu wa lo n cei n naba gyi-gyi-yi. Wa ze ɓa kpe n shinkpegye sun-sungye nya, ena ami nu to n, Nyakpa dohodohoyi ami nu to n. Owo hin ami nu, owo ami ku yi ta-ta ta gba. Eyi gni-gni la nu, gni-gni tnu-tnu ku zo zhin.

Shiri Woiwoyi

¹³ N zokwo kwo-kwoyi, aɓei zhin ampanyi n na nakwoyi, ɓedo n anayi, oɓa mi ɓei zhin ɓa zhan za ya nɓa laifi nayi nya.

¹⁴ Amma Shekwoyi nugun ami gyi-gyi-yi du oɓa nyalo. Zafun ɓei zhin woi bma wo zhin, owo ami n kala yi lo. Kwo ɓa shan yi do kwapmi ya bugba bma, kwa zhan yi alaifi ya. Kwo la ednawo gmiyi ya ntu na awyindna ɓo, kwo ga yi kala ntu ge ya zhin wo atnu-tnu.

¹⁵ Yesu wo la ɓe n alkawali woi-woyi. Kwo nyi ntu naza ɓonu n Shekwoyi la ɓa yi nyi, n na byei gbogbo, ɓa gwo Shekwoyi anabarka. Yesu fi-fi la yi loya, gama wo ɓei ku ta-ta ta gba ntu ya laifi ɓo. Anabaraka ye cauta nu.

¹⁶ Nza fi, wo zhin wa gado ya shi n navun, ama ata mi a gna oza gado, to woi fi num.

¹⁷ Ntu cenu aɓa zhin ampanyi n wo ɓeda yi woi la fi nu. Zaho ta gwo nyaho sai wo la fi.

¹⁸ Shekwoyi alkawali ɓo ce hatimi n ami. Kwo ɓei wu kwotonci n Musa sa, owo fifi nya. Yesu wa fi, ntuge a gayi owo gado nu.

¹⁹ Musa ɓei ga aza Shekwoyi awyidna. Nsaiyi wa ze ami ya kpe n na wyidna yi ɓedo n na azayi. Wa zhin ampanyi n afintolo hoi ɓedo n lulu byei-byei yi n nabai wa ze ami ya kpe aza ɓedo n nuwan yi.

²⁰ Wo ɓei gna ami ye, “ɓa zhin alkawali nya nu, Shekwoyi gbega nu, fye shi kwo bwa.”

²¹ Wo ɓei lakwo zeye kpe n tent ɓedo n nabayi n ɓa gyi-gyi-yi nyi.

²² N alkawali kwo-kwoyi ami nu ɓei zhin ɓa zhan nya ya vinya. Deye kwa wu ge, efi, kwo nu zhin laifi tagba nya. Gafara zhin to lo n tna ami zeyan.

²³ Tent n Musa ɓei zhin n anyai vinya nkwo mi, aɓei laɓa degbe n she nu. Dole Musa zeɓa gyi-gyi-yi n anyakpa ami yi. Amma Tent nkwo lo n eshe nyi, aɓei zekwo Gyi-gyi-yi n enya yi nu n kwo du deye lo n daraja.

²⁴ Yesu ɓei lo eshe nu n kwohin tukwo, to ge aba gyi-gyi-yi nna mi n nabwa yi m, Wo lo n she Woi wu wohin tukwo n Shekwoyi abye ntu yi ɓo.

²⁵ Wo taga sadaka ntu yi ɓo cici m, Yesu sadaka zungmanyi nu. Ama pirist dnagmayi ɓei zhin wa ga a sadaka cici n na ba gyi-gyi-yi dudu yi eye doho-dohoyi.

²⁶ Shekwoyi ta ye sadaka ye cici nu m. Dole nu Yesu wa ga wohin zun gmanyi. Owo sadaka ɓei la eyi tata goya.

²⁷ Zaho-zahoi ɓa fi zungmanyi. Amma n fi avun Shekwoyi ɓei da zaho-zahoyi owa.

²⁸ Ntu cenu Yesu ɓei fi ntu yi ɓo zungmanyi, wo ɓei fi eyi a laifi fi nu. Amma wo ɓei la laka n vingwo, wo je ze ɓe lo wa gni aza nɓa vi wo nyi.