Aibraniyi 6 - Alkawali Woiwoyi

¹ Ntu cenu yi shi ɓeda bwa n yi ku wo nyi wato Yesu wuwu, to ya wu kwo nu cici m, ama yi gyi abye dna gni-gni zokwo har ya mwa. Atnu-tnu ta mi ɓa gni yi m, ntu cenu, yi mi zhi dna gaiciya ga. Yi ku atnu-tnu anayi nya fa. Ɓa ɓa lo yi na bwi-bwi ba.

² Ko to kamata lon ya ye wufye batisma ɓo m. Abwa kpe ntukwo, n jesun n azafi kalaku n wadayi.

³ Ama yi gyi abye n Shekwoyi a kala yi.

A Zhin Ta-Taya Nya

⁴ Fye wo ɓo ko zhin mi gna fye ge fye gyi abye nyi. Awye la azaho knaya, ɓaku zafun gyiba gyi, Ɓaku owo tnu-tnu gye wye.

⁵ Ɓa kpe lo ge Shekwoyi ɓeda bmiya lo, ɓaku anyi dehi asin wo n kwo ikoyi.

⁶ Ndei ɓa fa vi ɓo ɓata mi ɓa je ze ɓe m. Ntu ge ɓa na zafun aɓo fyegyi-gyegyi. Ɓa zun Yesu du cici, ɓa gawo vinyikwo.

⁷ Ekni lo abye gun aba, Manayi lo. Kwo zhin kwa pa agbe-gbe manayi ntu fanu ɓo. Afayi ye kwo pya nu. Dagayi zhin watu kwo anabarka njesun.

⁸ Ama ekni do kasun lo, kwo nu zhin nukwoyi. Ko zhin kwa sin nuwan to koi ga ampanyi m. Ko zhin kwa pa aknawuyi n gbe-gbe nukwoyi. Ekni deye a zhin a tukwo kni, a fa kwo ntna nyaho, akpe ko ena.

⁹ Aza to lo n wu ngye ekni nukwoyi ye m? Alo, ama emi azaje fye to wu lo ngye ɓa m. Fye na tnu-tnu manayi lo. Njesun Shekwoyi zhin wa tu fye anabarka.

¹⁰ Shekwoyi ta gyi za fim wo ta gyi za atam. Wo ku yeye gye, n fye wu aza ntu wo ɓo nyi, wo ta ze ko amwim. Fye gyi abye lonu.

¹¹ Ɓehin-hin, yi cei pma fya zhin lonu, fye la gni-gni shi bwa har Yesu wa ɓe.

¹² Fye to wo bwato m. Fye vi anabawa kwo-kwoyi bwi. Gama ɓa dagma lo n sayi n Shekwoyi aba. Ɓala Shekwoyi alkawali gwo.

Ibrahim Dogbe

¹³ Esanu Shekwoyi ɓei zhin Ibrahim alkawali nyi, wo ɓei si nyasi n wohin nu ntu ge zado to du wo lo n wo ɓa si nyasi n woyi m.

¹⁴ Wo ɓei gna ge wo ɓa tu wo anabarka njesun. Wa ga wo ɓi, Owo bye kwa mwa begye.

¹⁵ Ibrahim ɓei bwa hankuri sosai, navun wa ma Ishaku.

¹⁶ Fye kpe lo ge yi zhin ya si nya si n ya zakwoyi nu n ɓa du yi nyi. Yi zhin ya zhin lonu, ntuge ɓa ko yi lo. Deye wu ge yi da gaiciya nu.

¹⁷ Shekwoyi ɓei zhin lonu nu. Wo ɓei si nyasi nwohin ntu ge wa wu gaiciya n kwo ta shan do nyi m.

¹⁸ Deye kwa wu ge Shekwoyi alkawali zhin gaiciya nu. Kmisunyi Shekwoyi la wo ɓeda ga, ko ta shando n. Bayi, Shekwoyi la nyasi si, Wo ta ce akata m. Aza nɓa ɓe Shekwoyi aba, ɓa bwa abwi ba n bmazhin yi.

¹⁹ Eyi gaiciya ga ta shan-shan, yi ku po sosai ngye nyakun nkwo tu n na pma. Yi ku mi zhi.

²⁰ Yesu la lo eshe n ya bye. Wo zhin eyi pirist dnagmayi nu. Owo begyi pirist nya har nyalo-nyalo nya nu. Ko wu ngye Malkizedek nya nu.