Aibraniyi 5 - Alkawali Woiwoyi

¹ Pirist dnagmayi doho-dohoi a kni a za nu. Awoi tu, wa gni aza busi n Shekwoyi abye. Wa ga sadaka ntu n laifi gafara zhin ɓo.

² Dole pirist dnagmayi wa zhin peceye n amamai ɓedo n atnaganyi-kpe yi. Dole wa gye aza sun-sun ntu ge wohin to zhin oza nunuyi nu m.

³ Ntu cenu dole wa ga sadaka ntu wohin a laifi ɓo. Kafin wo ga sadaka ntu aza ɓo.

⁴ Ozaho-zahoi ta mi wa dna wohin n tnu-tnu manayi ye m. Shekwoyi nu kni za Shekwoyi nu ɓei kni Haruna pirist kmisunyi.

⁵ Kristi nu to ɓei kni wohin, Shekwoyi nu ɓei kni wo?–?Shekwoyi wa ci wo ge, “Emi nugun, n naiye mi la ho kni.”

⁶ Zabura 110 kwa gna ge, “Ho wu gye Malkizedek.” Wo to ɓei gmi na pirist puwa nu m, ama wo ɓei zhin prist nyalo-nyalo nya nu. Shekwoyi nu ɓei yi wo.

⁷ Sanu Yesu ɓei dna n anyi nyi, wo ɓo zhin aduwa n gaiciyai. Owo zafun kwa damu. Aɓo ku aduwa wo wo ntu ge wo ɓei gba wohin na aduwa zhin. Wa gyi Shekwoyi wye nabai to wa fi woi ye bwasin ciwyi m.

⁸ Yesu nu zhin Shekwoyi nugun, ama wa dudu wa vi ɓo dna n wahala.

⁹ Ntu deye ɓo wo ɓei la ze oza nunuyi. Woi ga aza nɓa vi wo ɓo gni-gni nyalo-nyalo nya.

¹⁰ She Shekwoyi ɓei yi Malkizedek nyi, wo ɓei yi Yesu lonu wa zhin pirist dnagmayi.

Fye Zan Nyagyi Kpakalayi Shin

¹¹ Anya mwabegye lo n mi ɓa da n Yesu tukwo ama mi ta gnafye m, ntuge fye to n yekpei lo m.

¹² Gama ko la kunce fya zhin amalemi. Ama fye ye zhi lo n fa gbe, fye cei pma ai wu fye Shekwoyi. Fye ku ze n gye aɓi-nawyi. Fye y madara. Fye ta mi fya gyi zafu nyagyi m.

¹³ Oza nu wo ye madara wo to mwa dna Zafun m.

¹⁴ Nyagyi kala da zhin aza dnagmayi nya nu dna Zafun. Wato aza nɓa ga ɓahin tata nyi, ɓa kpe ɓe manayi ye lo n ɓe nukwoyi. Ɓaku zhin ajigwo ntu ganyikpe ɓo.