Aibraniyi 4 - Alkawali Woiwoyi

A Sun-Sun Ba Woiwoyi

¹ A Yila alkawali gwo pwo-pwo nya, ntu deye ɓo yi zhin peceiye, Ko ta bmiya to ya lo Shekwoyi ebemi m.

² Nabari manayi ɓei la ɓe yi aba, ngye ɓa ɓaku wo ce, ama ko to ɓei zhin ampanyi m, ntu ge ɓa to wo n gaiciya gai m.

³ Ama eyi n yi ku gaiciya ga nyi yi ɓa lo wo sun-sun. Ama Shekwoyi ɓei gna atna gaiciya gayi. “Ma gyi minagyi ma si nyasi ge, ɓa ta lo mi sun-sun, ko da shike owo atnu-tnu ɓo ku zo zhin, tunyi anyi zhin sa.”

⁴ Shekwoyi Ɓeda gna ge Shekwoyi ɓei zhin anya vinya dna anyipyei ngun tnaba. Kwa gna ge, “N nyipyeyi tnaba yi Shekwoyi wa sun.” Nlo nu yi gye Shekwoyi la lo sun-sun.

⁵ Njesun, Shekwoyi wa da Ayahudiyayi ɓo, wa gna ge, “Ɓa ta lo mi sun-sun m.”

⁶ Asun-sun ba lo ntu aza ɓo har nsaye. Yi to ku ze n gye aza tna ɓoviyi da m. Oɓa tna gaiciya ga n laifi yi ɓa zhin ɓa, to ɓa lo Shekwoyi sun-sun aban.

⁷ Njesun n Dawuda sa, Shekwoyi wapa ɓa shi aza ɓei fi n zhabui nyi. Wa gna ɓa ge, “Kna emi ɓeda tnubua n saiye. To ha kpe bugba kala n gye aza n ɓa ɓei zhin ma gyi minagyi nyi m.” Wato aza n Dawuda sa ɓei ku Shekwoyi sun-sun ɓo wo nu.

⁸ Ko shi Joshua ɓei lo n ɓai nu alkawali kni, wo to ɓeimi wa lo n ɓai n Shekwoyi fun. Wo ɓei gna ge wa lo nɓai nu, to Shekwoyi je sun-sun ho ɓo dam.

⁹ Deye kwa wu ge sun-sun yelo ntu Shekwoyi aza ɓo.

¹⁰ Zaho-zahoi nwa lo Shekwoyi fun wo ɓa bwa sun-sun. Ko ɓa ze ngye Shekwoyi sun-sun nwo ɓei sun woi ku anya zo zhin nyi.

¹¹ Ntu cenu, yi zhin atna ya lo ofun deye Kada tna gaiciya ga kwa hana n yi.

¹² Gama Shekwoyi ɓeda zhin wyewyeyi nu. Ko gyi-gyi-yi sosai. Ɓehinhin, ko du beyakwo n gyi-gyi. Kwa fin za har bugba. Kwa wu asiri bmi peipei.

¹³ Shekwoyi kpe anya ye vinya. Nyaho-nyahoi to bwi shi n wa ba m. Dole ya ga bayani anya yi ku zhin.

Yesu eyi Prist Tukwoda Dnagmayi

¹⁴ Yesu eyi pirist dnagmayi wo du she. Wo nu zhin Yesu Shekwoyi nugun. Ntu cenu yi kpema wo dei-dei.

¹⁵ Gama Yesu eyi pirist wo kpe yi a kala gbaɓolo, ntu ge a ɓei ku jaraba zhin wo ngye yi. Ama wo to zhin laifi m.

¹⁶ Ntu cenu yi ku kala ya zhin aduwa, ga Shekwoyi. Yi ɓa bwa sun-sun gye. Yi ɓa bwa alheri kwa bma yi zhin esa nu ya gyisan ncei.