Aibraniyi 2 - Alkawali Woiwoyi

Yesu Fi Ntu Aza Vinya Ɓo

¹ Ntu gaiciya ɓo n yi ku wo nyi yi zhin peceiye, Ntuge wada lo n ya jeze navun yi.

² Anya amalaika ɓei da nyi, gaiciya nu. Owa gnanazun n tna ɓo vi ko ɓei la ɓe n tatai. Yesu kwa duduyi nu. (Wo du amalaika lo. Owo ɓeda du ɓa nya lo njesun).

³ Ntu cenu, yi ɓa po n wuna n ya na gni-gni dnagmayi ye a ɓoʼa? Gama Yesu ɓei da nabari manayi. Owo abara, n ɓa ɓo wo wo nyi, ɓa ka yi ɓe cei.

⁴ Aɓo wo-woi nwo abara ɓei zhin nyi: acauta zafun nya, gaiciya ga, aza ka gna ɓedo n waʼazi, ɓa ga seida ge Shekwoyi ɓo kunsun n ɓai.

⁵ Ya je kpe ge nabari manayi Yesu nya ko du amalaika nya lo ntu ge, Shekwoyi to ɓei ga ɓa nu begyi a nyi nya m, wo ɓo ga Yesu nu.

⁶ Ɓehinhin, Zabura gna ge, “gbaizanyikwoci, wo zhin kni nu ha zhin tunani ntu wo ɓo a? Owo ɓi zhin kni nu nho ɓa bmawo zhin a?”

⁷ Ho ɓo la woze n gna amalaika gba n sai fyewyi. Avun ha knu wo lowonyi latu nya n mwa-mwa nya yi, njesun ha tu wo n anya she vinya n ha zhin nyi.

⁸ Behin-hin, ho la iko ga wo, har owo nu shi anya bwa vinya. Shekwoyi to kni nya ho yan. Ama yi ta gye ce kpam sai Yesu la ɓe.

⁹ Ama yi gye Yesu lo n wo ɓo la ze ngna amalaika gba. Nsaiye dei Shekwoyi la wo latu, woi la wo ga mwa-mwa ntu ge wa fi ntu yi ɓo. E, ntu Shekwoyi yeye ɓo Yesu wa fi ntu zaho-zahoi ɓo n nanyi.

¹⁰ Deye kwa lo dei-dei n Shekwoyi nufiyi nwa zhin anya ntu wohin latu ɓo nyi. Wa zhin bezheyakwo ntu wo wahala ɓo. Ntu lo nu wa mi wa ɓe n nazai n mwabegye n gni-gni zokwo.

¹¹ Yesu n wa zhan yi ya nyi, ɓedo n yi nna lai zhan ya nyi, Eyi dada (wato Shekwoyi) gmanyi nu, cenu zhin Yesu to woi wo vinyikwo n, wa yi-yi ge owo azaje m.

¹² Zabura gna ge, “Nɓa ga emazaje oho ye. Nɓa kwo anyi ma la ho tu dna n na aduwa nyakun.”

¹³ N abado wa je da ge, “Nɓa wo ze omi akpe ma ba. Omi, n mi aɓi yi n Shekwoyi wa ga mi nyi, yi zhi nyi.”

¹⁴ She yi zhin nayi n nami yi nyi, wohin wa ze lo nu. Ntu ge wa wu Shetan n wo ikoyi, efi nya yi.

¹⁵ Wo ɓo ye ntu ge wa gni aza nɓa wo efi dna tunyi nɓa ma wyi. (Nna bai ɓa po har abada).

¹⁶ Wo ta bma amalaika nu zhin, ama wo bma Ibrahim ayawyi nu zhin.

¹⁷ Ntu lo nu wa ze ngye owo azaje, n anya vinya. Deye kwa ga wo iko wa zhin pirist dnagmayi. Wo kpe lo shi wo ɓa gye yi sun-sun wa zhin gaiciya n Shekwoyi abye. Ce na zhin wami wala aza laifi. Woi la yi ye ɓedo n Shekwoyi yi.

¹⁸ Wa sin wahala jaraba nya. Ntu lo nu, wo ɓa mi wa bma aza zhin n na zhin ɓa jaraba nyi.