Aibraniyi 13 - Alkawali Woiwoyi

Zokwadna n gnaɓi-i

¹ Yi ye najeyi ntu ge yi zhin gmanyi-gmanyi nu.

² Yi ye na zhiɓeiyi Aza ho ɓei ku zhin lo nu na malaikayi amma ɓa to ɓei kpe m.

³ Pa za ɓo nɓa fi n kurkuku nyi, gye she a ga aza wahala. Sun wahala n kun-sun ɓai. Sun wahala yi n gye kwo zhin ho nya nu.

⁴ Fye la mula ɓo shi dei-dei. Kada a zhin fye agma fya wunya. N fya wunya Shekwoyi ɓei dafye wa.

⁵ Fye to ku ze agyiwye ye yi m. Zhin godiya n nya yi n ho cei lo. Shekwoyi ɓei gna ge wo ta ya yi m. Mi kun-sun lo n fyei nyalo-nyalo. Nɓa ga fye nyagyi cici.

⁶ Ntu na alkawali ye ɓo yi ɓa da ɓo ntna edna, “Shekwoyi nu zhin mi bmazhin yi mi ta wo oza dna m.”

⁷ To fya ze ofye azakowyi amwi dna n Yesu ye m, Ɓa ɓei kpema Shekwoyi ɓa zan-zan n dna woyi. Fye vi ɓa pita bwi.

⁸ Yesu ta shan do n, Nya wo ɓei nyi n su nyi, wo zhin kwo nu n naiye kuma har nyalo-nyalo.

⁹ Shi Shekwoyi ta shan do nyin, to ye a malami doho-doho ɓa dna fye kwoce n nyawu nukwoyi m. Fa Shekwoyi alheri kwa ga fye kala. To ge anyagyi ho pya awyidna ko kwa zhibaje m, ɓa zhin banza nu-nnaza ba nɓa gyi ɓa nyi.

¹⁰ Eyi nyagyi gyi zafun nya kwo zhin zundu nu oza n wo dna awyidna kwo-kwoyi sunta wo to deye anabarka yi lo m.

¹¹ A Yahudiyi ɓei zhin apma n na nyakpa yi nu ntu sadaka ɓo, ɓa ɓei zhin ɓa wu nyap-kpa ɓa lo ɓa gyi kona n zhimi avun. A mi da ɓa ɓe n cei n Shekwoyi nyakun. Deye ɓei zhin sadaka ntu alaifi ɓo nu.

¹² Cenu ɓei zhin a wu Yesu n pifun, wa ga sadaka owo nyai nya ntu yi a laifi ɓo.

¹³ Yi shegun Yesu n zhimi avun. Wato to ge nanyi ye mi m. Yi sun wahala ɓedo n vinyikwo yi n kun-sun woi.

¹⁴ Anyi ye to zhin yi nya nun, yi pmi eya ʼpa, nyalo-nyalo nya nu, wato eshe.

¹⁵ Yi ga Shekwoyi mwa-mwa, kwo nu zhin yi sadaka ga. Yi zhin dna n Yesu ye. Yi gna azaje owo eye mwa-mwa ɓo, yi ci wo.

¹⁶ To ze ɓemana zhin amwi m, zhin aɓo manayi. Ce nya ga aza n ɓa to cei lon. Nyaga nu Shekwoyi ye n cei.

¹⁷ Ga aza mwa-mwa n ɓa du ho, nwyihoi ɓa ɓei wu Shekwoyi oɓa tnu-tnu. Ndei fya ga ɓa mwa-mwa tnu-tnu ɓa da ɓa zhin. Ko ɓa bma fyehin zhin ce.

¹⁸ Fye zhin aduwa ntu yi ɓo, yi ye ya zhin tnu-tnu ɓehinhin nya nu n ɓefyece yi.

¹⁹ Ntu cenu fye zhin aduwa ntu mi ɓo, ko n naiye ma fye ya zhin, mi cei pma ma ɓe fya ba sa fyewyi.

²⁰ Shekwoyi wo tu fye anabarka, wonu ɓei la Yesu ka. Yesu kwa wo nu zhin knikna yi, wotu fye anabarka ntu owo ami zeya ɓo, dna n na alkawali woi-woyi.

²¹ Shekwoyi wo gba fya bukata ntu ge fya zhin wo ɓeye. Wo zhin ɓo n yi-i, nwo cei pma, wo zhin ntu Yesu ɓo. A ga Yesu mwa-mwa nyalo-nyalo.

²² Omi-azaje, kna tnubua n ɓo mi ku da dna n wasika ye mi.

²³ Ala Timatawus loya n kurkuku, yi ɓa kun ɓe n woi. Kpekni sa fyewyi wo ɓa ɓe ma ba.

²⁴ Fye ɓi fya atukwo da gna ga mi, a Yesu viyi dna nu Italiya, ɓa ɓi fye gna lo.

²⁵ Shekwoyi alheri ɓa kun-sun n fyei nyalonyalo. Amin.