Aibraniyi 12 - Alkawali Woiwoyi

¹ She azalo n mwa ɓai shi ya, wye nyi, yi ku akaya shanwoyi ya, yi ku a laifi fa nɓa shi yi nyi to ɓai ye ge ya gyi abye nyin. N nabai ya zan-zan dna n gaiciya n hakuri yi n Shekwoyi la shi n ya bye nyi.

² Yi shi Yesu nu awye, wo nu zhin yi gnabye. Vinyikwo to ɓei wo wo wa fi ntu ya laifi ɓon. Wo ɓei kpe ge kwo ɓa ɓe wo n mwa-mwai. Nsaiye kuwa wo tu lo n naba duduyi n kunsun n Shekwoyi n ʼshemi.

³ Aza nukwoyi ɓei ga Yesu wahala, ama wa zhin hakuri. Yi dna wo wahala wye wa ze eyi gnabye. Deye ɓa bma yi zhin ya bwa kala.

⁴ Kwo dama yi to shi gusun n laifi yi kwo n jarabai har yi la amisa kpe ɓedo n ami yin.

Shekwoyi ta-ta bmiya ntu yi ɓo

⁵ Hola Shekwoyi ɓeda zamwi nu? Wo ɓei gna ge, “Omi nugun to gyi minagyi ʼsa Shekwoyi wa gaho tata. To bma bugba ya esa n wa wuho oho doknunu gbi m.

⁶ Shekwoyi zhin wa dna owo aɓi zokwo wa ga ɓa tata. Sanu wo ga yi tata, kwo wu gye yi zhin wa nya nu.”

⁷ Shekwoyi zhin yi-fi n zokwo shi aza je zhin oɓa ɓi fi n zokwo nyi. Zaho-zahoi ta mi wa shi n waɓi to wa dna wo zokwo m. Yi zhin wa ɓi nu, ntu cenu woi ga yi tata.

⁸ Dole ata aɓi, oɓa dada ɓa zhin Ba fi n zokwo. Amma n Shekwoyi to ga ho tata m, ho to zhin wo nya nu m.

⁹ Yi zhin ya ga ya dada mwa-mwa. Yi ta nya ɓa ɓo m, ɓai ya ga yi tatam. Ntu cenu yi gwo Shekwoyi tata n na gmadayi. Shekwoyi ye yi n du eya dada anyi nya. Wa ga yi tata ntu ge wo ye yi lo.

¹⁰ Eya dada anyi nya dna yi zokwo aye fyewyi nu kawai. Amma Shekwoyi zokwo dna, gaiciya nu n saho-sahoi. Wo ye ya gwo wo gyi-gyi, wo ta zhin wye m.

¹¹ A tada oza sanu na ta won, sai dai ko la duya. Kwo zhin ha fa a zokwo nukwoyi ya vi zokwo do na gmada yi ɓedo lafiya yi.

¹² Laka la kwo da shike a laho ɓe, ha bwa kala njesun.

¹³ Zhin ha pita zokwo manayi. Aza tna kala na nyasan yi n ɓa vi kwo ɓa ta miya ɓa wu ɓahin m. Amma ɓaɓa ku ze akala da dna n gaiciya ga.

¹⁴ To je zaho-zahoi m, ha zan-zan gyi-gyi-yi cici, Ntu ge aza n ɓa to gyi-gyi-yi m, ɓa ta gye Shekwoyi wye m.

¹⁵ Fye dna je wye n fye ɓa bwa Shekwoyi anabarka n fye to ye ge nuwun kwo lo fye a tasun. Ko zhin kwa ɓe n wahala yi, kwa to aza wye-wyeyi bwa.

¹⁶ To fya zhin anagbayi m, to fya shi Shekwoyi lafya-lafya, n gye Isuwa m. Wo ɓei kun wo gado ntu mikun ɓo. Kwo ɓei zhin ɓo gboloyi nu n wa ba.

¹⁷ Sanu awye ɓei kna wo ya, sai la duya, ko da shike wo ɓo ci bwi ntu wo laifi ɓo, ama duk gboloyi nu. Ato ɓei je woyem.

Shekwoyi begyi

¹⁸ Ho to shin wahala sun n gye a Israila nya m. Ɓa ɓei ku lo ena, ɓa ku lo wyegma, ɓa ku lo ogma nukwoyi, aɓo deye ɓa ɓei gye ɓa n Sinai pe nu har ɓai wo edna njesun, Shekwoyi ɓei ga ɓa owo awyidna n ya nu.

¹⁹ N wyihi, ɓa wo ai bye a kna-knaci, ɓa wo Shekwoyi begye n gye ogma har kwoi shan ekni ashan. Har ɓa gna Shekwoyi ge wo la fa ɓeda ɓo, ntu dna ɓo kurum.

²⁰ Ɓa to mi ɓa mizhi m, ntu nwa awyidna ɓo. Gama nyakpa doho-dohoi n kwo ɓei to epei, kwo ɓei la fi.

²¹ Kwo ɓei zhin oɓo dnawo nya nu, Musa nwohin wo ɓei ku dna wo, wa gna ge, “Mi vin lo mi-i wo dna.”

²² Amma fye ku ɓe Sihiyona pe, kwo nu zhin Urushelima eshe nya. Fye ku ɓe amalaika yezhi ba, agmada ʼba.

²³ Fyehin kwa wato zaho-zaho n wo eye katu lo n Shemi, fye ɓe Shekwoyi-wada yi aba, fye ɓe azafun aza gni-gni yi nya aba. Ɓa lo n ʼshe, ɓa ku ze n nu-nuyi.

²⁴ Fye ku ɓe Yesu aba n wo zhin yi viye yei n alkawali woi-woi aba nyi. Fye ku ɓe Yesu ami aba n ɓa zhin za gafara nyi. Owo ami du Habila nya lo. Habila ami ɓei zhin nya nu n na ɓa gbata.

²⁵ Kna wo ɓeda tnubua n wo daɓo n hoi nyi. Abei ga a Israila yi tata ntu ge ɓa ɓei zun Shekwoyi ɓeda gna-na n Musa ʼgbe, oza n wo zun wo ɓeda gna-na n Yesu gbe wo ɓa gna fifi nu.

²⁶ Shekwoyi begye nu kawai ɓei zhin anyi ɓa shan-shan, sanu wo ɓei da ɓo tu n Sinai pe nyi. Sanu wa je ɓo da duk ɓedo n ʼshe yi kwo ɓei shan-shan.

²⁷ Shekwoyi ɓei shi nya ya nkwo to na gbegye yi lon, anya n ɓa mi zhi lo ɓa nu ɓei ce zhi kawai.

²⁸ Shi yi nbegyi lo, n zaho ta mi nkwo gwoya nyin, yi zhin ɓo nkwo ɓa da Shekwoyi, yi zhin wo bauta, nbugba godiya nya yi, yi ga wo mwa-mwa ndanwoyi.

²⁹ Ntu ge eyi Shekwoyi zhin ona nu, nkwo gyi aba nyi.