Agalatiyayi 5 - Alkawali Woiwoyi

Kristi Ku Yi Ze Aza Lo-loiya

¹ Ntu cenu, Kristi la yi loya. Fye ku kpe ɓehin-hin, ge fye filo n yanci ye to fya je fyehin pa fi n na Yahudiyi aɓokni n na knunu yin.

² Fye kna tnubua, ntuge ɓeye zhin ɓo dnagmai nu, ngye fye ye kpe lo n Kaciya zhin nu n na Yahudiyi awyidna bwa shi yi nu ɓa ze fya aza manayi n Shekwoyi abye, agye Kristi ta mi wa gni fyen.

³ Mi ɓa je ce da, oza n wa zhin atna wa bwa Shekwoyi bugba da ntu n kaciya ɓo n na Yahudiyi awyidna bwashi yi tile wa vi ɓa ɓo kni vinya kwo kuwa wa bwi.

⁴ Kristi to n na pmayi lo nfye aba n, ndei fye gye ge fye ɓa ku ta zo Shekwoyi gbanu kpa n na wyidna bwa-shi yin; fye ku bwi n Shekwoyi alheri aba.

⁵ Ama, dna n Zafun Gyi-gyi-yi bma-zhin yi kpe ma Kristi ʼfi nu, wa kuyi alaifi ya, wa ze yi aza manayi n Shekwoyi aba.

⁶ Eyi, n Kristi la wye-wyei nyalo-nyalo nya gayi nyi, yi to n na apmai lo ya damu kwo yi kaciya yi zhin lon, ko yi shi a Yahudiyi awyidna bwa lon, ntuge nya n yi ye kwonu zhin gaiciya ga tnu-tnu dna n ye-ye.

⁷ Fye ɓei zan-zan cewo, nykado nu la ɓo dna fye do, to fyei ɓa shan gaiciya vi ma?

⁸ Shekwoyi nu to wu fye lonun, ntuge owo nu na yi fye woi lo fye ya dna Kristi.

⁹ “Ama zanukwoyi gmanyi nu, n fye mi n wa wun fye ya.”

¹⁰ Mi kpe ma Dagayi nu wa je fye ze ɓe cei, fya vi a ɓeye shi mi vnyi. Shekwoyi ɓa zhin n zahi yi, kwo nyikadona n wo dami n fyei woi dna fye kwoce nyi.

¹¹ Azaho gnalo ge, mi zhin kaciya, n na Yahudiyi awyidna yi waʼazi lo, nge ɓa zhin ɓe shi-shi-yi nu n gni-gni zokwo. To, ngye mi zhin cenu waʼazi, ata shan mi wahala gan, ntuge waʼazi ye ta kni zaho-zahoi bugban. Wahala n na ga mi nyi kwa wu nu ge, mi zhin gni-gni dna n gaiciya ga n Kristi zundu gmanyi nu waʼazi.

¹² Mi cei pma lo, a malami nɓa dami n fyei nge fye sa fye nayi ya n kaciya yi, ɓa ɓa ka n fye to ɓaye zhin dmi n fyei m.

¹³ Emazaje, ala loloya ga fye, to ge loloya fya zhin ɓenukwo yin, ama loloya fya ye na jei fya bma je zhin.

¹⁴ Gama owa vinya dna n wyidna gmanyi ye, “Fye ye na zajei, shi fye ye n fyehin tukwoyi,”

¹⁵ Ama ndei maimakon fye wu ye-ye, fye ce fyei wu anya n na jei, fyei wun aje nu, fye zhin peceiye. Fye zhin peceiye n na jebwi yi.

Vi Zafun Ɓo

¹⁶ Mi ga fye shaula, fye vi Zafun Gyi-gyi-yi ɓowu nu, wo ɓa gna fye aba nfye ɓa lo n nyai n fye ɓa zhin, n lonu fye ta zhin ɓenukwoyi zhin nfye nayi nukwoyi ye fya zhin.

¹⁷ Gama yi gna ye ya zhin ɓo n yi nayi a gnayi ge yi zhin, gbo n nyai n Zafun Gyi-gyi-yi ye ya zhin. Anya manayi n Zafun ye ya zhin ɓa wu gbo n nyai n nayi ye ya zhin. Anya deye ngun aba n ɓafi n yi nayi nyi, ɓa sunkun na jei n na bai ɓa gyi nasara n yi tukwo, ɓai gna ya ɓomwi gna-gna.

¹⁸ Sanu Zafun Gyi-gyi-yi wa wu fye zokwo fye to n apmai lo fyavi a Yahudiyi aɓeknin.

¹⁹ Ama nfya vi fyehin ɓeye, fye ɓa zhin aɓenukwoyi ye, aɓonubozhin nukwoyi, shakpe nukwoyi aɓo awyeda nya.

²⁰ Shangba, alijanu bauta zhin, aza wyegbaci n ɓa to zhin honyan, nuwun n gusun yi, eshe n minagyi yi, n atnazhin yi.

²¹ Eshe anya pwawo nya, zawu, jesin, n na wyefan kasa yi, n na ɓe deye pyai vinya. Ma gna fye njesun shi mi ɓei shin fye gna, oza n wo zhin aɓeye vinya wo ta lo Shekwoyi bemin.

²² Ama, n Zafun Gyi-gyi-yi nu gyi be tu n yi tukwo wo ɓa ɓe n na aɓeye pyai n yi mi. Yeye, bugba-buyi, bugba fu, hakuri azaye n cei ɓemana zhin.

²³ Ɓefyece, zawanshi, peceiye. Aɓeye vinya ta zhin gaba lo na Yahudiyi aɓeknin yin.

²⁴ Aza nɓa zhin Kristi nya ɓa ku nayi zundu n kwa shakpei vinyan kpe nwo zundu.

²⁵ N yi sase lo nsaiyei n Zafun Gyi-gyi-yi iko yi, yi vi Zafun Gyi-gyi-yi ɓowun n yi asese vinya.

²⁶ Nnavun yi ta shan mwa-mwa zanshin akpeyiye na za ba nkwo ɓe nshewo yi nyim.