Agalatiyayi 4 - Alkawali Woiwoyi

¹ Ama fye pa ge n za dada fi, wafa nyabwa dnagmayi ya zhi wo ɓi, n woto mwan, ɓihi to du fyenu lon, sai wola mwa koda-yake, anya vinya n wo dada ɓei fa nyi ɓa zhin wa nyanu.

² Tile wa zhin ɓo n wa guyi a gna wo ge wo zhin, sai wo la si ʼye n wo dada ɓei da.

Shekwoyi Nu Na Lo Yi Ya

³ Kwo ɓei wu lonu n yi-i kafin Kristi wo ɓe, Yi ɓei zhin a Yahudiyi awyidna, n na ɓo kni yi afyenu nu, ntuge yi ɓei gye ge ɓa ɓa mi ɓa gni yi nu.

⁴ Ama sa n sa manayi ɓo la si, sa n Shekwoyi ɓei kni, wa tnu n wo Nugun yi n nyikwoza ba, n na Yahudiyi mi.

⁵ Wa si lo-loya gayi n yi ɓei zhin kwo afyenu nyi, n nabai wa zeyi wa ʼɓi.

⁶ Ntuge yi zhin wa ʼɓi nu, Shekwoyi la tnu n wo Nugun Zafun yi n yi abugba mi, ntu cenu yi ɓa mi ya yi Shekwoyi ge eyi Dada ye-ye yi.

⁷ Yito ye shan a bara nu zhin, ama Shekwoyi aɓi. Shi yi zhin wa ʼɓi nu nyi, nya wo cei vinya kwo zhin yi nya nu, gama nya nu Shekwoyi wa zhin shiri.

⁸ Kafin ofye abyedo fye kpe Shekwoyi ye, fye ɓei zhin ashan afyenu nu n ɓa to n wye-wyei nyin.

⁹ Ama nsaiye shi fyela Shekwoyi bwa nyi (ko miɓa cige Shekwoyi nku fye bwa) ko ɓa zhin wuna nu fya jeze n na vunyi, fya ze afyenu n jesun nya aba n kwo to n kalayin, wyekwoyi, adini n kwo to na pmayi n, fyei zhin a tna fya lo she ntu owa bwashi ɓo?

¹⁰ Fye zhin atna fya bwa Shekwoyi agmada n nya yi n fye zhin, kwo nfye ta zhin m, n na anyipyeyi hoyi, ko apya ho, ko ayeho yi m.

¹¹ Edna wo mi lo ntu fye ɓo. Edna wo mi lo, kwo emi tnu-tnu vinya n fya ba ɓa ze gbeloyi.

Bulus Bugba Zhi-zhiyi

¹² Omi azaje ye-yeyi, a wo mi lo ngye fye ku ze ngye mi, fya wo shi a wo mi lo tu aɓeye tukwo, gama mi kni-kniyi lo n na agma ye shi fye ɓei kni-kniyi nyi. Fye to ɓei ci mi wyegba esa n mi ɓei kmi fye waʼazi zhin nyi m.

¹³ Ko dayake, nyasan ɓei san mi esa n mi ɓei kmi fye ɓe n Nabari manayi Kristi nya yi nyi.

¹⁴ Ko da shike emi nyasan ɓei dami n fyei fye to ɓei nami aɓo fya nya mi yan. Awo, fye ɓei lami fya zhin mi ɓo ngye Shekwoyi malaika ko ngye Yesu Kristi n wohin.

¹⁵ Zafun agmada nya gni na n yi i ɓei gni bwa nyi a? Gama mi kpe lo n na anyipyei hi fye ɓei ɓa kun fya wye n na agmadai fya ga mi–fye ɓei gna fya gye kwo n bmazhinyi n ma ba.

¹⁶ Nsaiye, mila ze fye nunɓayi nu, shi ma gna fye gaiciya.

¹⁷ A malami a katai n ɓa ye fye n tu n fye nyabwa ɓo nu nyi, ɓata zhin ce ntu fye bmazhin ɓo nun. Nya n ɓa zhin atna ɓa zhin nyi, ɓa ye ɓa ka fye ya n minu, n na bai fya wo ɓanu.

¹⁸ Kwo zhin ɓemana nu aza ye fye, n ɓa ye fye n na bugba manayi n bugbayi gmanyi, ngye ɓata ye fye ntuge mi kunsun lo nfyei nun.

¹⁹ O, emi aɓi, fye knimi cilo, mi gni miyi gye azhin shi gye n ɓiya zhi wa gye, woi pmi wa ma ɓi nyi. Mi-i pmi sa n na ɓei nu fye n Kristi yi nyi.

²⁰ Awo mi lo ngye miye gnilo n fyei to ma shan ɓeda layin, ama ntu na ba kpa mwa ɓo layi, mita kpe ɓeye lo n mi ɓa zhin.

²¹ Fye wo mi ɓeda, efye a nugundo n fye zhin nubo ge, sai za shi awyidna bwanu za pwo nyi, knido nu zhin to fyei ɓa nya awyidna ye awyega ɓon ma?

²² Gama a cei kafi, Ibrahim ɓei n na ɓiyi ngun aba, gmanyi owo nyiko bara ɓi, gmanyi owo nyikwo la-layi ʼɓi.

²³ Nyaho to lo n kwo zhin nukwoyi lo n owo nyikwo bara ɓiyin. Ama aɓo ma nyikwo la-layi ɓi n Shekwoyi alkawali avun nu ge wo ɓa tnu n woi.

^24-25 Nsaiye, nabari gaiciya nya ye zhin yi misali nu n Shekwoyi a zokwoyi n gun aba n wo bma za zhin. Wo ɓei zhin ce n Sinai pe sanu n wo ɓei ga Musa awyidna ngun awo. A Larabawa yi Sinai pe nge Hajaratu pe; dna n mi misali, Ibrahim nyikwo bara ɓi zhin Urushelima nu, a Yahudiyi yi nɓa vi zokwoyi nyi ɓanu zhin bara ɓi.

²⁶ Amaeyi zhimi zhin Urushelima eshe nya nu, kwoi to zhin a Yahudiyi aɓo kni fyenu nun.

²⁷ Nyanu n Ishaya ɓei da sanu n wo ɓei zhin anabci ncei ge, “Nsaiye fye ɓa mi fya dagma. Lama, ho ɓa fi aku n na agmadai koda yake hoto shin ʼɓi man. Ntuge miye ma ga ho aɓi nu n mwa begye, ndu do n ho nyikwo-fyenu ɓei n cei.”

²⁸ Efye n miyi, emi azaje, eyi nu zhin aɓi n Shekwoyi ɓei zhin alkawali, shi wo ɓei zhin Ishaku nya nyi.

²⁹ Ntu cenu, eyi n Zafun Gyi-gyi-yi la yi ma nyi, yi sin wahala n aza kun n ɓa ye ya shi a Yahudiyi awyidna bwa nyi. She Ishaku oɓi alkawali nya bei sin wahala n smailu akun n wo nu ɓo zhin fyenu nyikwo-ɓi nyi.

³⁰ Ama littafi a da ge, Shekwoyi ɓei gna Ibrahim ge, wo la fyenu-nyikwo n wo eɓi yi nyaya, ntu ge fyenu-nyikwo ɓi ta gyi Ibrahim puwa gado n kni gado yi n gnisun n nyikwo la-layi ʼɓi yin.

³¹ Emi azaje, yito zhin afyenu aɓinun, n yi ɓa vi a Yahudiyi awyidnan, ama nyikwo la-layi aɓi nu, aza a gwo-gwoi n Shekwoyi aba ntu gaiciyaga ɓo.