Agalatiyayi 1 - Alkawali Woiwoyi

^1-2 Wasika ye gmi n mi aba nu, omi Bulus waʼazi zhin yi, n na Yesu viyi ajeyi, n ɓa nyi n ya nyi. Kwoi lo a ikklisiya aba n ɓa nyi n Galatiya nyi. Aza nu to ɓei yi mi nge mi ɓe ma zhin waʼazi yen, Yesu Kristi nu ɓei yi mi n wohin, n Shekwoyi Dadayi n wo ɓei lawo kala n efi nyi.

³ Fa bugba fu, n anabarkai, n ɓa kun n Shekwoyi Dada aba nyi n Dagayi Yesu Kristi yi ɓa ze efye nya.

⁴ Wa fi ntu yi alaifi ɓo shi Shekwoyi Dada ɓei zhin shiri, wa gni yi n anyi nukwoyi ye n yi fi n ɓa nyi.

⁵ Mwa-mwa vinya kwo zhin Shekwoyi nya nu nyalo-nyalo. Amin.

Nabari Manayi Do To Lom

⁶ Ce womi lo, shi fye pmi awye ya n Shekwoyi n pye, dna n wo yeye nu n sun-sun gyei, n wa yi fye fya vi, fya bwa wye-wyei nyalo-nyalo, n wo ga dna n Kristi nyi. Fye ce fyei vi zokwo do nkwo ta si fyei n she n.

⁷ Gama zokwo do to lo n du odo n ya wu fye nyi m, aza n ɓa shando ɓai pmi Kristi gaiciya bma, ɓanu dna fye kwo ce.

⁸ Fa Shekwoyi knitu kwa tu n zaho-zahoi, n mihin ɓe, n wo zhin gni-gni zokwodo waʼazi n du do n yi ɓei wu fye nyi, e, ko malaikai gmi n she wa zhin waʼazi do gbo n yi nya yi, fa Shekwoyi knitu kwa tu n wo.

⁹ Miɓa je ce da. N za zhin Nabari manayi do waʼazi gbo n doyi n fya gwo nyi, fa Shekwoyi knitu kwa tu n wo tukwo.

¹⁰ Fye gye lo nfyehin, mita ye ma fu fye bugba nu n na ɓeda manayi yin. Miye ma zhin ɓonu n kwo da Shekwoyi. Ndei mi zhin atna ma fu aza bugba nu, ha gye mi to zhin Kristi fyenu nu m.

^11-12 Omi anugundo ye-yei, mi si nyasi ɓehin-hin nya, nge zokwo n kwo lo ʼshe nyi, n mi ɓei zhin fye kwo waʼazi nyi, ko ta gmi n zaho aba nu, ndu Yesu Kristi n wohin tukwo, n wa wumi nya n mi ɓa da. Zaho nu to shan mi wun.

¹³ Fye kpe lo shi mi ɓei wu sanu n mi ɓei ye vi a Yahudiyi kunnu nyi, shi mi ɓei zan a Yesu viyi zanyi n tna sun-sun, ma wu ɓa to a shan ɓa ye won.

¹⁴ Omi nu ɓei zhin a Yahudiyi kunnu viyi hin-hin n yi kni n sahi yi, ma zhin atna shi mi ɓa mi ma vi akunnu n na ɓe kniyi eyi adini nya.

¹⁵ Ama nya ho a zhin. Gama tunyi to ai mamin Shekwoyi ɓo la mi kni ma ze wo nya, wa yimi, n ye-ye dnagmayi n alheri yi.

¹⁶ Wa wu owo ɓi n mi mi, n na bai ma lo a byedo aba, mi wu ɓa Nabari manayi Yesu nya. Sanu n ɓeye ɓei zhin lo nu n mi-i, mi to ɓei lo zaho-zahoi aba ma wu won.

¹⁷ Mito ɓei lo Urushelima ma wu aza lafiya, nɓa ɓei zhin abara n mi abye nyin.

¹⁸ Mi to ɓei lo Urushelima n, sai n aye ngun ata avun, ma gye Bitrus, ma dna nɓo n woi anyipyei n gun awo-cei-atnu.

¹⁹ Bara gmanyi n mi ɓei jegye n sahi, owo nu zhin Yakubu, Yesu mado.

²⁰ (Fye wo oɓo n mi gna fye nyi gama mi gna fye ɓeye n Shekwoyi awyeba nu. Nyanyi n kwo ɓei zhin, mi ta ce akata nu fi fye n.)

²¹ N ziyaraye avun ma lo Suriya n Kilikiyayi.

²² Har nsayi a Yahudiya yi a Yesu viyi to ɓei kpe shi mi wun.

²³ Nya nɓa ɓei bwa kpe gmanyi, kwonu ge ɓa ɓei wo aza ɓai cige, “Oza n wo ɓei zhin yi nuwun yi nyi. Wo zhin gaiciya ga hi nu waʼazi n sayi, n wo bei ye wa wunkwo ya nyi.”

²⁴ Ɓa ga Shekwoyi mwa-mwa ntu mi ɓo.