Afisusuyi 6 - Alkawali Woiwoyi

¹ Aɓi fye vi efye a dada ɓeda, nya nu n kwo kunce fya zhin, gama Shekwoyi nku ɓa kpe n efye eshe.

² Gaho dada mwa-mwa n ho yai, deye kwo nu zhin wyi-dna kmisunyi n Shekwoyi awyidna n gun awo, nkwo zo n alkawali yi nyi.

³ Alkawali yi nu nyi, nge nha gaho dada mwa-mwa n ho yai, oho wyewyei ɓa mwakpa n nu-nu yi n anabarka yi.

⁴ Efye aɓida ce fye wo, fye to zhin efye aɓi ɓa gyi minagyin, fyeto wan ɓa sun. Ama fye wuɓa zokwo ɓa mwa fi n Dagayi zokwo, dna n tata manayi fyei ga ɓa shawara manayi.

⁵ A fyenu fye vi fye a dagayi ɓeda, fye zhin ɓa tnu-tnu n pwawoyi dna, fye zhinɓa tnu-tnu shi fye ɓa zhin Kristi nya nyi.

^6-7 Fye to zhin tnu-tnu n kalayi n fye dagayi awyeba nu kawai n, ama fye zhin tnu-tnu cewo n sai vinya a gye fye zhin Kristi nya, fya zhin Kristi nya, fye zhin Shekwoyi ɓeye n bugbayi gmanyi.

⁸ Fye pa ge Dagayi ɓa gba fye ta ntu fye a tnu-tnu amanayi ɓo, kwo hoi zhin fyenu nu, kwo to hoi zhin fyenu nun.

⁹ Efyehin ce a dagayi fye zhin efya fyenu ɓo n bmiya, shima gnaɓa ge ɓa zhin fye ɓo nyi, fye to fi ɓa edna n, fye pa nge fye zhin Kristi a fyenu nu, efye Dagayi gmanyi nu n ɓai, woi ta zhin taran.

Eyi Akala Kun N Shekwoyi Aba Nu

¹⁰ Nkmasun miye ma gnafye ge, efye akala ɓakun n Dagayi aba nu n ikwoyi dna n fye mi.

¹¹ Fye kpe Shekwoyi akun kaya vinya, n na bai nfye ɓami fya gni-agni n Shetan yi, n wa dabara yi.

¹² Gama yita sunkun n na azai nu, n ɓa zhin nayi n na amiyin, ama n na azai nɓato n nayi n, esu a nukwoyi n awyegma nya, n ɓa gyibe n anyi deye n na aljanuyi n ɓa fi n na anyi bmana nyi.

¹³ Ntu cenu fye zhin apma n Shekwoyi a kun kaya doho-dohoi, fya sunkun n na anuwunyi n zokwo doho-dohoi nɓa kun da fye, sanu n na ku zo fyami zhi n na agni.

¹⁴ Ama ntuge fya mi fya zhin n lonu, tile fya pa shinpanya wao gaiciya n fye eshin, fya ku kpata wato ɓefyece kpe n na agu n Shekwoyi ɓoye nya.

¹⁵ Fye fi abuada n ɓa ɓa da fye zan-zan fyei lo Nabari Manayi da bugbafu nya n Shekwoyi.

¹⁶ Nkun doho-dohoi fye ɓa pma gaiciya ge, kwa ze fye kpata, kwa gwo fye aknawyi ya n shetan shefye nyi.

¹⁷ Fye ɓa kun kata gnigni-nya, n Zafun ebe yakwoyi, wato Shekwoyi ɓeda.

¹⁸ Fye zhin aduwa cici, fye nya Shekwoyi ɓeho-ɓehoi n kwo dna n Zafun Gyi-gyi-yi ɓeye. Fye zhin atna n woi, fye pawo efya bukata ɓo, fye zhin aduwa ntu n na a Yesu viyi aje ɓo n na aba do.

¹⁹ Fye zhin mi aduwa fya nya Shekwoyi, wa gami aɓeda n ɓa kunce, shi mi gna aza Dagayi ɓeda n tna edna, mi-i wuɓa ge gni-gni zhin abyedo nyanu ce.

²⁰ Mi dna n na awun nsaiye, ntu ge mi zhin Shekwoyi ɓeda ye waʼazi nu, ama fye zhin aduwa n na bai n mi ɓa gyi abye n ɓeda yi, n tna edna n kurkuku aba n mi dnanyi.

²¹ Tikikus, emi zado ye-yei gaiciya da, nwo bmami zhin dna n Dagayi tnu-tnu nyi, wo ɓa gna fye shi mi lo n ya.

²² Mi tnu n woi ntu n cenu wa gna fye eyi nabari, n na bai fya bwa bugba kala n ɓei n wa gna fye.

²³ Shekwoyi wo ga fye bugbafu, emi a Yesu viyi aje, n ye-yei, n gaiciya gayi, n Shekwoyi Dada aba n Dagayi Yesu Kristi yi.

²⁴ Shekwoyi alheri n anabarkayi, ɓa kunsun n na azai nɓa ye eyi Dagayi Yesu Kristi n bugbai gmanyi.