Afisusuyi 1 - Alkawali Woiwoyi

¹ Eyi anugundo a Yesu viyi n fye fi n Afisusu, fyei vi Dagayi ɓo cici nyi, miɓi fye gna lo. Bulus nu ka ga fye, n Shekwoyi wa kniwo wa ze Yesu Kristi tnu-tnuyi nyi.

² Fa owo anabarka n bugba fuyi ɓa ze fye nya, n Shekwoyi eyi Dada tnu n cei n Yesu Kristi eyi Dagayi nyi.

³ Yi ci Shekwoyi lo, eyi Dagayi Yesu Kristi Dada n wa tuyi anabarka n anabarka doho-dohoi n shemi, ntuge yi zhin Kristi a nya nu.

Shekwoyi Shiri Dnagmayi

⁴ Tunyi n sapa, to ai zhin anyi n, Shekwoyi wa kni yi n na bai ya ze wo nya, ntuge wa zeyi aza agyi-gyiyi n wo awyeba, ntna laifi, eyi n yi gni-agni zhi n wo abye n wo ye-yei pwi.

⁵ Owo shiri, tna do shanyi nu nyi wa ze yi owo aɓi, cenu a zhin wa tnu Yesu Kristi yi wafi ntu yi ɓo. Wa zhin ce ntuge wo ɓei n cei pma nu.

⁶ Mwa-mwa n Shekwoyi aba ntu n wo alheri ɓo n wo ye-yei nwa zeya puyi, ntuge yi zhin owo Nugun ye-ye yi aɓi nu.

⁷ Owo alheri mwa lo n yi aba har wa eyi alaifi kuya n wo Nugun ami yi, oza n wa gni yi nyi.

⁸ Woi la owo alheri mwa-mwayi ze kpeyi. Gama wo kpeyi ye lo sarai n nya yi n kwo gna bmiya ntu yi ɓo n sayi vinya.

⁹ Shekwoyi ku owo asiri wu yi nkwo ɓei so shi, dalili n wa tnu n Kristi yi, enya n wa zhin shiri dna n sun-sun gye tunyi n sapa.

¹⁰ Owo nufi nu nyi, nge sanu nsa lasi wo ɓa yei zhi n gnisun, aba n yi nyi vinya n eshe kwo n anyi, ya gnisun n woi dna Kristi nyalo-nyalo.

¹¹ Ntu nya ɓo n Kristi n ku zhin, yi ku ze a cauta n Shekwoyi aba n ɓa da wo agma, gama dna n Shekwoyi shiri wo ɓei kni yi tunyi n sapa, aɓo vinya ɓei zhin shiwo ɓo zhin shiri nu.

¹² Shekwoyi ɓeye vinya kwonu ge ya la Shekwoyi tu, ya gawo mwa-mwa ntu n na aɓo a yakwo ye nwa zhin yi nyi, n yi zhin aza kmisunyi n ɓa ga Kristi gaiciya nyi.

¹³ Ntu nya ɓo n Kristi wa zhin nyi, ofye vinya ce n fya wo nabari manayi shi oza ɓa pwo, fya ga Kristi gaiciya nyi, a tufye eze n Zafun Gyi-gyi-yi ge fye zhin Kristi nya nu, oza n na ɓei zhin wo alkawali ga a Yesu viyi nyi.

¹⁴ Owo ase-se n yi mi zhin Shekwoyi tuze nu ge, wo ɓa gayi anya vinya n wa zhin yi alkawali, Zafun ase-se n yi mi wuyi ge Shekwoyi la yi lu si, wa ɓe yi n wohin tukwo aba, dalili nyi n jesun n kwo ɓa zhin ya ci yi Shekwoyi.

¹⁵ Cenu zhin, tunyi esa n mi ɓei wo fye gaiciya ga ɓo dna n Dagayi Yesu, n ye-yei nfye wu a Yesu viyi n nna aba vinya nyi.

^16-17 Mito fa Shekwoyi godiya zhinɓo ntu fye ɓon. Mi zhin fye aduwa n esai vinya mi-i nya Shekwoyi, Dagayi Yesu Kristi Dada, wa ga fye ɓeyekpe, fya gye dei-dei, fya bwa awyega kwo nyikado nu zhin Kristi a, n na aɓei vinya n wo ku zhin fye nyi.

¹⁸ Mi zhin aduwa, n na bai of ye abugba ɓa bwa buzangna, n na bai nfye ɓa gye nya wye n na bye, n wo yi fye fya gni nya bwa n wo yi nyi. Miye fya kpe ge Shekwoyi la ze nyabwai, ntu ge eyi n yi zhin Kristi a nya nyi aku yi gawo.

¹⁹ Mi zhin aduwa ge fye ɓa ya awyega bwa, shi owo iko nyi ge kwa bma aza zhin nu nɓa gawo gaiciya.

²⁰ Iko dnagmayi ye nu bwa jesun n kwo ɓei la Kristi kala n efi, kwa se wo ase tu n Shekwoyi bwai-zhe-bwa n eshe.

²¹ Ndu esu doho-dohoi, kwo abegyiyi doho-dohoi. E, owo mwamwa du zaho-zahoi nya lo, n na anyi ye kwo anyi do n ɓaye ɓeɓelo nyi.

²² Shekwoyi ku anya fi n wo apita sinta woi lawo ze Tukwoda ikklisiya nya vinya.

²³ Nkwo zhin wo nayi nyi n nu-nuyi n wohin tukwoyi Tukwoda n Nyagayi doho-dohoi nya, abaho-bahoi.