Afilibiyi 4 - Alkawali Woiwoyi

Beda Kmaknayi N Wyegyi-i

¹ Omi Yesu viyi aje, mi ye fye lo, ofye awye ko milo, ntuge ofyenu zhin mi bugba buyi, n mi tnu-tnu ladayi, Omi a nugundo yeyeyi, fye ku mi zhi dna Dagayi.

² Mi cei pma lo ma tna Afodiya abwa n Sintikiyi, mi gyi fye wye dna n Dagayi fye to je anya wun. Fye ku ze anugundo n jesun.

³ Ma gna fye, emi a tnu-tnu kun-zhin yi n gaiciya yi, fye bma anyikwoza ye zhin. Ntu ge ɓa ɓei ku tnu-tnu kun zhin n miyi dna n Nabari manayi waʼazi zhin. Ɓa tnu-tnu ngnisun zhin Klement n mi azaje yi n ɓa aye kafi lo n lifafi wye-wyeyi nya nyi.

⁴ Fye nu-nu agmadai cici n Dagayi, ma jeci ge, fye dagma.

⁵ Fye fa aza ɓa kpe ge fye ta gna fyehin tukwo ye lon, fyei zhin ɓo n kwo kunce. Fye pa-ge Dagayi ɓelo esa fyewyi.

⁶ Fye to damu ntu n nyaho-nyahoi ɓon, fye gna Shekwoyi efye abukata, to fya ze amwi fya sawa mi ntu na amsa ɓo n.

⁷ Nfya zhin lo nu fye ɓa bwa Shekwoyi bugba fu, n kwo du gbagyiza bugba kala wa kpe kwo ye. Owo bugba fu ɓa wan fye anubo zhin shi, efye abugba ɓa bwa sunsun, fyei ya ga Kristi gaiciya.

⁸ Nsaiye emi azaje, shi mi zo wasika ye nyi, wuye ma gna fye ɓeye n kma-sun. Fye la wye dna n gaiciya, ni ɓoyi n kwo bmiya. Fye zhin aɓo nubo n ɓa gyi-gyi-yi n bmiya, anya n ɓa gyi-gyi-yi n fi n na azaje, fye zhin nubo n nyai n fye ɓa ci Shekwoyi, fyei dagma.

⁹ Fye gyi abye n na aɓe zhinyi n fye ɓei tumwi n mi, fya gye mi mi-i zhin.

¹⁰ Adami lo, mi-i ci Dagayi shi fye bmami zhin njesun, mi kpe lo a zhin a wo fye fwa fya tnu mi n nya yi n fye ɓa mi, ama n sadohoi fye to ɓei n sayin.

¹¹ To ge mi ɓei dna n esan gyi n, gama mila tumwi ma sa se n bugba buyi kwo mi n nyai mwa ko to mi-i n cei n.

¹² Mi kpe lo shi mi ɓa sa se n tnanya ho kwo mi-i n nyahoi. Mi la tumwi shi mi ɓa sase n nyahonyahoi, kwo nubo fu, ko mikun, kwo nyabwa ko sangyi.

¹³ Gama mi ɓa mi ma zhin nyaho-nyahoi n Shekwoyi a gnami dna n Kristi bmazhin n wo gami kala n iko yi nyi.

¹⁴ Ama dudu lo nu, fye ku zhin n bmiya n fya bma mi zhin dna n mi wahala n saiye nyi.

¹⁵ Shi fye kpe lo nyi, sanu n mi ɓei kmi fye ɓe n nabari manayi nyi, ma godiya ma fa Makidoniya, ofye a Filibiyi nu ɓei bwami a nugundo zhin n nyaga ngwo-gwo yi. Ikklisiya ho to ɓei shan deye pya zhin.

¹⁶ Har esa n mi ɓei dna n Tasaluniki fye ɓei tnu mi n bmazhin yi abwa ba.

¹⁷ Ama ko da yake adami lo n fye acautayi, enya n kwo gnami agmada lo okwonu zhin lada yakwo, n fye ɓei bwa n she ntu n fye alheri ɓo nyi.

¹⁸ Nsaiye, mi n na anya yi lo-lo n mi ye n mwa, anya n fye ɓei ga Abafraditus wa ɓemi n cei nyi, Ɓa zhin nyaga sundayi nu n kwo da Shekwoyi agma n mwa.

¹⁹ Owo nu ɓa ga fye anya vinya dna n wo nyabwa n mwa-mwa, ntu n nyaɓo n Kristi Yesu ku zhin gayi nyi.

²⁰ Nsaiye mwa-mwa vinya kwo kunsun n Shekwoyi eyi Dadayi, nyalo-nyalo. Amin.

²¹ Fye ɓi a Yesu viyi gna vinya n ɓa nyi n ɓo nyi. Azaje n ɓa nyi n miyi nyi ɓa ɓi fye gna lo.

²² A Yesu viyi n ɓa nyi n ya nyi ɓa ɓi fye gna lo, tun baga aza n ɓa zhin tnu-tnu n Kaisar puwa nyi.

²³ Eyi Dagayi Yesu Kristi anabarka ɓa kunsun n fye zafun yi. Amin.