Afilibiyi 2 - Alkawali Woiwoyi

Yi Zhin Ngye Yesu

¹ Enya lo n na a Yesu viyi ai yi ge atna-zhin? Fye ye mi lo har fyei ye fya bmami zhin? Kwo zhin nyaho nu n fye aba nge yi zhin a zaje nu dna n Dagayi, yi n Zafun gmanyi lo? Ofye abugba n na atnazhin yi lo n bugba bwa yi?

² To fye zhin mi ma dagma ɓehin-hin nya, fya ye n na jeyi n bugbai gmanyi, fyei zhin tnu-tnu n gnisun n bugbai ɓedo n ɓemwi gmanyi.

³ To ye hohin tukwon, to zhin ɓo n na bai aza ci hon, gba hohin tukwo, ha gye azaje ndu hohin.

⁴ To zhin hohin tukwo aɓonu nubo gmanyi n, ama zhin nubo n na zaje nyai ɓe, n ɓei n ɓa zhin.

⁵ Kwo bmiya efye hali kwa wu ngye odo n Yesu Kristi ɓei wu yi nyi.

⁶ Oza nu, kwo da yake wo ɓei zhin Shekwoyi nu, wo to ɓei gyima nge wo zhin Shekwoyi nu n.

⁷ Ama wa kma owo mwa-mwa ya zhi n ikoyi, wa gba wohin tukwo wa ze zanyikwoci ngye fyenu.

⁸ Wa gba wohin tukwo n du-du, wa fi ngye evi fi tu n zundu.

⁹ Ntu cenu Shekwoyi ɓei la wo kala tu n eshe wa ga wo eye ndu aye aje vinya.

¹⁰ Nnabai n Yesu ye nyikutukwo doho-doho n she mi, n anyi mi yi, n anyi sintai ɓei ca kwokwo.

¹¹ Nyitala doho-dohoi ɓei cige, Yesu Kristi nu zhin Dagayi dna Shekwoyi Dada mwa-mwa.

¹² Omi a nugundo yeye yi, sanu n mi ɓei gnisun n fyei, fye ɓei vi mi ɓo-wu peceiye. Shi mi to gni lo n saiye nyi n, fye zhin peceiye fya vi aɓo vinya n ɓa ɓe n gni-gni, avun Shekwoyi mwa-mwa ga, n dna yi, fyei ta na avun yi n nya n kwo ɓa wun wo bugba ya.

¹³ Ntuge Shekwoyi nu zhin tnu-tnu n fye mi, Woi bma fye zhin n nabai fya wowo ɓeda, fya zhin ɓo n wo cei pma fya zhin.

¹⁴ Nyaho-nyahoi n fye ɓa zhin, fye bui gunu-gunu da si na ɓena yi, na jeyi.

¹⁵ Nna bai n zaho ta bwa fye laifin. Fye sase n gyi-gyi-yi. Ntna cegye, Shekwoyi aɓi nfi n wyegma anyi ye nya n na za nukwoyi n ɓa ta wo ɓon. Fye bmiya na n ɓa mi ngye a fitila. Fya ku ze a buzangna.

¹⁶ Fyei wuɓa Nabari wye-wyeyi nya. Sanu n Kristi bei jeze ɓe ncei, aɓei da mi n mwa, nge emi tnu-tnu n fya ba to ze gbeloyin.

¹⁷ Ngye aɓa emi ami zeya nu ntu n fye gaiciya ga ɓo n mi ga Shekwoyi kwo ngye hadaya nyi, wato ngye mi ba fi ntu fye ɓo nu, aɓa dami n mwa, mabwa agmada ngnisun nfyei.

¹⁸ Gama kwo kunce lo fya bwa bugba bui-bui ntu n ce, fya dagma n mi yi ntu n esa ɓo n mi la bwa ma fi ntu fye ɓo nyi.

Bulus A wyekwo

¹⁹ N Dagayi wa ye, mi ɓa tnu n Timatawus yi esa fyewyi wa gye fye wye. N wa jeze ɓe wo ɓa fu mi bugba wa wu mi efye lafiya, shi fye zhin lo.

²⁰ Oza to lo woi ye mi ngye Timatawus n.

²¹ Zaho-zahoi ce woi wo wohin nu ɓo, to woi shan Yesu Kristi ɓo won.

²² Ama fye kpe Timatawus ye lo. Wo la ze n gye mi ɓinu, woi bma mi nabari manayi waʼazi zhin.

²³ Mi ɓatnu n woi sa fyewyi, n ma ku kpe nya ye n kwo ɓa bwa mi ya.

²⁴ Mi ga Shekwoyi gaiciya lo ge, esa fyewyi mi ɓa ɓe ma gye fye wye.

²⁵ Nsaiye mi gye kwo bmiya lo matnu n Abafraditus yi nfya ba. Fye ɓei tnu woi wa bma mi zhin dna n mi bukata, to, owo n miyi, yi ku ze aya ɓi, yi ku ze yi zhin tnu-tnu, yi sunkun n gnisun.

²⁶ Nsaiye mi tnu woi lo n na api n jesun, ntu ge api awye n lawo kwo, woi la damu shi fye ɓei ku wo ge nyasan ɓei ku san wo.

²⁷ Nyasan ɓei ku san wo n mwa, har wo ɓei la wo viwyi n fiyi. Ama Shekwoyi ɓei ku gye wo sun-sun, n mi yi ɓe, to wa ye ge ma bwa bugba zhiyi tu n deye tukwo n.

²⁸ Ntu cenu a gnami wolo n gye mi tnu n woi n fya ba njesun, gama mi kpelo shi aɓei da fye nsun fyei yagye wo. Ce ɓa da mi kwa cemi bugba wum bma.

²⁹ Fye zhin wo amabe dna n Dagayi n bugba buyi, fya wu fye agmada.

³⁰ Gama wo ɓeye wa fi ntu n Kristi tnu-tnu ɓo, sanu n wo ɓei zhin atna, wa zhin mi ɓo n fye to mi zhin ntu ge fye lo n kpai.