మార్కు 16 - Mudhili Gadaba

ఏశు జీవేరి సిల్కుదాండ్

¹ విశ్రాంతి రోజు చెయ్యాన్ బెలేన్, మగ్దలేనేటె మరియ, యాకోబున్ ఆయ మరియ పెటెన్ సలోమి, ఏశున్ మేనుతున్ మారుకున్ పైటిక్ వాసన నెయ్యు పత్తి వన్నెవ్.

² ఓరు వారంటె మొదొల్టె రోజు వేగ్దాన్ బెలేన్ సిల్చి వేలె పేతాన్ బెలేన్ సమాదితిన్ వారినుండెటెవ్.

³ వర్తుండగా, “అం కోసం అయ్ కండు ఎయ్యిర్ పుచ్చి చీదార్?” ఇంజి ఒక్కాల్నాట్ ఒక్కాల్ పర్కేరినుండేటెవ్. (అయ్ కండు బెర్రిత్ మంటె)

⁴ అప్పుడ్ ఓరు వారి చూడ్దాన్ బెలేన్ అయ్ కండు పుచ్చేరి మంటె.

⁵ అందుకె ఓరు లోపున్ నన్దాన్ బెలేన్ తెల్లన్టె చెంద్రాల్ నూడి మెయ్యాన్ ఉక్కుర్ ఇల్లేండ్ చేపాల్ ఉండాన్ పక్క ఉండి మనోండిన్ చూడి బంశెన్నోర్.

⁶ అప్పుడ్ ఓండు, “నరిశ్మెర్! సిలువ ఎయ్యాతాన్ నజరేయుడియ్యాన్ ఏశున్ ఈము కండ్కిదార్. ఓండు జీవేరి సిల్చి మెయ్యాండ్, ఇల్లు మనాండ్, ఇయ్యోది, ఓండు ఓడి మనోండి బాశె.

⁷ ఈము చెంజి, ఏశు ఇం కంట ముందెల్ గలిలయతిన్ చెన్నిదాండింజి ఓండు ఇమ్నాట్ పొగ్దార్ వడిన్ అల్లు ఈము ఓండున్ చూడ్దారింజి ఓండున్ శిషుల్నాట్ పేతురు నాట్ ఇప్పాడ్ పొక్కుర్.” ఇంట్టోండ్.

⁸ ఓరు పైనె వారి బంశేరి తిర్గి సమాదికుట్ వెట్టిచెయ్యోర్. ఓరు నర్చి ఎయ్యిర్నాటె ఎన్నాదె పొక్కుటోర్.

ఏశు మగ్దలేనేటె మరియన్ ముందెల్ తోండేరిదాండ్

⁹ వారంటె మొదొల్టె రోజు వేగ్దాన్ బెలేన్ ఏశు సయ్యి జీవెద్దాన్ తర్వాత, ఏశు ఏడు వేందిసిల్ ఉద్లాతాన్ మగ్దలేనేటె మరియన్ ముందెల్ తోండేండ్.

¹⁰ ఏశున్ శిషుల్ బెఞ్ఞపత్తి ఆడి మెయ్యాన్ బెలేన్, అయ్ ఆస్మాలు చెంజి అయ్ సంగతి ఓరున్ పొక్కెటె.

¹¹ ఏశు జీవేరి మెయ్యాండింజి అదున్ తోండేండింజి ఓరు వెంటోర్ గాని నమాపుటోర్.

ఏశు ఇరువుల్ శిషులున్ తోండేరిదాండ్

¹² అయ్ తర్వాత, ఓర్తున్ ఇరువుల్ ఉక్కుట్ పొలుబ్తున్ తాకి చెన్నినుండేర్. అప్పుడ్ ఏశు వేరె రూపం వడిన్ ఓరున్ తోండేండ్.

¹³ ఓరు చెంజి మెయ్యాన్ శిషుల్నాట్ పొక్కెర్ గాని ఇయ్యోరె పాటె మెని నమాపుటోర్.

ఏశు ఆరె మెయ్యాన్ శిషులున్ తోండేరిదాండ్

¹⁴ ఆరొక్నెశ్ పదకొండు మంది శిషుల్ బంబు ఉన్నున్ పైటిక్ ఉండి మెయ్యాన్ బెలేన్, ఓరున్ ఏశు తోండెన్నోండ్. ఓండు సయ్యిజీవేరి సిల్తాన్ తర్వాత, ఓండున్ చూడ్తేరిన్ పాటెల్ ఇయ్యోరు నమాకున్ మన. అందుకె ఓరె నమ్మకం మనాయె, కండు వడిటె హృదయమున్ చూడి ఓండు ఓరున్ గశ్రాతోండ్.

¹⁵ ఆరె ఏశు ఓర్నాట్, “లోకమల్ల చెంజి పట్టిలొక్కు నాట్ సువార్త పొక్కుర్” ఇంజి పొక్కేండ్.

¹⁶ “నమాసి బాప్తిసం పుచ్చెద్దాన్టోర్ రక్షణ పొందెద్దార్, నమాపయోర్ శిక్ష పొందెద్దార్.

¹⁷ నమాతాన్టోర్ బంశెద్దాన్ బెర్ కామెల్ కెద్దార్, ఏరెవింగోడ్ అన్ అధికారం నాట్ వేందిసిలిన్ ఉద్లాతార్, పున్ పాటెల్ పరిగ్దార్.

¹⁸ ఆరె ఓరు బామ్కుల్ పత్గోడ్మెని, సయ్యోండి ఏరెద్ ఉన్గోడ్ మెని అదు ఓరున్ ఎన్నాదె కెయ్యా. నియ్యామనాయోరున్ పొయ్తాన్ కియ్గిల్ ఇర్రి ప్రార్ధన కెద్దాన్ బెలేన్ ఓరు నియ్యెద్దార్.” ఇంజి ఓర్నాట్ పొక్కేండ్.

ఏశు పరలోకంతున్ మండి చెన్నిదాండ్

¹⁹ ఇప్పాడ్ ఏశు ప్రభు శిషుల్నాట్ పరిగ్దాన్ తర్వాత, పరలోకంతున్ తేడ్చేరి దేవుడున్ ఉండాన్ పక్క ఉండేండ్.

²⁰ అప్పుడ్ ఓరు పేచి లోకమల్ల ఏశున్ గురించాసి పొక్కెర్. ప్రభువు ఓరున్ తోడేరి మంజి కామెల్ కేగిన్ ఇర్నోండ్.