ሶፎናሳ ቲንቢቴ 3 - ጋሞ ማጻፋ

ዬሩሳላሜስ ሲንፌ ያና ቃዳ

¹ ማካላንቻይሲኔ ቱኒዳሪስ፥ ኣስ ኡንኤዛይታ ካታማይስ ኣዬ ኣና!

² ኢዛ ኦናስካ ኣዛዜቱኩ፤ ኦኒ ዞሪንካ ኤኩኩ፤ ጎዳንካ ኣማኔቱኩ፤ ባ ጾሳኮካ ሺቁኩ።

³ ኢዞ ካሌዛይቲ ጻጊዛ ጋሞ ማላ። ኢዞ ኣይሲዛይቲካ ዎንቶስ ኣሾንታ ሚዛ ካና ሱይቴ ማላ።

⁴ ኢዚን ዲዛ ናቤቲ ኦቶራንቻታኔ ኣስ ባሌዛይታ። ቄሴቲ ጾሳ ኬ ቱኒሴቴስ፤ ዎጋ ቦላካ ማካሌቴስ።

⁵ ኢዚን ዲዛ ጎዳይ ኢዚ ጺሎ። ሙሌካ ባሌቲ ኤሬና፤ ማላዶ ማላዶ ሱሬ ፒርዴስ፤ ኡባ ጋላሲካ ዳቡሪ ኤሬና፤ ጊዶ ኣቲን ማካላንቻታስ ዬላይ ዴና።

⁶ ጎዳይ፥ «ታኒ ዴሬታ ይሳዲስ፤ ኢስታ ሚጻይ ሙሌራ ይዴስ፤ ኦኒካ ኢዛራ ኣንታ ማላ ኢስታ ኦጌ ካይዚሳዲስ፤ ኢስታ ካታማቲ ሙሌራ ይዳ፤ ኢሲ ኣሲካ ዴና፤ ኢስታን ዴኣናይካ ዴና።

⁷ ታ ሄ ካታማዮ፥ ቱማፔ ኔኒ ታስ ያያና፤ ታ ሴሪሺን ኔ ኤካና ጋዲስ ሺን፤ ሄሳ ጊሻስ ኢዚ ዱሳሶይ ዬና፤ ኢዚ ቦላ ቂጻቴይ ጋኬና። ጊዶ ኣቲን ታ ዴሬይ ኢታ ኦሶን፥ ካሴፔ ጌዴ ሚኒ ሚኒ ቢዴስ» ጌስ።

⁸ ጎዳይ፥ «ሄሳ ጊሻስ ታ ፒርዳና ጋላሳይ ጋካናስ ዲሺቴ፤ ታኒ ዴሬ ኣሳኔ ካዎታ ሺሻናስ ቃቻዲስ። ታኒ ታ ሚኖ ሃንቆዛ ኢስታ ቦላ ጉሳናስ ቃቻዲስ። ታ ሃንቆ ታማን ኩሜ ቢታይ ኤጻና።

⁹ ሄ ዎዴ ኣሳይ ኡባይ ጎዳ ሱን ጼይጋና ማላኔ ሲጋን ኢዛስ ሃጋዛና ማላ ታ ኢስታ ዶና ጌሻና።

¹⁰ ቶጵያ ሻፋታፔ ሄ ፒንን ላሌቲ ዲሼ ታስ ጎይኒዛ ታ ዴሬይ ታስ ያርሾ ኤሃና።

¹¹ ኢንቴ ታ ቦላ ፖሊዳ ቆሆ ኡባፌ ዴንዲዳይሳን፤ ሄ ጋላስ ዬላቴኬታ፤ ባ ኦቶሬቴን ኡፋዬቲዛይታ፥ ሃኖ ሃ ካታማይፔ ታ ዲጋና። ሄሳፌ ጉዬ ታ ጌሻ ዙማን፥ ኢንቴ ታ ቦላ ኦቶሬቴኬታ።

¹² ጎዳ ሱንን ኣማኔቲዛ፤ ኣሽኬታኔ ባንታና ካዉሺዛይታ፤ ታ ኢንቴ ጊዶን ኣሻና።

¹³ ኢስራኤሌፔ ጫሻ ኣቲዳይቲ ናጋራ ኦሴቴና። ዎርዶ ሃሳዬቴና፤ ኢስታ ዶናንካ ጌኔ ሃሳያይ ዴና። ሄሳ ጊሻስ ኢስቲ ሚዲ ሳሮን ዴኣና፤ ኢስታ ባቢሳና ሚሺካ ዴና።

¹⁴ ሃኔ ጺዮኔ ናዬ ኣኔ ዬጻ! ኢስራኤሌ ኣሳዉ ኣኔ ኢሊሊቴ! ሃኔ ዬሩሳላሜ ናዬ! ኩሜ ዎዚናፔ ኡፋዬታ! ኡፋዬታሼ ሃሹ ጋ!

¹⁵ ጎዳይ ኔ ቦላ ዪዛ ቂጻቴዛ ዲጊዴስ፤ ኔ ሞርኬታካ ኔፔ ዛሪዴስ። ጎዳይ ኢስራኤሌ ካዎይ ኔናራ ዴስ፤ ሃይሳፌ ጉዬ ኣይ ኢታሲካ ባባካ።

¹⁶ ሄ ዎዴ ኣሳይ ዬሩሳላሜስ፥ ‹ጺዮኔ ኔ ባቦፋ፤ ኔ ቄሴይ ዳቡሮፖ።

¹⁷ ጎዳ ኔ ጾሳይ ኔናራ ዴስ፤ ኢዚ ኣሺዛ ሚኖ ኦላንቻ። ኢዚ ኔናን ዳሮ ኡፋዬቴስ፤ ኢዚ ባ ሲቆን ኔና ዎፒሳና፤ ኔ ዬን ኢዚ ቦንቼቲዲ ኡፋዬታና› ጋና።

¹⁸ «ቦንቾ ባኣሌ ጋላሳቲ ኣቲዳ ጊሻስ ኔኒ ሙዞቲዳይሳኔ፥ ኔስ ቶሆ ጊዲዳ ዬላ ታ ኔፔ ዲጋና።

¹⁹ ሄ ዎዴ ኔና ኡንኤዳይታ ታ ቃጻያና። ዎቤታ ታ ኣሻና፤ ላሌቲዳይታካ ታ ሺሻና። ኢስቲ ካዉዪዳ ዴሬ ኡባን ታ ኢስታ ቦንቾሲኔ ሳባስ ጋና።

²⁰ ሄ ዎዴ ታ ኢንቴና ሺሻና፤ ኢንቴ ዴሬ ታ ኢንቴና ዛራና። ኢንቴ ኢንቴ ኣይፌራ ቤዪሺን፥ ኢንቴፌ ዲኤቲዳ ሚሻ ታ ኢንቴስ ዛሪዛ ዎዴ ቢታ ቦላ ዲዛ ዴሬ ኡባ ሲንን ታ ኢንቴስ ሳባኔ ቦንቾ ኢማና» ጌስ።