ሶፎናሳ ቲንቢቴ 2 - ጋሞ ማጻፋ

¹ ኢንቴኖ ዬላይ ባይንዳ ዴሬቶ! ኣኔ ኢሲ ቦላ ሺቂቴ!

² ባሻ ጋላሳይ ጋካናፔ ካሴቲዲ፥ ሄ ጋላሳይ ሱላ ማላ ዴን ይሶንታ ዲሺን፥ ጎዳፔ ሚኖ ሃንቆይ ኢንቴ ቦላ ዮንታ ዲሺን ጎዳፔ ባሻ ጋላሲ ኢንቴ ቦላ ጋኮንታ ዲሺን ሺቂቴ።

³ ኢንቴኖ ቢታ ቦላ ዲዛ ኣሽኬቶ፤ ኢዛ ኣዛዞካ ፖሊዛይቶ! ጎዳ ኮዪቴ፤ ጺሎቴኔ ኣሽኬቴ ኮዪቴ፤ ጎዳ ሃንቆ ጋላሳፌ ኢንቴ ኣታናኮ ኦኔ ኤሪዛይ!

ፊሊስጼሜ ዴሬ ቦላ ዮቴቲዳ ፒርዳ

⁴ ጋዛይ ቡላ ቢታ ጊዳና፤ ኣስቄሎናይካ ላሌታ ኣታና። ኣዛጾኔይ ሴታ ጋላስ ካይዛና። ኣቃሮኔይ ሾዴታና።

⁵ ኢንቴኖ ኣባ ኣቻን ዲዛይቶ! ኬሊቴ ዴሬ ኣሳቶ፥ ኢንቴስ ኣዬ ኣና! ፊሊስጼሜ ዴሬ ኣሳይ ዲዛ ካናኔ ቢታዬ! ኔ ቦላ ዮቴቲዳ ጎዳ ቃላይ ሃይሳፌ ካሊዛይሳ፤ «ታ ኔና ሙሌራ ይሳና፤ ኔናን ዲዛ ኣሳፔ ኣታና ኣሲ ዴና።

⁶ ካሊቴ ኣሳይ ዲዛ ኣባ ኣቻ ቢታይ ሄንንቻታ ዱሳሶኔ ዶርሳ ዪሬ ጊዳና።

⁷ ሄሲካ ዩሁዳፔ ጫሻ ኣቲዳይታስ ጊዳና፤ ኢስቲካ ሄን ባስ ኣቆታ ዴማና፤ ጋዴይ ቃሚሺን ኣስቄሎና ካታማን ዲዛ ኬታን ኣቃና፤ ጎዳይ ኢስታ ጾሳይ ኢስታ ናጋና፤ ኢስታፌ ዲኤቲዳይሳካ ኢስታስ ዛራና።»

ሞኣቤ ቦላኔ ኣሞኔ ቦላ ዮቴቲዳ ፒርዳ።

⁸ ጎዳይ፥ «ሞኣቤ ኣሳይ ጫዪዛይሳኔ ኣሞኔ ኣሳይ ቂዛይሳ ታ ሲያዲስ። ታ ዴራ ጫዪዳ፤ ኢስቲ ታ ዴራ ቦላካ ማንዲዳ» ጌስ።

⁹ ሄሳ ጊሻስ ጎዳይ ኡባፌ ዎልቃማ ኢስራኤሌ ጾሳይ፥ «ታኒ ታ ዴኦ ጾሳቴን ጫቃይስ፤ ሞኣቤይ ሶዶሜ ማላ ኣሞኔይ ጋሞራ ማላ፥ ሻራፋይ ማይኢዳሶ ማላኔ ማጺኔ ቦኪ ኤኪዳ ኦላ ማላ ሜርናስ ቡላ ጊዳና። ታ ኣሳፔ ጫሻ ኣቲዳይቲ ኢስታ ሃሮ ቦንቃናኔ ኢስታ ቢታ ላታና» ጌስ።

¹⁰ ባንታ ኦቶሮቴፌ ዴንዲዳይሳን ኢስቲ ኡባፌ ዎልቃማ ጾሳ ዴራ ጫዪዳ ጊሻሲኔ ቂዳ ጊሻስ ሄሲ ኢስታ ቦላ ጋካና።

¹¹ ጎዳይ ሄ ቢታ ኤቃ ጾሳታ ኡባ ይሲዛ ዎዴ ኢዚ ኢስታ ያሺሲዛይሳ ጊዳና፤ ኣባ ኣቻን ዲዛ ዴሬቲ ኡባይ ኢሶይ ኢሶይ ባ ዲዛሶን ዲሼ ኢዛስ ጎይናና።

ቶጵያ ቦላኔ ኣሶሬ ቦላ ዮቴቲዳ ፒርዳ

¹² «ኢንቴኖ ቶጵያ ኣሳቶ! ኢንቴ ታ ማሻን ሲፌታና።»

¹³ ኢዚ ባ ኩሼ ፑዴሃ ባጋን ዲዛ ዴሬታ ቦላ ዴንና፤ ኣሶሬ ይሳና። ናናዌካ ቡላሳና፤ ባዞ ቢታ ማላ ሜሊሳና።

¹⁴ ዶርሳ ዉዴይኔ ሜሄ ዉዴይ፥ ሜቴፌ ኡባ ቆሞይ ሄን ሼምፓና። ጉቶይኔ ቁጻርሲ ኢዚ ጊምቤታን ኣቃና። ኢስታ ዋሶይ ማስኮቴታራ ሴቴታና። ጊምቤዛ ላሌ ኢሳ ኢሳ ፔንጌን ዶሬታና፤ ኬታ ቶኪ ኤቂዳ ዚጋ ጎዳቲ ካሎታና።

¹⁵ ካሴ ኡፋይሳን ዲዛ ካታማያ ሃኖ፤ ኢዛካ ባ ዎዚናን፥ «ታ ጻላ ዳይስ፤ ታፔ ሃራይ ኦኒካ ዴና» ጊዳራ ሂስቲን ሃኢ ዋናዳ ዎራ ዶኣቲ ጉሪዛሶ ባዞ ቢታ ጊዳ ኣታዴ? ኢዚ ኣቻራ ኣ ቢዛ ኡባይ ኢዞ ቂሼ ባ ኩሼ ዉጼስ።