ሶፎናሳ ቲንቢቴ 1 - ጋሞ ማጻፋ

¹ ኣሞጼ ና ኢዮሲያሲ ዩሁዳን ካዎቲዳ ዎዴ ሂዝቂያሳ ና፥ ኣማሪያ ና፥ ጎዶሊያሳ ና፥ ኩሼ ና ሶፎናሳኮ ዪዳ ጎዳ ቃላይ ሃይሳፌ ካሊዛይሳ።

ጎዳፔ ያና ፒርዳ

² ጎዳይ፥ «ታኒ ቢታ ቦላ ዲዛዝ ኡባ ይሳና» ጌስ።

³ ጎዳይ፥ «ኣሴኔ ሜዶሳታ ይሳና፤ ሳሎ ካፎታኔ ኣባ ጊዶን ዲዛ ሞሌታ ታ ይሳና፤ ታ ኣሳ ዜሬ ቢታ ቦላፌ ይሲዛ ዎዴ ኢታቲ ላሌቲዳ ቡራ ዶሬ ማላ ጊዳና» ጌስ።

⁴ ጎዳይ፥ «ታኒ ዩሁዳኒኔ ዬሩሳላሜን ዲዛ ኣስ ኡባ ቃጻያና፤ ቃሴካ ባኣሌ፥ ኢስታ ኤቃ ጾሳታኔ ላይማቲዛ ቄሴታ ሃይሳፌ ታ ሚልጺ ሂስታ ይሳና።

⁵ ፎቄ ቦላ ኬዚዲ ሳሎ ሜቴታስ ጎይኒዛይታ፥ ጎዳስ ጎይኒሼኔ ኢዛ ሱንን ጫቂሼ ሲሚ ዎዲ ቃሴ ሚልኮሜ ሱንን ጫቂዛይታ፥

⁶ ጎዳ ካላናፔ ጉዬ ሲሚዛይታ፥ ጎዳ ኮዮንታይታ፥ ኢዚ ኢስታ ማዳና ማላ ኦይቾንታይታ ታ ይሳና» ጌስ።

⁷ ጎዳ ጋላሳይ ማቲዳ ጊሻስ ኡባ ሃሪዛ ጎዳ ሲንን ጮኡ ጊቴ፤ ጎዳይ ያርሾ ጊግሲዴስ፤ ባ ጼይጊዳይታ ባስ ዱማሲዴስ።

⁸ «ጎዳ ያርሾ ጋላስ ዳናታኔ ካዎዛ ናይታ፥ ኢማ ማይኦ ማይኢዛይታ ኡባ ታ ቃጻያና።

⁹ ሄ ዎዴ ኣላጋ ጾሳታ ፔንጌን ጉፒዛይታ፥ ባንታ ጎዳታ ኬ ማካላቴኒኔ ባሌን ኩንዛይታ ታ ቃጻያና» ጌስ ጎዳይ።

¹⁰ ጎዳይ፥ «ሄ ዎዴ ሞሌ ፔንጌ ባጋራ ዋሶይ፥ ካታማስ ናምኣን ዱቡሻን ዬሆይ፥ ዙምቡላታ ቦላ ጊታ ሺሮይ ሲዬታና።

¹¹ ኢንቴኖ ማኪቴሻ ጊያን ዲዛይቶ! ዋሲቴ፤ ጋሶይካ ኢዛን ዛልኢዛ ዛልኣንቻቲ ኡባይ ዉራና፤ ቢራን ዛልኢዛይቲካ ኡባይ ሃይቃና።

¹² ሄ ዎዴ ታ ዬሩሳላሜ ጊዶዛ ጾምፔራ ኮያና፤ ኣይኮ ሂርጋይ ባይንዳ ባ ጊ ኡቲዳይታ፥ ዎይኔ ኡሹ ጋጪ ኤኪቺን ኦርጮ ቦላ ኣቲዳ ዎይኔ ኡሻ ማላ ጊዲዳይታ፥ ‹ኢታ ጊዲን ዎይኮ ሎኦ ጊዲን ጎዳይ ኣይኮካ ኦና› ጊዛይታ ታ ቃጻያና።

¹³ ኢስቲ ሃሪዳ ሃሮይ ቦንቄታና፤ ኢስታ ኬይ ላሌታና፤ ኢስቲ ኬ ኬጻናሺን ባ ኬጺዳ ኬን ዴቴና፤ ዎይኔ ሚ ቶካናሺን ባ ቶኪዳ ዎይኔዛፔ ኦሴቲዳ ኡሻ ኡዬቴና» ጌስ።

ዎልቃማ ጎዳ ጋላሳ

¹⁴ «ጎዳፔ ያና ጊታ ጋላሳይ ማቲዴስ፤ ሄሲካ ኤሶን ያና፤ ጎዳ ጋላሳን ሲዬታና ዬሆይ ጫሞ፤ ሄን ኦላንቻቲ ጫሞ ዋሶ ዋሳና።

¹⁵ ሄ ጋላሳይ ባሻ ጋላስ፥ ሜቶኔ ጬጬ ጋላስ፥ ሺሮኔ ይሳ ጋላስ፥ ማ ጋላሲኔ ቱላላ ጋላስ፥ ሻራኔ ጊርዲ ጊዳ ማ ጋላስ ጊዳና።

¹⁶ ሄ ጋላሳይ ጊምቤቲዳ ካታማታ ቦላኔ ኣዱሳ ጊምቤታ ቦላ ኦላ ዛዬይኔ ኦላ ዋሶይ ሲዬቲዛ ጋላስ ጊዳና።

¹⁷ ኣሳይ ቆቄ ሄሜታና ማላ ኣሳ ቦላ ታኒ ጬጬ ዬዳና፤ ኣሳይ ጎዳ ቦላ ናጋራ ኦዳ ጊሻስ ኢስታ ሱ ዲኦ ማላ ጉካና፤ ኢስታ ኣሃይካ ቡራ ማላ ኦሌታና።

¹⁸ ጎዳ ባሻ ጋላስ ኢስታ ቢራይኔ ዎርቃይ ኢስታ ኣሻናስ ዳንዳዬና። ቢታይ ኩሜ ኢዛ ሃንቆን ያና፤ ኢዛ ዚልኤቴ ሱሌን ቢታ ኡባይ ጹጌታና፤ ቢታ ቦላ ዲዛ ኡባ ቦላ ቆፖንታ ዲሺን ዉርሴ ኤሃና» ጌስ ጎዳይ።