ዛካራሳ ቲንቢቴ 9 - ጋሞ ማጻፋ

ኢስራኤሌ ኣሳ ሞርኬታ ቦላ ያና ፒርዳ

¹ ኢስራኤሌ ኣሳ ኡባ ኣይፌይ ፑዴ ጎዳኮ ጼሌስ፤ ሄሳ ጊሻስ ጎዳይ ካሴ ዮቲ ዎዳ ማላ ሴዲሬኬ ቦላኔ ዳማስቆ ቦላ ፒርዳና።

² ሃ ፒርዳዚካ ዳማስቆ ዛዋን ዲዛ ሃማቴ ቦላ፥ ኣ ኤራቴ ዲዛ ጺሮሴ ካታማታ ቦላኔ ሲዶና ካታማታ ቦላ ጋካና።

³ ጺሮሴ ካታማያ ባስ ሚኖ ሚጻ ጊጊሳዱስ፤ ቢራ ቢታ ማላ፥ ዎርቃካ ጉዱላ ማላ ሺሻ ጉፓዱስ።

⁴ ጊዶ ኣቲን ጎዳይ ኢዛ ጉፒዳይሳ ዎ ኤካና፤ ኢዚስ ኣባ ጊዶን ዲዛ ዎልቃ ኡባ ይሳና፤ ኢዛካ ታማን ጹጌታ ያና።

⁵ ኣስቄሎናይ ሄሳ ቤኢዲ ያያና፤ ጋዛይ ሜቶን ኡንኤታና፤ ሄሳካ ኣቃሮኔይ ሂዶታካ ቃንጻና፤ ጋዛይ ቃሴ ካዎይ ባይንዳሮ ጊዳና፤ ኣስቄሎናይ ቡላ ጊዳና።

⁶ ዋላካ ዴሬይ ኣዛጾኔ ኦይካና፤ ጬቄቲዛ ፊሊስጼሜ ኣሳ ታ ይሳና።

⁷ ታኒ ኢስታ ዶናፔ ሱ፥ ኢስታ ጋጮፔ ሞንታ ማላ ዲጌቲዳ ካ ዲጋና፤ ሃንኮ ኣቲዳይቲ ታ ዴሬ ጊዳና፤ ዩሁዳ ቢታን ሃላቃታና፤ ኣቃሮኔ ኣሳይካ ያቡሴ ኣሳ ማላ ጊዳና።

⁸ ታኒ ጊዲኮ ታ ኬ ቦንቂዛ ዎልቃማታፔ ናጋና፤ ሃይሳፌ ጉዬ ኡንኤዛይ ታ ዴራ ላቴና። ታኒ ሃኢ ሚና ናጋይስ።

ቡሮ ያና ጺዮኔ ካዎ

⁹ ሃኔ ጺዮኔ ናዬ ኬሃ ኡፋዬታ። ሃኔ ዬሩሳላሜ ናዬ ኡፋይሳን ኢሊላ፤ ጺሎኔ ኣሺዛ ኔ ካዎይ ኣሽኬ ጊዲዲ ሃሬዮኔ ሃሬይ ጉቴ ቶጊዲ ኔኮ ዬስ።

¹⁰ ፓራ-ጋሬታ ኤፍሬሜፔ ኦላ ፓራታ ዬሩሳላሜፔ ታ ኤካ ይሳና። ታኒ ኦላ ቶራታ ሜንሬና። ሳሮቴ ካዎቴታስ ኣዋጃና። ኢዚ ኣባፌ ኣባን ጋካናስ ሃራና፤ ኤፊራጺሴ ሻፋፔ ሳኣ ጋጻ ጋካናስ ኢዚ ኣይሳና።

¹¹ ታ ኔናራ ሱን ጫቄቲዳ ጫቆዛ ጊሻስ ሃ ባይንዳ ኦላን ቃሼቲዳ ኣሳታ ታ ቢርሻዳ ዬዳና።

¹² ኢንቴኖ ሂዶታይ ዲዛ ቃሾ ኣሳቶ! ኢንቴ ካሴ ዲዛ ሚጻን ሲሚቴ፤ ካሴ ኢንቴስ ዲዛ ኣቆታ ዳኮ ሂስታ ታ ኢንቴስ ዛራና።

¹³ ዩሁዳ ዎንዳፌ ማላ ኤፍሬሜካ ዪሻ ማላ ታ ጎኤታና፤ ሃኔ ጺዮኔ ታኒ ኔ ናይታ ጊሪኬ ዴሬ ቦላ ዴንና፤ ኔናካ ታኒ ዎልቃማ ማሻ ማላ ሂስታ ጎኤታና።

ጎዳይ ቆንጫና

¹⁴ ጎዳይ ኢስታ ቦላ ቆንጫና፤ ኢዛ ዪሻይ ዎልቃን ማላ ፖፖልኡ ጋና፤ ኡባፌ ዎልቃማ ጎዳይ ጹሩምባ ፑናና። ዱጌሃፔ ኬዚዛ ጎቴ ጫርኮ ማላ ኢዚ ባና።

¹⁵ ኡባፌ ዎልቃማ ጎዳይ ኢስታስ ጎንዳሌ ጊዳና፤ ኢስቲ ባ ሞርኬታ ኡባ ይሳና፤ ኢስቲ ያንባርሻን ኦሊዛይታ ዬና፤ ኢስቲ ዎይኔ ኡሹ ኡዪዳ ኣሳ ማላ ዋሳና፤ ያርሾ ሱ ኬሬ ኩሚ ያርሾሶሆ ቦላ ጉኪዛ ማላ ኢስታ ሞርኬታ ሱካ ጉካና።

¹⁶ ሄ ዎዴ ጎዳይ ኢስታ ጾሳይ ባ ዴራ ባስ ዉዴ ሜሄ ሂስቲ ኣሻና፤ ካላቻ ቦላ ዲዛ ሴሎይ ጾልቂዛ ማላ ኢስቲካ ጾሳ ዴሬን ጶላና።

¹⁷ ኢስቲ ኣይ ማላ ሎኦኔ ፑላ ኣስ ጊዳኔሻ! ካ ናቴታ ዎይኔ ኡሺ ጌላኦታ ኣንቃርሳና።