ዛካራሳ ቲንቢቴ 13 - ጋሞ ማጻፋ

ናጋራፔ ጌማዛሙሬ

¹ ኡባፌ ዎልቃማ ጎዳይ፥ «ሄ ጋላስ ዳዊቴ ኬ ኣሳኔ ዬሩሳላሜን ዲዛ ኣሳ ናጋራፔኔ ቱናቴፌ ጌሻናስ ፑልቶይ ፑልታና።

² «ታኒ ሄ ዎዴ ቢታፌ ኤቃ ጾሳታ ሱን ይሳና፤ ሄሳፌ ናምኣን ኢስቲ ቆፌቴቴና፤ ኢስታ ናቤታኔ ቱና ኣያናታ ቢታይ ቦላፌ ታ ዲጋና።

³ ኦኒካ ታኒ ናቤ ጊኮ ኢዛዴ ዬሊዳ ኣዋይኔ ኣዬያ ኢዛ ኔ ጎዳ ሱንን ዎርዶ ሃሳይዳ ጊሻስ ኔስ ሃይቆይ ቤሴስ ጌቶ፤ ኢዚ ቲንቢቴ ሃሳይሺን ኢዛ ዬሊዳይቲ ኢዛ ጫዴቶ።

⁴ ሄ ዎዴ ዎርዶ ሃሳይዳዴይ ኦኒካ ባ ሃሳይዳ ዎርዶ ቲንቢቴን ዬላታና፤ ባሌናስ ኢስኬራ ዲዛ ናቤታ ማይኦ ማይኤና።

⁵ ኢዚካ፥ ‹ታ ጎሻ ኣሳ ኣቲን ናቤ ጊዲኬ፤ ታ ናቴቴፌ ዶማዳ ሃኖ ጋካናስ ጎሻንቻ› ጋና።

⁶ ኢሲ ኣሲ፥ ‹ሄሲ ኔ ቦላ ኣይ ማዱን?› ጊ ኦይቺኮ ኢዚ፥ ‹ታ ሃይሳ ታ ላጌታሶን ዳሼ ማዱንጻዲስ› ጊዴስ።

ሄንንቻይ ሾጬቲን ኢዛ ዶርሳታ ላሌቴ

⁷ «ኡባፌ ዎልቃማ ጎዳይ፥ ‹ማሻ! ታ ሄንንቻ ታ ዳሮ ዶሲዛይሳ ቦላ ቤጋ! ሄሚዛይሳ ሾጫ፤ ዶርሳቲካ ላሌታና፤ ታኒካ ታ ቄሴ ጉታ ቦላ ዴንና› » ጌስ።

⁸ ጎዳይ፥ «ቢታ ኡባን ዲዛ ሄ ኩሼ ኣሳፔ ናምኡ ኩሼይ ያና፤ ኢሲ ኩሼ ኣሲ ኣታና።

⁹ ሄ ኣቲዳ ኢሲ ኩሼ ኣሳ ታ ጌዴ ታማን ዬጋና፤ ቢራ ታማን ጌሺዛ ማላ ታ ጌሻና፤ ዎርቃ ማላካ ፓጫና፤ ኢስቲ ታ ሱን ጼይጋና፤ ታኒካ ኢስታስ ኮያና፤ ታ ኢስታስ፥ ‹ታ ዴሬታ› ጋና፤ ኢስቲካ፥ ‹ኑ ጎዳ› ጋና» ጊዴስ።