Siiqo Saba 7 - ጋሞ ማጻፋ

ፓንዚ

¹ «ካዎ ናዳ ሎኢዛሬ! ኔ ቶሆቲ ኔኒ ናጻላ ጫማ ኣ ዲሺን ቤኢዛ ዎዴ ኣይ ማላ ሎኢዞ! ኔ ሼቻቲ ሂላንቻ ዎጋጬይ ቆጺዲ ሎኤ ኣሌቂሲዳ ኢንቁ ሚሳቴስ።

² ኔ ጉልኣይ ዎይኔ ኡሺ ኩሚዳ ቢሪሌ ሚሳቴስ፤ ኔ ጼሳይ ሎኦ ጪሻን ቃሼቲዳ ጊስቴ ሚርቄ ሚሳቴስ።

³ ኔ ንቲ ሜንቴ ዬሌቲዳ ዉሻ ላቃ ሚሳቴቴስ።

⁴ ኔ ቆይ ዳንጋርሳ ዛሌን ኣሌቄቲዳ ኣዱሳ ጊምቤ ሚሳቴስ፤ ኔ ኣይፌይ ጊታ ሃሴቦኔ ካታማ ፔንጌ ማታን ዲዛ ኤሌ ሃ ሚሳቴስ፤ ኔ ሲይ ዳማስቆ ጼሊሲዲ ጊምቢዳ ሊባኖሴ ጊምቤዛ ሚሳቴስ።

⁵ ኔ ሁኤይ ቃርሜሎሴ ዙማ ሚሳቴስ፤ ኔ ሁኤ ቢናናይ ጻጼቲ ኡቲዳ ጺላታ ሚሳቴስ፤ ኔ ሁኤ ዳይካ ካዎዛ ዎዚና ኤኪዴስ።

⁶ ታ ጎዴ! ኔ ኣይ ማላ ሎኣይ! ኔ ኣይ ማላ ካይሻይ! ኔ ሲቆይ ታና ኣይ ማላ ኡፋይሲዜ!

⁷ ኔ ጌሳይ ዛምባ ጌሳ ሚሳቴስ፤ ኔ ንይ ዛምባ ዉርጮ ሚሳቴስ።

⁸ ታኒ ሃ ዛምባ ቦላ ኬዛና፤ ኬዛዳ ኢዛ ኣይፌታ ማጻና፤ ኔ ንቲ ዎይኔ ኣይፌ ማላ ዉርጮቲ ኡቲዳ፤ ቃሴ ኔ ፔኖይ ኣፒሌ ኣይፌ ማላ ሳዌስ።

⁹ ኔ ሜቴርሻቲ ኤሳ ኢሊሎ ማላ ማልኤቴስ» ጊዴስ። «ሂስቲኮ ሄ ሎኦ ኢሊሎይ ታ ሲቆዛ ሜቴርሻታ ጊዶራኔ ኣቻታ ጊዶራ ዱጌ ዎሎሉ ጊ ጎጎ።

ጌላኦያ

¹⁰ ታኒ ታ ሲቆዛሳ፤ ኢዚካ ታና ኣሞቴስ።

¹¹ ታ ሲቆዞ! ሃ ያ፤ ናምኣይ ካታማፔ ኬዚዲ ኣኔ ጌዴ ጋጻሬ ቦስ፤ ሄን ኦማርስ ኣኔ ኢሲፌ ኣስ።

¹² ማላዶ ዎንታራ ኣኔ ዎይኔ ኣታኪልቴ ጊዶ ቦስ፤ ዎይኔይ ጪዪዳኮ፥ ኦሮማኔይካ ኣይፊዳኮ ኣኔ ቤዮስ፤ ሄን ታኒ ታ ሲቆ ኔስ ቆንጪሳና።

¹³ ኢንኮ ኣይፌ ሳዎይኔ ዱማ ዱማ ኣይፌ ኢሚዛ ኣታኪልቴቲ ኑ ካሬን ኩሚዳ፤ ታ ሲቆዞ! ሃ ኣይፌታፔ ቴሪዳይታኔ ኦራ ማጼቲዳይታ ኔስ ዎዲስ።