Siiqo Saba 6 - ጋሞ ማጻፋ

ላጌቲ

¹ «ማጫሳ ኡባፌ ሎኦዬ! ኔ ሲቆ ላጌዚ ኣዋ ቢዴ? ኑኒካ ኔናራ ኢሲፌ ኮያናስ፥ ኢዚ ኣዋ ባጋራ ቢዳኮ ኑስ ዮታ» ጊዳ።

ጌላኦያ

² «ታ ሲቆዚ ዶርሳ ዉዴ ሄማናስ ሎኦ ጪሻታ ማጻናስ ሺቶስ ጎኢዛ ሳዎ ማታይ ዲዛሶ ዱጌ ኣታኪልቴ ጊዶ ዎዴስ።

³ ታኒ ታ ሲቆዛሳ፤ ኢዚካ ታሳ፤ ኢዚ ዉዴዛ ጪሊላ ማታን ሄሜስ» ጋዱስ።

ፓንዚ

⁴ «ታ ጎዴ! ኔኒ ቲርጻ ካታማይ ሎኢዛ ማላ ሎኣሳ፤ ዬሩሳላሜ ማላ ኬሃ ካይሻሳ፤ ባንዲራ ቶኪዲ ቢዛ ኦላንቻ ማላ ያሺሲዛ ቴማራ ዳሳ።

⁵ ዎዜ ኔና ኔ ኣይፌ ታፔ ዴንርኪ! ኢስቲ ታና ዲኢዲ ቃሾ ኣስ ኬሲዳ፤ ኔ ቢናናይ ጋላኣዴ ዙማፔ ዱጌ ዎዛ ዴይሻ ዉዴ ሚሳቴስ።

⁶ ኢስታ ጊዶን ማይኔይ ባይንዳ ሜንቴ ሜንቴ ዬሊዛ ኢስኬይ ዲሬቲን ሜጬቲ ኬዚዛ ቦ ዶርሳ ዉዴታ ማላ ኔ ኣቻቲ ታና ኡፋይሴቴስ።

⁷ ኔ ሻጋላቲ ኣይፌሶ ካሚዛ ቁራጬ ጊዶራ ጼሊዛ ዎዴ ኦሮማኔ ናምኡ ኬሲ ጳልቂዳ ሚሳቴቴስ።

⁸ ኡሱፑን ታሙ ማጫ ካዎቲ፥ ኦስፑን ታሙ ላጌ ማጫሳቲ፥ ቃሴ ቆዳይ ባይንዳ ጌላኦቲ ዴቴስ።

⁹ ታኒ ጊዲኮ ኢሲኒዮ ጻላ ዶሳይስ፤ ኢዚ ቦላ ኣይ ዎሶይ ዴና፤ ኢዛ ሃራጴ ማላ ካይሻ ኡታዱስ፤ ኢዛ ባ ኣዬይስካ ሜጺ ኢሲኖ፤ ኢዞ ዬሊዳ ኣያ ኢዞ ኡባፌ ኣ ሲቃዉስ። ጌላኦቲካ ኢዞ ጼሊዲ ጼሊዲ ሳቤቴስ፤ ካዎ ማቼቲኔ ኢዛ ላጌቲ ኢዞ ናሼቴስ።

ላጌቲ

¹⁰ ሃና ማላዶ ጻልቄ ማላ ሞኪዛራ፥ ኣጊና ማላ ጶሊዛራ፥ ኣዋ ማላ ፖኢዛራ፥ ባንዲራ ቶኪዲ ቢዛ ኦላንቻ ማላ ያሺሲዛራ ኢዛ ኦኔ?» ጌቴስ።

ፓንዚ

¹¹ «ታኒ ሾባን ቶኬቲዳ ኣታኪልቴታ ቤኣናስ፥ ዎይኔይ ኣጪዳኮ፥ ኦሮማኔይካ ጪዪዳኮ ጼላናስ ዱጌ ኦቾሎኔይ ቶኬቲዛሶ ዎዲስ።

¹² ታኒ ቆፖንታ ዲሺን፥ ታ ኣሞይ ታና ኤፊዲ ካዎ ፓራ-ጋሬታ ቦላ ኡቲሲዴስ» ጊዴስ።

ላጌቲ

¹³ «ሃኔ ሹላሜ ማጫሳዬ! ሃ ሲማ፤ ኔና ኑ ሎኤ ጼላና ማላ ሃ ሲማ» ጊዳ። «ዳሮ ኣሳ ሲንን ዬጺዛ ኣሳ ማላ፥ ታና ሹላሜ ማጫሳዮ ኣይስ ጼሌቲ?» ጋዱስ።