Siiqo Saba 4 - ጋሞ ማጻፋ

ፓንዚ

¹ «ታ ጎዴ! ኔ ኣይ ማላ ሎኦ! ኔኒ ኣይ ማላ ጊጋ! ኔ ኣይፌቲ ኔ ኣይፌሶ ካሚዛ ቁራጬ ጊዶራ ጼሊዛ ዎዴ ሃራጴ ማላ ሎኤቴስ፤ ኔ ቢናናይ ጋላኣዴ ዙማራ ዱጌ ዎዛ ዴይሻ ዉዴ ሚሳቴስ።

² ኢስታ ጊዶን ማይኔይ ባይንዳ ሜንቴ ሜንቴ ዬሊዛ ኢስኬይ ዲሬቲን ሜጬቲ ኬዚዛ ቦ ዶርሳ ዉዴታ ማላ ኔ ኣቻቲ ታና ኡፋይሴቴስ።

³ ኔ ሜቴርሻቲ ዞኦ ቃጪና ማላ ሎኤቴስ፤ ኔ ሃሳይዛ ዎዴ ኬሂ ኡፋይሴቴስ፤ ኔ ሻጋላቲ ኣይፌሶ ካሚዛ ቁራጬ ጊዶራ ጼሊዛ ዎዴ ኦሮማኔ ናምኡ ኬሲ ጳልቂዳ ሚሳቴቴስ።

⁴ ኔ ቆይ ሺያን ቆዴቲዛ ጎንዳሌቲ፥ ኦላ ማሳራቲ ኢዛ ቦላ ካቄቲ ቤቲዛኔ ኦላ ሚጻ ጊዳናስ ኦሴቲዳ ዳዊቴ ጊምቤ ሚሳቴስ፤

⁵ ኔ ንቲ ሜንቴ ዬሌቲዲ፥ ሱፌ ጪሻታ ጊዶን ሚዛ ጌኔሳ ላቃታ ሚሳቴቴስ።

⁶ ቃማይ ዎንታና ጋካናስ፥ ማይ ኣና ጋካናስ ካርቤይ ዲዛ ዙማ ቦላኔ ኤጻኔይ ኢዛ ዙምቡላ ቦላ ባዳ ሼምፓና።

⁷ ታ ጎዴ! ኔ ኣሳቴይ ኩሜ ሎኦ፤ ኔ ቦላ ኣይኮ ዎሶይካ ባዋ።

⁸ ታ ሚሺራዬ! ሊባኖሴፔ ሃ ዱጌ ዎ፤ ጋሞይኔ ማሄይ ዲዛሶ ኣማና ዙማፔ፥ ሳኒሬ ዙማፔኔ ሄርሞኔ ዙማፔ ዎዳ ሃ ያ።

⁹ ታስ ሲቆ ሚቾ ጊዲዳ ታ ሚሺራዬ! ኔ ጼሊዛ ጼሎይኔ ኔ ቆን ዲዛ ኣሌቆይ ታ ዎዚና ኤኪዴስ።

¹⁰ ታስ ሲቆ ሚቾ ጊዲዳ ታ ሚሺራዬ! ኔ ሲቆይ ታና ኣይ ማላ ኡፋይሲዜ! ኔ ሲቆይ ዎይኔ ኡሻፌ ኣ ኡፋይሴስ፤ ኔ ሺቶይ ኡባፌካ ኣዲ ሳዌስ።

¹¹ ታ ሚሺራዬ! ኔ ሜቴርሻራ ኤሳ ኢሊሎይ ጾኬስ። ኔ ዶናፔ ኤሲኔ ማ ፑልቴስ፤ ኔ ማይኦ ሳዎይ ሊባኖሴ ሺቶ ማላ ሳዌስ።

¹² ታስ ሲቆ ሚቾ ጊዲዳ ታ ሚሺራዬ! ኔ ታስ ዲርሳ ጊዶን ናጌቲዛ ኣታኪልቴ ማላ፥ ኢዛስ ዩሾይ ሹሬቲዳ ፑልቶ ሃ ማላኔ ኣሲ ጋኮንታ ፒሳ ሃ ማላ።

¹³ ኔ ኣ ቢዛሶን ማልኢዛ ሚ ኣይፌቲ ኩሚዳ፤ ሄይቲካ ኦሮማኔ ኣታኪልቴሶሆታ ማላ።

¹⁴ ናርዶሴይ፥ ላዴይ፥ ሳዎ ማታይኔ ቃራፋይ፥ ቃሴካ ኤጻኔ ማላ ሳዊዛ ዱማ ዱማ ኣታኪልቴቲ ዴቴስ፤ ሃራይ ቃሴ ካርቤይ፥ ጎዳሬ ኡ ጪሻይኔ ዱማ ዱማ ሳዎ ኣታኪልቴቲ ሞኬቴስ።

¹⁵ ኔኒ ኣታኪልቴ ኡሺዛ ፑልቶ ሃ ማላ፤ ዴኦ ሃ ኬዚዛ ኦላ ማላ፤ ሊባኖሴ ዙማ ጋርሳፌ ጎጊዛ ሻፋ ሃ ማላ» ጊዴስ።

ጌላኦያ

¹⁶ «ፑዴሃ ባጋ ጫርኮዞ! ዴንዳ! ዱጌሃ ባጋ ጫርኮዞ! ሃ ያ! ታ ኣታኪልቴ ቦላ ጫርካ! ሄራዚ ኡባይ ሳዎ ቱኑ ጎ። ታ ሲቆዚ ባ ኣታኪልቴ ጊዶ ዮ፤ ዶሬቲዳ ሚ ኣይፌታካ ሞ» ጋዱስ።