Siiqo Saba 3 - ጋሞ ማጻፋ

ጌላኦያ

¹ «ኦማርስ ኩሜ ታ ሂጻን ኢቻዳ፥ ታ ሲቆዛ ዴማናስ ኣሞታዲስ፤ ሚንዳካ ኮያዲስ፤ ጊዶ ኣቲን ዴማናስ ዳንዳያቤኬ።

² ካታማ ጊዶን ዲዛ ኦጌታኒኔ ዱቡሻታ ኡባን ዩያዲስ፤ ታ ሲቆዛ ዴማናስ ኣሞታዲስ፤ ሚንዳካ ኮያዲስ፤ ጊዶ ኣቲን ዴማናስ ዳንዳያቤኬ።

³ ካታማ ዩዪ ናጊዛይቲ ታና ዴሚዳ፤ ታኒ ኢስታስ፥ ‹ታ ሲቆዛ ቤዪዴቲ?› ጋዳ ኦይቻዲስ።

⁴ ኢስታፌ ጉ ኣ ባዳ ታ ሲቆዛ ዴማዲስ፤ ኢዚ ታፔ ኬሲ ኤኮንታ ማላ ሚንዳ ኦይካዲስ፤ ታ ኣዬይ ኬ ኤካ ኤፋዲስ፤ ታ ዬሌቲዳ ኪፊሌ ጌልዲስ።

⁵ ኢንቴኖ ዬሩሳላሜ ጌላኦቶ! ሲቆዚ ባስ ዶሲዲ ዴንዳና ጋካናስ፥ ኢዛ ኢንቴ ቤጎንታ ማላ፥ ታኒ ኢንቴና ጌኔሳታኒኔ ባዞ ዉሻታን ኣማታይስ» ጋዱስ።

ላጌቲ

⁶ «ካርቤፌ፥ ኤጻኔፔኔ ዛልኣንቻታ ሳዎፔ ጊጌቲዳ ሺቶ ማላ ሳዎ ቱኑ ጋሼኔ ጩዋ ማላ ቱሉ ጋሼ ባዞራ ዪዛራ ሃና ኢዛ ኦኔ?

⁷ ሄኮ ቤኢቴ፥ ሶሎሞኔ ፓራ-ጋሬያ ዩሳን ዳዉስ፤ ኢስራኤሌፔ ዶሬቲዳ ኡሱፑን ታሙ ኦላ ኣሳቲ ኢዞ ኣዣቢዳ።

⁸ ኢስቲ ኡባይካ ማሻ ኦይ ሜዜቲዳ፥ ኦላ ኤሪዛይታኔ ኦማርስ ዪዛ ሜቶ ኤቄታናስ ኢሶይ ኢሶይ ማሻ ጊጺዳ ማላ ኣቄቴስ።

⁹ ካዎ ሶሎሞኔይ ፓራ-ጋሬ ጊዶን ኡቲዛ ኣራታይ ሊባኖሴ ሚፌ ኦሴቲዴስ።

¹⁰ ኢዛ ኣራታ ቱሳቲ ቢራን ቲዬቲዳ፤ ዜምፖዚ ዎርቃን ኣሌቄቲዴስ፤ ኡቲዛሶዚ ኦቻ ቴራ ሚሳቲዛ ቃጪናፔ ኦሴቲዴስ፤ ጊዶዛ ዬሩሳላሜ ጌላኦቲ ሲቆስ ዳዲዳ ኣፋላን ኣሌቂሲዳ» ጊዳ።

ጌላኦያ

¹¹ «ኢንቴኖ ጺዮኔ ጌላኦቶ! ኢዚ ኬሂ ኡፋዬቲዳ ኢዛ ቡላቻ ጋላስ ኢዛ ኣያ ኢዛ ሁኤን ዎዳ ካላቻ ጎጺ ኡቲዳይሳ ቤኣናስ ካዎ ሶሎሞኔኮ ሃ ዪቴ» ጋዱስ።