Siiqo Saba 2 - ጋሞ ማጻፋ

ጌላኦያ

¹ «ታኒ ላሻሮኔን ሞኪዛ ጪሻ ማላኔ ጋን ሞኪዛ ሱፌ ጪሻ ማላ» ጋዱስ።

ፓንዚ

² «ታ ሲቆያ ማጫሳታ ጋርሳን ኣጉን ጊዶን ዲዛ ሎኦ ጪሽ ሚሳታዉስ» ጊዴስ።

ጌላኦያ

³ «ታ ሲቆዛ ታኒ ናቴታራ ጋ ጼሊዛ ዎዴ፥ ዎራ ጊዶን ዲዛ ኣፒሌ ሚሳቴስ፤ ታኒካ ኬሃ ኡፋዬታዲስ፤ ታኒ ኢዛ ኩዋ ጋርሳን ሼምፓዲስ፤ ማልኢዛ ኢዛ ኣይፌዛፔካ ማ ካላዲስ።

⁴ ኢዚ ታና ጊቢራስ ኣሆ ኬን ጌልዴስ፤ ባ ሲቆ ታ ቦላ ባንዲራ ማላ ቁ ቁ ኦዴስ።

⁵ ታኒ ኢዛ ሲቆን ኦይኬታዳ ሃርጋዲስ፤ ሄሳ ጊሻስ ታና ዛቢቤ ኣይፌ ሚዚዲ ጋዚዲሲቴ፤ ኣፒሌ ሚዚዲ ታና ቤጎቴ።

⁶ ባ ሃዲርሳ ኩሼ ቦላ ታና ቦርኮቲሲዴስ፤ ባ ኡሻቻ ኩሼን ታና ኢዲሚዴስ።

⁷ ኢንቴኖ ዬሩሳላሜ ዬላጋ ማጫሳቶ! ሲቆይ ባስ ዶሲዲ ዴንዳና ጋካናስ ኢዛ ኢንቴ ቤጎንታ ማላ፥ ታኒ ኢንቴና ጌኔሳታኒኔ ባዞ ዉሻን ኣማታይስ።

⁸ ቤኢቴ! ታ ሲቆዛ ጬንጉርሲ ዙማታ ቦላራ ፒሪሼ፥ ዙምቡላታ ቦላራ ጾንጌቲሼ ዪዛይሲ ሲዬቴስ።

⁹ ታ ሲቆዚ ዉሻ ላቃ ዎይኮ ጌኔሳ ላቃ ሚሳቴስ። ቤኢቴ! ኢዚ ኑ ኬ ዳራንቻን ኤቂዴስ፤ ማስኮቴራ ሶ ጼሌስ፤ ማጋላሻ ጾኤራ ጹሉንጊ ጼሌስ።

¹⁰ ታ ሲቆዚ ታና፥ ‹ታ ጎዴ፥ ዴንዳ! ታ ሎኦዬ! ሃ ያ! ኣኔ ኢሲፌ ቦስ።

¹¹ ቤያ፥ ባልጎይ ኣዴስ፤ ኢራይካ ኣጊዴስ።

¹² ኡባሶን ጪሺ ጪዪዴስ፤ ማዛሙሬ ዬጺዛ ኣጊናይካ ጋኪዴስ፤ ሃራጴ ዬካ ኑ ቢታን ሲዬቴስ።

¹³ ባላሴይ ኣይፌ ኢሞ ዶሚዴስ፤ ዎይኔይ ጪዪዴስ፤ ኢዛ ጪሻ ሳዎይ ኡባሶን ቱኑ ጌስ። ሄሳ ጊሻስ ታ ጎዴ፥ ዴንዳ፤ ታ ሎኦዬ! ሃያ፤ ኣኔ ኢሲፌ ቦስ› ጌስ» ጋዱስ።

ፓንዚ

¹⁴ «ኔኒ ኣፎ ዶናን ዛላ ዛኣ ጊዶን ዲዛ ሃራጴይ ማላ፤ ኣኔ ኢሲቶ ኔ ኣይፌሶ ታና ቤሳ፤ ኔ ቃላ ጬንጉርሲካ ታና ሲሳ። ኣይስ ጊኮ ኔ ጬንጉርሳይ ታና ኡፋይሴስ፤ ኔ ኣይፌሶይካ ታና ሎኤስ» ጊዴስ።

¹⁵ ኑ ዎይኔ ኣታኪልቴይ ጪዪዴስ፤ ሄሳ ጊሻስ ኑ ዎይኔ ኣታኪልቴ ጊዶ ሞሮንታ ማላ ዎራካናታኔ ኢስታ ቡቱላታ ዎጺማዴን ኦይኪቴ።

ጌላኦያ

¹⁶ «ታ ሲቆዚ ታሳ፤ ታኒካ ኢዛሳ፤ ጪሊላ ማታ ጊዶን ኢዚ ባ ሜሄ ሄሜስ።

¹⁷ ኦማርሳ ማይ ቃሬታናሺን፥ ማላዶ ጫርኮይ ጫርካናሺን፥ ታ ሲቆዞ! ጌኔሳ ማላ ዎይኮ ዉሻ ላቃ ማላ ኣፎቲዛ ዙማ ቦላራ ዎጻዳ ሃ ሲማ» ጋዱስ።