ዬ ማጻፋ 99 - ጋሞ ማጻፋ

¹ ጎዳይ ካዎቲዴስ! ሄሳ ጊሻስ ኣሳይ ኮኮሮ! ኪሩቤታ ጊዶን ካዎቴ ኣራታን ኡቲዴስ፤ ሄሳስ ቢታይካ ቃጾ።

² ጎዳይ ጺዮኔን ጊታ፤ ካዎቴ ኡባፌ ኢዚ ቁ ቁ ጊዴስ።

³ ጊታኔ ኬሂፔ ያሺሲዛ ኔ ሱን ኢስቲ ኡባይ ሳቤቶ! ኢዚ ዱማ!

⁴ ቱማ ፒርዳ ዶሲዛ ዎልቃማ ካዎ! ኔኒ ሱሬቴስ ዮች ዬጋዳሳ፤ ኔኒ ያቆቤስ ቱሙ ፒርዳኔ ጺሎቴ ኤሳዳሳ።

⁵ ኢዚ ዱማ ጊዲዳ ጊሻስ ጎዳ ኑ ጾሳ ቁ ቁ ሂስቲቴ፤ ኢዛ ቶሆ ጋርሳንካ ጉፋኒዲ ኢዛስ ጎይኒቴ።

⁶ ኢዛ ቄሴታ ጊዶፌ ሙሴይኔ ኣሮኔይ ዴቴስ፤ ሳሜሊካ ኢዛ ሱንን ዎሲዳይታፔ ኢሳ፤ ኢስቲ ጎዳስ ዋሲዳ፤ ኢዚካ ኢስታ ዋሶ ኣሊዴስ።

⁷ ኢዚ ሻራ ቱሳ ጊዶራ ኢስታስ ሃሳይዴስ፤ ኢስቲ ኢዚ ኢሚዳ ማራኔ ዎጋ ናጊዳ።

⁸ ኣቤት ጎዳዉ፥ ኑ ጾሳዉ! ኔኒ ኢስታ ዎሳ ሲያዳሳ፤ ኔኒ ኢስታ ኢታቴ ጊሻስ ቃጻይዳ ጊዲኮካ ኢስታስ ኣቶ ጊዳ ጾሳ።

⁹ ጎዳ ኑ ጾሳ ቁ ቁ ሂስቲቴ፤ ኢዛ ጌሻ ዙማ ቦላን ኢዛስ ጎይኒቴ፤ ኣይስ ጊኮ ጎዳ ኑ ጾሳይ ጌሻ ጾሳ።