ዬ ማጻፋ 97 - ጋሞ ማጻፋ

¹ ጎዳይ ካዎቲዴስ፤ ሳኣን ዴኢዛ ኣሳይ ኡፋዬቶ፤ ኣባ ጊዶን ዴኢዛ ሃሩሮቲ ኡፋዬቴቶ።

² ሻራይኔ ሳካና ማይ ኢዛ ዩዪ ኣዴስ፤ ጺሎቴኔ ቱማቴ ኢዛ ካዎቴ ኣራታስ ዮቻ።

³ ታማይ ኢዛፔ ሲንራ ቤስ፤ ኢዛ ዩሾን ዲዛ ሞርኬታካ ጹጌስ።

⁴ ኢዛ ዎልቃን ሳኣ ፖኢሴስ፤ ቢታይ ሄሳ ቤኢዲ ቃጼስ።

⁵ ጎዳ ሲንን፥ ሳኣ ኡባ ጎዳ ሲንን ዙማቲ ሙቃዳ ማላ ሴሪዳ።

⁶ ሳሎቲ ኢዛ ጺሎቴ ኣዋጄቴስ፤ ኣሳይ ኡባይ ኢዛ ቦንቾ ቤኤስ።

⁷ ሚስሌታስ ጎይኒዛይቲኔ ኤቃ ጾሳታን ጬቄቲዛይቲ ኡባይ ዬላቴቶ! ኤቃ ጾሳቲ ኡባይ ጎዳስ ጉልባቴቶ!

⁸ ኣቤት ጎዳዉ! ጺዮኔ ኣሳይ ኔ ጺሎ ፒርዳ ሲዪዲ ኡፋዬቴስ፤ ዩሁዳ ካታማቲካ፥ «ሃሹ» ጌቴስ።

⁹ ኣቤት ጎዳዉ! ኔኒ ሳኣ ኡባፌ ቃሳ፤ ጾሳታ ኡባፌ ኔኒ ጊታታሳ።

¹⁰ ጎዳ ዶሲዛይቶ! ኢታ ኢጺቴ፤ ኢዚ ባስ ኣማኔቲዛይታ ሼምፖ ናጌስ፤ ቃሴካ ኢታታ ኩሼፔካ ኣሼስ።

¹¹ ጺሎታስ ፖኦይ ፖኢ ፖኢ ባና፤ ዎዚና ሱሬታስ ኡፋይሲ ዳና።

¹² ኢንቴኖ ጺሎቶ! ጎዳን ኡፋዬቲቴ፤ ጌሻ ሱን ኢዛይሳ ጋላቲቴ።