ዬ ማጻፋ 96 - ጋሞ ማጻፋ

¹ ጎዳስ ኦራ ማዛሙሬ ዬጺቴ፤ ሳኣን ዴኢዛ ኣሳዉ! ኡባይ ጎዳስ ዬጺቴ።

² ጎዳስ ዬጺቴ፤ ኢዛ ሱን ሳቢቴ፤ ኢዚ ኣሺዛይሳ ሃች ሃች ዮቲቴ።

³ ካዎቴታ ጊዶን ኢዛ ቦንቾ ቆንጪሲቴ፤ ኣሳ ኡባ ጊዶን ማላሊሲዛ ኢዛ ኦሶ ኣዋጂቴ።

⁴ ጎዳይ ጊታ፤ ጊታ ጋላታይካ ኢዛስ ቤሴስ፤ ኡባ ጾሳታፔ ኣዲ ኢዚ ያዬታናስ ቤሴስ።

⁵ ዴሬ ኣሳይ ጎይኒዛ ጾሳቲ ኡባይ ኤቃ ጾሳታ፤ ጊዶ ኣቲን ጎዳይ ሳሎታ ሜዳ ጾሳ።

⁶ ቦንቾይኔ ቴማይ ኢዛ ዩሾን ዴስ፤ ሚኖቴይኔ ፑላይ ኢዛ ኬን ዴስ።

⁷ ኢንቴኖ ቢታ ቦላ ዲዛ ዴሬ ኡባቶ! ጎዳ ቦንቾ ጊሻሲኔ ኢዛ ዎልቃ ጊሻስ ጋላቲቴ።

⁸ ኢዛ ሱንስ ቤሲዛ ቦንቾ ጎዳስ ኢሚቴ፤ ያርሾ ኤኪዲ ኢዛ ኬ ዛጎ ጌሊቴ።

⁹ ኢዛ ጌሻቴ ፑላን ጎዳስ ጎይኒቴ፤ ቢታን ዴኢዛ ኣስ ኡባይ ኢዛ ሲንን ኮኮሪቴ።

¹⁰ ካዎቴታ ጊዶን፥ «ጎዳይ ካዎቲዴስ! ሳኣይ ሚኒ ኤቂዴስ፤ ሙሌካ ቃጼና፤ ኢዚ ኣስ ኡባስ ኢሲ ጊና ፒርዳና» ጊቴ።

¹¹ ሳሎይኔ ሳኣይ ኡፋዬቴቶ! ኣባይኔ ኢዛ ጊዶን ዲዛ ኡባቲ ጉሜቶ!

¹² ጎሻ ጋዴይኔ ኢዛ ቦላ ዲዛ ኡባይ ኡፋዬቶ! ዎራን ዲዛ ሚ ኡባይ ኢዛ ሲንን ኡፋይሳን ዬጻና።

¹³ ኣይስ ጊኮ ጎዳይ ያና፤ ኢዚ ሳኣ ቦላን ፒርዳናስ ያና፤ ኢዚ ሃ ሳኣ ቦላ ጺሎቴን፥ ኣሳ ቦላካ ቱማቴን ፒርዳና።