ዬ ማጻፋ 95 - ጋሞ ማጻፋ

¹ ሃ ዪቴ! ኣኔ ጎዳስ ኡፋይሳን ዬጾስ፤ ኑና ኣሺዛ ዛላስ ኢሊሎስ።

² ኣኔ ኢዛ ሲን ጋላታራ ሺቆስ፤ ጋላታ ማዛሙሬ ኡፋይሳን ዬጾስ።

³ ጋሶይካ ጎዳይ ዎልቃማ ጾሳ፥ ጾሳታ ኡባ ቦላካ ዎልቃማ ካዎ።

⁴ ቢታ ጪማቲ ኢዛ ኩሼን ዴቴስ፤ ዙማ ጼራቲካ ኢዛሳ።

⁵ ኣባ ሃ ኢዛሳ፤ ሄሳ ኢዛ ኩሼቲ ሜዳ፤ ቢታካ ሜዳይ ኢዛ።

⁶ ሃ ዪቴ! ሆኪዲ ኣኔ ኢዛስ ጎይኖስ፤ ኑና ሜዳ ጎዳ ሲንን ጉልባቶስ።

⁷ ኢዚ ኑ ጾሳ፤ ኑኒ ኢዛ ቆሮን ሄሜቲዛይታ፤ ኑኒ ኢዛስ ዶርሳ ዉዴታ። ጎዳይ ኢንቴና ጊዛይሳ ሃች ሲዪቴ!

⁸ «ካሴ ኢንቴ ኣዋቲ ማሳኒኔ ማሪባን ኦይሳ ኢንቴ ዎዚና ሙሚሶፒቴ።

⁹ ኢስቲ ታ ኦሶ ቤኢዲካ ታናራ ኤቄቲዳኔ ታና ፓጪዳ።

¹⁰ ሄ ዬሌታ ቦላ ታኒ ኦይዱ ታሙ ላይ ሃንቄታዲስ፤ ታኒካ፥ ‹ኢስቲ ኡባ ዎዴ ባንታ ዎዚናን ባሊዛ ኣሳ፤ ኢስቲ ታ ኦጌ ኤሪቤቴና› ጋዲስ።

¹¹ ሄሳ ጊሻስ ታኒ፥ ‹ኢስቲ ታ ሼምፖሶ ሙሌካ ጌሌቴና› ጋዳ ሃንቄታ ጫቃዲስ።»