ዬ ማጻፋ 94 - ጋሞ ማጻፋ

¹ ኣቤት ጎዳዉ! ኔኒ ሃሎ ኬሲዛ ጾሳ፤ ኣቤት ሃሎ ኬሲዛ ጾሳዉ! ኔ ቦንቾ ቆንጪሳ።

² ኣቤት ሳኣ ፒርዲዛይሶ! ዴንዳ! ኦቶራንቻታስ ቤሲዛ ቂጻቴ ኢማ።

³ ኣቤት ጎዳዉ! ኢታቲ ኣዉዴ ጋካናስ ጋምኣኔ? ኢስቲ ኣዉዴ ጋካናስ ኡፋዬታኔ?

⁴ ኢታ ኦዛ ኡባቲ ባንታ ኦቶሮ ቃላን ሃሳዬቴስ፤ ጮ ጬቄቴቴስ።

⁵ ኣቤት ጎዳዉ! ኢስቲ ኔ ዴራ ሊቂሴቴስ፤ ኣሳ ቶቼቴስ።

⁶ ኢስቲ ኣምኤታኔ ቤቴ ኣሳታ ዎቴስ፤ ዪኦታ ሲፌቴስ።

⁷ ሂስቲዲ ኢስታስ፥ «ጎዳይ ኑና ቤኤና፤ ያቆቤ ጾሲ ኣኬኬና» ጌቴስ።

⁸ ኢንቴኖ ኣሳ ጊዶፌ ዳማቶ! ኣኬኪቴ! ኢንቴኖ ኤያቶ! ኣዉዴ ኢንቴ ኤራኔ?

⁹ ሃይ ኢሚዳ ጾሲ ሲዬኔ? ኣይፌ ሜዳ ጾሲ ቤኤኔ?

¹⁰ ካዎቴ ሴሪዛይሲ ቃጻዬኔ? ኣስ ኤራቴ ታማርሲዛይሲ ባስ ኤሬኔ?

¹¹ ጎዳይ ኣሳ ቆፋይ ሎንታይሳኔ ሃዳ ጊዲዳይሳ ኤሬስ።

¹² ኣቤት ጎዳዉ! ኔኒ ሴሪዛዴይኔ ኔኒ ኔ ዎጋፔ ታማርሲዛ ኣሲ ኣንጄቲዳዴ።

¹³ ኢታቲ ኩንዳና ኦላይ ቦኬታና ጋካናስ፥ ኔ ኢዛ ሜቶፔ ሼምፒሳሳ።

¹⁴ ጎዳይ ባ ኣሳ ኦሌና፤ ኢዚ ባይታ ኣጌና።

¹⁵ ፒርዳይ ሲሚዲ ጺሎ ፒርዳስ ዮች ጊዳና፤ ጺሎቲ ኡባይ ቱማ ፒርዳ ካላና።

¹⁶ ማካላንቻታ ቦላ ታ ጊሻስ ኤቄታናይ ኦኔ? ኢታ ኦዛይታራካ ታ ጊሻስ ሞቴታናይ ኦኔ?

¹⁷ ጎዳይ ታና ማዶንታኮ፥ ታኒ ኤሶን ዱፎን ጌላዳ ሲርጲ ጋና።

¹⁸ ኣቤት ጎዳዉ! ታኒ፥ «ኩንዳና ሃናይስ» ጊሺን ኔ ሜርና ሲቆይ ታና ካፊዴስ።

¹⁹ ታ ዎዚናይ ጬጬን ኩሚዳ ዎዴ ኔ ሚንይ ኡፋይስ ዳሪሴስ።

²⁰ ዎጋን ዜምፒዲ ጌላ ፒርዲዛዴራ ኔኒ ዙፔታናስ ዳንዳያይ?

²¹ ጺሎ ኣሳታ ቦላ ጌኔ ዱላቴቴስ፤ ሱሬ ኣሳታ ቦላካ ሃይቆ ፒርዳ ፒርዴቴስ።

²² ጎዳይ ጊዲኮ ታስ ታኒ ባቃታ ኣቲዛ ሚጻ፤ ታ ጾሲ ታ ኢዛን ዜምፒዛ ዎጋ ዛላ።

²³ ኢስታ ኢታቴ ጊሻስ ኢዚ ኢስታ ቃጻያና፤ ኢስታ ናጋራ ጊሻስ ኢዚ ኢስታ ይሳና፤ ጎዳ ኑ ጾሳይ ኢስታ ዲፒ ሂስታና።