ዬ ማጻፋ 91 - ጋሞ ማጻፋ

ኑና ናጊዛ ጾሳስ ዬጼቲዳ ማዛሙሬ

¹ ኡባፌ ቃ ጎዳን ዜምፒ ዴኢዛይ፥ ኡባ ዳንዳይዛ ጾሳ ኩዋን ኣቄስ።

² ታኒ ጎዳ፥ «ኔኒ ታስ ዜምፖ፥ ሚጻኔ ታኒ ኔናን ኣማኔቲዛ ታ ጾሳ» ጋና።

³ ኢዚ ኔና ሻንካንቻታ ጊቴፔ፥ ዎዛ ኢታ ሃርጌፌካ ኣሻና።

⁴ ኢዚ ባ ዋንጎታን ኔና ካማና፤ ኢዛ ቄፌታ ጋርሳን ኔኒ ቆቴታ ኣታና፤ ኢዛ ኣማኔቴይ ኔስ ጎንዳሌኔ ዜምፖ ጊዳና።

⁵ ኔኒ ኦማርሳን ዳጋንዛ ሚሻስ፥ ዎይኮ ጋላስ ጾንጌቲዛ ዪሻስ፥

⁶ ማን ኦይኪዛ ሃርጌስ፥ ዎይኮ ሴታ ጋላሳን ዉርሲዛ ኢታ ሃርጌስ ያያካ።

⁷ ኢሲ ሺ ኔ ሚሌሶራ፥ ቃሴ ታሙ ሺ ኔፔ ኡሻቻ ባጋራ ኩንዳና፤ ጊዶ ኣቲን ኔና ኣይኮይካ ቦቼና።

⁸ ኔኒ ኔ ኣይፌን ጼሎ ጻላ ጼላና፤ ኢታቲካ ቃጻዬቲሺን ቤኣና።

⁹ ጎዳ ኔኒ ኔስ ባቃታ ኣቲዛሶ፥ ኡባፌ ቃ ጾሳ ኔስ ዜምፖ ሂስቲዳ ጊሻስ፥

¹⁰ ኢታ ሚሺ ኔና ቦቼና፤ ቦሻይካ ኔ ኬ ሺቄና።

¹¹ ኔ ቢዛ ኦጌ ኡባን ኔና ናጋና ማላ ጾሲ ባ ኪታንቻታ ኣዛዛና።

¹² ኔ ቶሆይ ሹቻን ጴቶንታ ማላ ኪታንቻቲ ባ ኩሼን ኔና ዴንና።

¹³ ኔኒ ጋሞኔ ሃሶ ሾሻ ቦላ ሄሜታና፤ ቃሴካ ዎዳላ ጋሞኔ ኢታ ሾሻ ዬና።

¹⁴ ጎዳይ፥ «ኢዚ ታና ሲቂዳ ጊሻስ ታኒ ኢዛ ኣሻና፤ ኢዚ ታ ሱን ኤሪዳ ጊሻስ ታኒ ኢዛ ናጋና።

¹⁵ ኢዚ ታና ጼይጊዛ ዎዴ ታኒ ኢዛስ ኮያና፤ ኢዚ ሜቶቲዳ ዎዴ ታኒ ኢዛራ ኢሲፌ ጊዳና፤ ታኒ ኢዛ ኣሻናኔ ቦንቻና።

¹⁶ ታኒ ኢዛ ላይ ኣዱሳና፤ ታ ኣሺዛዴ ጊዲዳይሳ ታ ኢዛ ቤሳና» ጌስ።