ዬ ማጻፋ 90 - ጋሞ ማጻፋ

ኦይዳን ማጻፋ ( ማዛ 90—106 ) ጾሳ ኣስ ሙሴይ ዎሲዳ ዎሳ

¹ ጎዳዉ! ኔኒ ኑስ ዬሌታፔ ዬሌታ ጋካናስ ሺቂ ኣቲዛሶ ጊዳዳሳ።

² ዙማቲ ሜታናፔ ካሴ፥ ዎይኮ ኔኒ ሳኣ ኦናፔ ካሴ ሜርናፔ ሜርና ጋካናሲ ኔኒ ጾሳ።

³ ኔኒ ኣሳ ናይታ፥ «ኣሳ ናይቶ! ጉዬ ቢታን ሲሚቴ» ጋዳ ኢስቲ ሜቲዳ ቢታን ጉዬ ዛራሳ።

⁴ ሺ ላይ ኔስ ኣዳ ኢሲ ጋላሳ ማላ፤ ዎይኮ ኦማርሳፌ ኢሲ ሳቴ ማላ።

⁵ ኣስ ቆፖንታ ኤፊዛ ዲኦ ማላ ኔ ኤፊሺን፥ ኢስቲ ኣጉሞ ማላ ኣና፤ ማላዶ ማላዶ ሞኪዛ ማታ ማላ ጪሊሌቴስ።

⁶ ማታይ ማላዶ ዲጪዲ ጪዬስ፤ ኦማርሳ ዎዴ ጊዲኮ ሹሊዲ ሜሌስ።

⁷ ኑኒ ኔ ቃንጌን ዉሪዶስ፤ ኔ ሃንቆ ሱሌን ዳጋሚዶስ።

⁸ ኔኒ ኑ ኢታ ኦሶ ኔ ሲንን ዎዳሳ፤ ቃሴ ኑ ጌንዳ ናጋራ ኔ ሲን ፖኦኮ ኣዳሳ።

⁹ ኑ ዎዴ ኡባይ ኔ ሃንቆን ኣዴስ፤ ኑ ላይካ ኦሌን ዉርሶስ።

¹⁰ ኑ ዳና ላይይ ላፑን ታማ፤ ዳሬስ ጊኮ ኦስፑን ታማ፤ ሄይቲካ ሜቶኒኔ ጬጬን ኩሚዳ፤ ኑ ላይይ ኤሶን ኣስ፤ ኑኒካ ኤሶን ባና።

¹¹ ኔ ሃንቆዛ ዎልቃ ኦኔ ኤሪዛይ? ኔ ሃንቆ ሴላይ ያሼስ።

¹² ኑ ላይ ማራራ ኑ ጎኤታና ማላ ኑና ኣ ኤራቴ ታማርሳ።

¹³ ኣቤት ጎዳዉ! ኔ ሃንቆይ ኣዉዴ ጋካና ጋምኣኔ? ሲማ! ኔ ኣይሌታስ ቃታ!

¹⁴ ኑ ላይ ኡባን ኑኒ ኡፋዬታና ማላኔ ዬጻና ማላ ማላዶ ማላዶ ኔ ሲቆን ኑና ካልሳ።

¹⁵ ኔኒ ኑና ሜቶዳ ጋላሳታ ኬናኔ ኑኒ ቱጋ ቤኢዳ ላይታ ሊኬ ኑና ኡፋይሳ።

¹⁶ ኑስ ኔ ኣይሌታስ ኔ ኦሶይ ቆንጮ፤ ኔ ቦንቾይ ኑ ናይታስ ቤቶ።

¹⁷ ኣቤት ጎዳዉ! ኑ ጾሳዉ! ኔ ኪያቴ ኑናራ ጊዶ፤ ኑ ኦዛ ኡባ ኑስ ኢንጄሳ፤ ኤሮ! ኑ ኦዛ ኡባ ኑስ ኢንጄሳ።