ዬ ማጻፋ 86 - ጋሞ ማጻፋ

ዳዊቴ ዎሳ

¹ ኣቤት ጎዳዉ! ታኒ ሂዬሳኔ ሜቶታንቻ ጊዲዳ ጊሻስ ታ ዋሶዛ ሲያዳ ታስ ዛሮ ኢማ።

² ታኒ ኔስ ዱማ ኣስ ጊዲዳ ጊሻስ ኔ ታ ሼምፖ ናጋ፤ ኔኒ ታ ጾሳ፤ ኔናን ኣማኔቲዛ ኔ ኣይሌዛ ታና ኣሻ።

³ ኣቤት ጎዳዉ! ኩሜ ጋላስ ታ ኔኮ ዋሲዛ ጊሻስ ኔ ታና ማራ።

⁴ ኣቤት ጎዳዉ! ታኒ ዎዚናፔ ኔና ዎሲዛ ጊሻስ ታና ኔ ኣይሌዛ ኡፋይሳ።

⁵ ኣቤት ጎዳዉ! ኔኒ ኑስ ኪያኔ ኣቶ ጊዛዴ፤ ኔና ዎሲዛ ኡባስ ኔ ሜርና ሲቆ ቤሳሳ።

⁶ ኣቤት ጎዳዉ! ታ ዎሳ ሲያ፤ ታ ሾባ ዎሲዛይሳ ኤዝጋ።

⁷ ኔ ታስ ዛሮ ኢሚዛ ጊሻስ ታኒ ሜቶ ጋላሳን ኔኮ ዋሳይስ።

⁸ ኣቤት ጎዳዉ! ኔ ማላይ ጾሳታ ጊዶን ባዋ፤ ኔ ኦሶራ ጊናቲዛ ኦሶይካ ዴና።

⁹ ኣቤት ጎዳዉ! ኔኒ ሜዳ ካዎቴይ ኡባይ ኔኮ ዪዲ ኔስ ጎይናና፤ ኔ ሱንካ ቦንቻና።

¹⁰ ኔኒ ጊታ፤ ማላሊሲዛ ሚሽ ኦሳ። ኔኒ ጻላ ጾሳ።

¹¹ ኣቤት ጎዳዉ! ታኒ ኔ ቱማን ባና ማላ ታና ኔ ኦጌ ታማርሳ፤ ታኒ ኔ ሱንስ ያያና ማላ ታስ ኢሲ ዎዚና ኢማ።

¹² ኣቤት ጎዳ ታ ጾሳዉ! ታኒ ኔና ታ ኩሜ ዎዚናፔ ጋላታና፤ ኔ ሱንካ ሜርናስ ቦንቻና።

¹³ ኣይስ ጊኮ ኔ ታና ቤሲዳ ሜርና ሲቆይ ኬሂ ጊታ፤ ኔኒ ታ ሼምፖዮ ዱፎፔ ኣሻዳሳ።

¹⁴ ኣቤት ጾሳዉ! ኦቶራንቻቲ ታ ቦላ ዴንዲዳ፤ ታና ዎና ኮዪዲ ፓንጋቲ ዱላቴቴስ፤ ኔና ዉዳንካ ዬጊቤቴና።

¹⁵ ጊዶ ኣቲን ኣቤት ጎዳዉ! ኔኒ ቃቲዛዴኔ ማሪዛ ጾሳ፤ ሃንቄታናስ ጋምኢዛ ጾሳ፤ ኔ ሲቆይኔ ኔ ኣማኔቴይ ኬሂ ዳሮ።

¹⁶ ታኮ ሲማዳ ታስ ቃታ፤ ታስ ኔ ኣይሌዛስ ዎልቃ ኢማ፤ ኔ ኣይሌይ ናዛ ታና ኣሻ።

¹⁷ ኣቤት ጎዳዉ! ኔ ታና ማዲዛይሳኔ ሚንዛይሳ ታና ኢጺዛይቲ ቤኢዲ ዬላታና ማላ ኔ ኪያቴ ማላታ ታና ቤሳ።