ዬ ማጻፋ 85 - ጋሞ ማጻፋ

ቆሬ ናይቲ ዛማሬታ ካቦስ ዲን ዬጺዳ ማዛሙሬ

¹ ኣቤት ጎዳዉ! ኔኒ ኔ ቢታስ ኪያቴ ቤሳዳሳ፤ ያቆቤ ዲኤቲዳሶፔ ዛራዳሳ።

² ኔኒ ኔ ኣሳ ናቆ ኣቶ ጋዳሳ፤ ኢስታ ናጋራ ኡባ ካማዳሳ።

³ ኔኒ ዪሎቲዛይሳ ኡባ ኣጋዳሳ፤ ሱሊዛ ኔ ሃንቆፌካ ሲማዳሳ።

⁴ ኣቤት ኑና ኣሺዛ ጾሳዉ! ኔ ኑና ዛራ፤ ኔኒ ኑ ቦላ ላንጬቲዳይሳ ኣጋ።

⁵ ኔኒ ኑና ሜርናስ ሃንቄታኔ? ኔ ሃንቆይ ዬሌታፔ ዬሌታ ጋካናዉ ጋምኣኔ?

⁶ ኔ ኣሳይ ኔናን ኡፋዬታና ማላ፥ ኔ ኑና ኦራጺሲኪ!

⁷ ኣቤት ጎዳዉ! ኔ ሜርና ሲቆዛ ኑና ቤሳ፤ ኔኒ ኑና ኣሻ።

⁸ ታኒ ጎዳ ጾሲ ዮቲዛይሳ ሲያና፤ ኢስቲ ሲሚዲ ባላ ኦጌን ቦንታ ኣጊኮ፥ ባ ጌሻ ዴራስ ሳሮቴ ኤሃናስ ሂዶታ ኢሚዴስ።

⁹ ኢዛ ቦንቾይ ኑ ቢታን ዳና ማላ ኣቶቴይ ኢዛስ ያዪዛይታስ ማታን ዴስ።

¹⁰ ሲቆይኔ ቱማቴ ኢሲፌ ሲጌቴቴስ፤ ጺሎቴኔ ሳሮቴ ኢሲፌ ኢዲሜቴቴስ።

¹¹ ኣማኔቴ ሳኣፔ ፑዴ ኬዛና፤ ጾሳ ጺሎቴ ሳሎፔ ዱጌ ዎና።

¹² ቤኢቴ! ጎዳይ ሎኦ ሚሽ ኢማና፤ ኑ ቢታይካ ሎኦ ካ ሞኪሳና።

¹³ ጺሎቴ ኢዛፔ ሲንራ ባና፤ ኢዚ ባናሶካ ኢዛስ ጊጊሳና።